.jpg)
លោក រូហានី (ស្តាំ) និង ស៊ីនហ្សូ អាបេ (ឆ្វេង) ក្នុងកិច្ចប្រជុំមួយនាពេលកន្លងទៅ។ AFP
ក្រុងតូក្យូ៖ នាយករដ្ឋមន្ត្រីជប៉ុនលោក ស៊ីនហ្សូ អាបេ បានថ្លែងកាលពីថ្ងៃចន្ទថា ប្រទេស ជប៉ុន កំពុងពិចារណាពីការអញ្ជើញប្រធានាធិបតីអ៊ីរ៉ង់លោក ហាស្សាន រូហានី ឲ្យមកបំពេញទស្សនកិច្ចផ្លូវរដ្ឋ ខណៈប្រព័ន្ធផ្សព្វផ្សាយប្រចាំតំបន់បានរាយការណ៍ថា ដំណើរទស្សនកិច្ចនោះ ទំនងជាកើតឡើងនៅក្នុងខែនេះ។
ប្រទេស ជប៉ុន កំពុងព្យាយាមបង្កើតលទ្ធភាពជាតួនាទីសម្របសម្រួល ខណៈភាពតានតឹងបានកើនឡើងរវាងសម្ព័ន្ធមិត្តក្រុងវ៉ាស៊ីនតោនរបស់ខ្លួន និងក្រុងតេអេរ៉ង់។
ប្រព័ន្ធផ្សព្វផ្សាយប្រចាំតំបន់បានរាយការណ៍កាលពីប៉ុន្មានថ្ងៃថ្មីៗនេះថា លោក រូហានី ទំនងជានឹងធ្វើទស្សនកិច្ចទៅកាន់ទីក្រុងតូក្យូនៅថ្ងៃទី ២០ ខែធ្នូ ដោយការរាយការណ៍ខ្លះនិយាយថា ក្រុងវ៉ាស៊ីនតោនបានផ្តល់ភ្លើងខៀវដល់ដំណើរទស្សនកិច្ចនោះ។
លោក ស៊ីនហ្សូ អាបេ បានថ្លែងនៅឯសន្និសីទសារព័ត៌មានមួយ ដែលបានធ្វើឡើងនៅពេលបញ្ចប់កិច្ចប្រជុំសភានៅឆ្នាំនេះថា៖ «ទស្សនកិច្ចមួយរបស់លោកប្រធានាធិបតី រូហានី មកកាន់ប្រទេស ជប៉ុន បច្ចុប្បន្នគឺស្ថិតនៅក្នុងការពិចារណានៅឡើយ»។
លោក អាបេ បានថ្លែងថា៖ «ប្រទេស ជប៉ុន ដែលមានសម្ព័ន្ធមិត្តមួយជាមួយអាមេរិក ហើយនៅពេលជាមួយគ្នានេះដែរ បានរក្សាការទំនាក់ទំនងយ៉ាងល្អជាមួយប្រទេស អ៊ីរ៉ង់ អស់ពេលជាយូរ ហើយត្រូវតែស្វែងរកមធ្យោបាយដោយខ្លួនឯង»។
លោក អាបេ បានបន្ថែមថា៖ «ខ្ញុំចង់បង្កើតឲ្យមានកិច្ចខិតខំប្រឹងប្រែងការទូតទៅតាមលទ្ធភាព ដើម្បីជួយបន្ធូរបន្ថយភាពតានតឹង និងធ្វើឲ្យស្ថានការណ៍មានស្ថិរភាពនៅក្នុងតំបន់ តាមរយៈការបន្តឲ្យមានកិច្ចពិភាក្សាប្រកបដោយសក្តានុពល»។
ទស្សនកិច្ចនោះ ត្រូវគេអះអាងថា លោក រូហានី នឹងក្លាយជាប្រធានាធិបតីអ៊ីរ៉ង់ដំបូងគេ ដែលមកទស្សនកិច្ចជប៉ុនចាប់តាំងពីឆ្នាំ ២០០០៕ AFP/SK
