.jpg)
កាលពីថ្ងៃពុធ ទី ១៧ ខែកុម្ភៈ អ្នកនាំពាក្យរបស់អធិការបតីអាល្លឺម៉ង់លោកស្រី Angela Merkel បាននិយាយដោយសម្តែងនូវការព្រួយបារម្ភក្រោយពីបានធ្វើការសន្ទនាតាមទូរស័ព្ទជាមួយប្រធានាធិបតីអ៊ីរ៉ង់ លោក Hassan Rouhani។ លោកស្រី Merkel សម្ដែងការមិនពេញចិត្តចំពោះការមិនគោរពតាមកិច្ចព្រមព្រៀងនុយក្លេអ៊ែររួមនៃផែនការសកម្មភាពឆ្នាំ ២០១៥ (JCPOA) កន្លងមក។
កិច្ចព្រមព្រៀងនេះ គឺសំដៅទៅអ៊ីរ៉ង់ក្នុងការផ្តល់ការធានាថា ប្រទេសនេះនឹងមិនបង្កើតគ្រាប់បែកបរមាណូនោះទេ។ នេះរួមបញ្ចូលទាំងការអនុញ្ញាតឱ្យមានការត្រួតពិនិត្យអាវុធនុយក្លេអ៊ែរជាថ្នូរនឹងសហគមន៍អន្តរជាតិធ្វើការបន្ធូរទណ្ឌកម្មទៅលើប្រទេសអ៊ីរ៉ង់។
ប្រទេសហត្ថលេខីមកពីប្រទេសនៅអឺរ៉ុបទាំង ៣ ដែលបានចុះ-ហត្ថលេខាលើកិច្ចព្រមព្រៀងនេះចង់ធ្វើឱ្យកិច្ចព្រមព្រៀងថ្មីនេះមានសុពលភាពប្រសើរជាងមុន បន្ទាប់ពីអតីតប្រធានាធិបតីអាមេរិក ដូណាល់ ត្រាំ បានដើរចេញកាលពីឆ្នាំ ២០១៨ កន្លងទៅ។
ប្រធានាធិបតីអាមេរិក លោក Joe Biden បាននិយាយថា លោកនឹងព្យាយាមចូលរួមកិច្ចព្រមព្រៀងនេះឡើងវិញ ប៉ុន្តែបានទទូចថា រដ្ឋាភិបាលក្រុងតេអេរ៉ង់ដំបូងត្រូវតែផ្លាស់ប្តូរជំហាននៃកម្មវិធីនុយក្លេអ៊ែររបស់ខ្លួនជាមុនសិន៕
