ក្រុងវ៉ាស៊ីនតោន៖ អាមេរិកបានថ្លែងកាលពីថ្ងៃអង្គារថា ខ្លួនបានទទួលសារជិត ២ ម៉ឺនដងពីប្រទេស អ៊ីរ៉ង់ ជុំវិញការតវ៉ានានា នៅក្នុងនោះមានទាំងរូបថត និងវីដេអូ ក្រោយពីធ្វើការអំពាវនាវឲ្យក្រុមបាតុករប្រឆាំងទៅនឹងការរឹតត្បិតទៅលើការប្រើប្រាស់អ៊ីនធឺណិត។
រដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ បានឈរនៅលើវេទិកានៅពីមុខរូបថតនៃផ្លូវដែលមានភ្លើងឆេះយ៉ាងសន្ធោសន្ធៅនោះ រយៈពេល ៤ ថ្ងៃ ក្រោយពីលោកបានស្នើឲ្យប្រជាជនអ៊ីរ៉ង់បញ្ជូនព័ត៌មានមកឲ្យខ្លួន ដូច្នេះអាមេរិកអាច «លាតត្រដាងភ័ស្តុតាង និងការដាក់ទណ្ឌកម្មចំពោះការរំលោភបំពានទាំងនោះ»។
លោក ប៉ុមប៉េអូ បានថ្លែងប្រាប់ក្រុមអ្នកកាសែតថា៖ «យើងបានទទួលសារជិត ២ ម៉ឺនដង នៅក្នុងនោះមានទាំងវីដេអូ រូបថត និងកំណត់ហេតុរំលោភសិទ្ធិមនុស្សរបស់របបអ៊ីរ៉ង់ តាមរយៈប្រព័ន្ធផ្ញើសារតេឡេក្រាម» ដោយនិយាយសំដៅទៅលើប្រព័ន្ធផ្ញើសារសម្ងាត់។
លោក ប៉ុមប៉េអូ បានថ្លែងថា៖ «ចំពោះប្រជាជនអ៊ីរ៉ង់ដ៏អង់អាចក្លាហាន ដែលបានបដិសេធមិនព្រមសំងំនៅស្ងៀមជិត ៤០ ឆ្នាំ អំពីការរំលោភសិទ្ធិមនុស្សរបស់របបកំពុងគ្រប់គ្រងអំណាចនោះ ខ្ញុំនិយាយសាមញ្ញថា៖ «អាមេរិកទទួលសារពីអ្នកហើយ»៕ AFP/SK