.jpg)
កងកម្លាំងអាស៊ែបៃហ្សង់ បាញ់កាំភ្លើងធំទៅលើមូលដ្ឋានយោធាអាមេនី។ AFP
ក្រុងយ៉េរ៉េវ៉ាន់៖ នាយករដ្ឋមន្ត្រីអាមេនី លោក នីកូល ប៉ាស្ស៊ីនយ៉ាន់ កាលពីថ្ងៃពុធ បានទាត់ចោលការដោះស្រាយជម្លោះតាមការទូតមួយ ជាមួយប្រទេសអាស៊ែបៃហ្សង់ ជុំវិញតំបន់ណាហ្គូរណូ និងការ៉ាបាក់ហ៍ ដែលបានជំរុញឱ្យមានកិច្ចខិតខំប្រឹងប្រែងនានារបស់ប្រទេសមហាអំណាចពិភពលោកមួយចំនួន ដើម្បីធានាឱ្យមានបទឈប់បាញ់យូរអង្វែងមួយរបស់ប្រទេសទាំង ២ នេះ។
មនុស្សរាប់រយនាក់បានស្លាប់ នៅក្នុងការផ្ទុះប្រយុទ្ធគ្នាចុងក្រោយបំផុតនៅតំបន់ការ៉ាបាក់ហ៍ ដែលជាតំបន់មួយរបស់ប្រទេសអាស៊ែបៃហ្សង់ តាំងពីយូរបានគ្រប់គ្រងដោយក្រុមបំបែកខ្លួនអាមេនី។
លោក ប៉ាស្ស៊ីនយ៉ាន់ បានថ្លែងនៅក្នុងសារវីដេអូមួយ នៅលើគេហទំព័រហ្វេសប៊ុកថា ជម្លោះតំបន់ការ៉ាបាក់ហ៍ «នឹងមិនមែនជាដំណោះស្រាយការទូតមួយ សម្រាប់ពេលយូរអង្វែងនោះទេ» ដោយបានស្នើឱ្យប្រជាជនអាមេនីត្រូវស្ម័គ្រចិត្ត ដើម្បីប្រយុទ្ធនៅសមរភូមិជួរមុខតទៅទៀត។
លោកបានថ្លែងថា៖ «ការធ្វើសង្គ្រាម គឺមានឈ្នះមានចាញ់ និងមានការបាត់បង់ជីវិត»។
លោកបានថ្លែងថា ការចរចាស្តីពីស្ថានការណ៍នៅតំបន់ការ៉ាបាក់ហ៍ បច្ចុប្បន្នគឺគ្មានន័យ ដោយបានចោទប្រកាន់ប្រទេសអាស៊ែបៃហ្សង់ ពីបទមិនចង់ដោះស្រាយបញ្ហាតាមការសម្របសម្រួលនោះ។
លោក ហ៊ិកម៉េត ហាជីយ៉េវ ជាទីប្រឹក្សារបស់ប្រធានាធិបតីអាស៊ែបៃហ្សង់ លោក អ៊ីល-ហាមអាលីយ៉េវ បានថ្លែងថា ការអត្ថាធិប្បាយរបស់លោក ប៉ាស្ស៊ីនយ៉ាន់ «មិនចង់ដោះស្រាយជម្លោះទេ»៕ AFP/SK
