.jpg)
ក្រុមសកម្មជនកូរ៉េខាងត្បូងកាន់បដាបង្ហាញរូបជំនួបត្រាំ-គីម ជុងអ៊ុន (ឆ្វេង) និងសមយុទ្ធយោធារួមកូរ៉េខាងត្បូង-អាមេរិក (ស្តាំ)។ AFP
ក្រុងសេអ៊ូលៈ កងទ័ពអាមេរិក និងកូរ៉េខាងត្បូង បានបញ្ជាក់កាលពីថ្ងៃអង្គារថា ពួកគេបានប្រកាសផ្អាកសមយុទ្ធយោធា បន្ទាប់ពីប្រធានាធិបតីដូណាល់ ត្រាំ បានសន្យាថា នឹងផ្អាកសមយុទ្ធនេះក្រោយពីជំនួបជាមួយលោកគីម ជុងអ៊ុន។
ក្រុងសេអ៊ូល ដែលមានកងទ័ព អាមេរិកឈរជើងរាប់ម៉ឺននាក់លើទឹកដីខ្លួន ដើម្បីជួយការពារខ្លួនពីកូរ៉េខាងជើងនោះ បានថ្លែងថា ការផ្អាកនេះនឹងអាចប៉ះពាល់យ៉ាងខ្លាំងលើសមយុទ្ធ Ulchi Freedom Guardian ដែលគ្រោងនឹងធ្វើនៅក្នុងខែសីហាខាងមុខនេះ។
ក្រសួងការពារជាតិកូរ៉េខាងត្បូង បានឲ្យដឹងថា៖ «កូរ៉េខាងត្បូង និងអាមេរិកមានគម្រោងនឹងបន្តកិច្ចពិភាក្សាអំពីវិធានការជាច្រើនទៀត»។ ក្រសួងនេះបានបន្ថែមទៀតថា៖ «មិនមានការសម្រេចចិត្តណាមួយ ត្រូវព្រមព្រៀងគ្នា ដើម្បីបន្តរៀបចំសមយុទ្ធយោធានោះទេ»។
កងទ័ពអាមេរិកប្រហែល ១៧៥០០ នាក់ ត្រូវបានរៀបចំឲ្យចូលរួមក្នុង សមយុទ្ធយោធា Freedom Guardian នេះ។
អ្នកនាំពាក្យមន្ទីរបញ្ចកោណ លោកស្រី Dana White បានថ្លែងបញ្ជាក់អំពីការផ្អាកសមយុទ្ធយោធានោះថា៖ «យើងកំពុងតែជួយសម្របសម្រួលសកម្មភាពបន្ថែមផ្សេងៗទៀត។ មិនមានការសម្រេចចិត្តណាមួយ អំពី សមយុទ្ធយោធាជាថ្មី ត្រូវបានធ្វើឡើងនោះទេ»។ «ការផ្អាកនេះនឹងមិនជះឥទ្ធិពលដល់សមយុទ្ធប៉ាស៊ីហ្វិកដែលនឹងត្រូវរៀបចំនៅក្រៅឧបទ្វីបកូរ៉េនោះទេ»។
អ្នកស្រី White បានថ្លែងថា រដ្ឋមន្រ្តីការពារជាតិអាមេរិកលោក ជីម ម៉ាធីស រដ្ឋមន្រ្តីក្រសួងការបរទេសលោក Mike Pompeo និងអ្នកជំនួយការសន្តិសុខលោក John Bolton នឹងត្រូវជួបគ្នានៅក្នុងសប្ដាហ៍នេះ នៅឯមន្ទីរបញ្ចកោណដើម្បីពិភាក្សាអំពីបញ្ហានេះ។
កាលពីសប្ដាហ៍មុន លោកត្រាំ បានថ្លែងថា អាមេរិកនឹងផ្អាកសមយុទ្ធយោធា ជាមួយកូរ៉េខាងត្បូង ដែលជាសម្ព័ន្ធមិត្តរបស់ខ្លួន ដោយមិនបញ្ជាក់ឲ្យច្បាស់ថា ការផ្អាកនោះនឹងត្រូវចាប់ផ្ដើមនៅពេលណា។
មេដឹកនាំអាមេរិក បានភ្ញាក់ផ្អើល តាមរយៈការពិពណ៌នាថា សមយុទ្ធយោធាជា «ទង្វើបង្កហេតុ» ដែល ពាក្យនេះត្រូវបានប្រើប្រាស់ដោយកូរ៉េខាងជើង។
កងទ័ពអាមេរិក និងកូរ៉េខាងត្បូងបានធ្វើការហ្វឹកហាត់ជាមួយគ្នាជាច្រើនឆ្នាំមកហើយ ហើយកងកម្លាំងទាំងនោះ បានធ្វើការហាត់សមគ្រប់បែបយ៉ាង ចាប់តាំងពីការចូលសំចតនៅនឹងឆ្នេរ រហូតដល់ការទប់ទល់ជាមួយនឹងការវាយប្រហាររបស់ប្រទេសកូរ៉េខាងជើងផង៕
