កាលពីថ្ងៃពុធ ទី ៧ មេសា សហរដ្ឋអាមេរិកបានរំលឹកចិនទាក់ទងនឹងសកម្មភាពរបស់ពួកគេនៅតំបន់សមុទ្រចិនខាងត្បូងនាពេលបច្ចុប្បន្ន។
អ្នកនាំពាក្យក្រសួងការបរទេសលោក Ned Price បាននិយាយថា៖ «ការវាយប្រហារដោយអាវុធប្រឆាំងនឹងកងកម្លាំងប្រដាប់អាវុធនាវាសាធារណៈ ឬយន្ដហោះរបស់ហ្វីលីពីននៅក្នុងមហាសមុទ្រប៉ាស៊ីហ្វិក រួមទាំងនៅសមុទ្រចិនខាងត្បូងធ្វើឱ្យយើងមានកាតព្វកិច្ចទៅលើរឿងនេះដោយផ្អែកលើសន្ធិសញ្ញាការពារជាតិរវាងសហរដ្ឋអាមេរិកនិងហ្វីលីពីន»។ នេះបើយោងតាមការរាយការណ៍របស់សារព័ត៌មានសិង្ហបុរី Channel News Asia។
នាវាចិនជាង ២០០ គ្រឿង ត្រូវបានគេប្រទះឃើញដំបូងនៅថ្ងៃទី ៧ ខែមីនា នៅឯ Whitsun Reef ដែលមានចម្ងាយប្រហែល ៣២០ គីឡូម៉ែត្រភាគខាងលិចនៃកោះ Palawan ក្នុងសមុទ្រចិនខាងត្បូង។ ប្រទេសហ្វីលីពីន បាននិយាយថា នាវាចិនបានចូលក្នុងតំបន់សេដ្ឋកិច្ចផ្តាច់មុខរបស់ខ្លួនដោយខុសច្បាប់ ហើយអំពាវនាវឱ្យនាវាចិនចាកចេញពីតំបន់នោះ។ ប៉ុន្តែប្រទេសចិនបដិសេធការអំពាវនាវជាច្រើនសប្តាហ៍មកហើយ។ ក្រៅពីភាពតានតឹងជាមួយប្រទេសហ្វីលីពីន ភាពតានតឹងរវាងកោះតៃវ៉ាន់ និងប្រទេសចិន បានកើនឡើងដោយមានការរាយការណ៍ថាយន្តហោះចំនួន ១៥ គ្រឿងទៀតរបស់ចិនដីគោកបានឆ្លងចូលតំបន់ការពារដែនអាកាសរបស់កោះនោះ៕