.jpg)
វ៉ាក់សាំង Covid-19 ផលិតដោយក្រុមហ៊ុន Pfizer និង BioNTech ដែលនៅរង់ចំាការអនុញ្ញាតឱ្យប្រើពី រដ្ឋបាលម្ហូបអាហារ និងឱសថអាមេរិក (FDA)។ រូបថត AFP
កាលពីថ្ងៃអង្គារ ទី ៨ ធ្នូ រដ្ឋបាលម្ហូបអាហារ និងឱសថអាមេរិក (FDA) បានចុះផ្សាយឯកសារនៃការវិភាគទិន្នន័យការសាកល្បងដំណាក់កាលទី៣ នៃវ៉ាក់សាំង Covid-19 ផលិតដោយក្រុមហ៊ុន Pfizer និង BioNTech ដែលបង្ហាញថា មានប្រសិទ្ធភាពល្អ និងមិនមានបញ្ហាសុវត្ថិភាពទេ។ ការចេញផ្សាយនេះ បានធ្វើមុនកិច្ចប្រជុំនៃគណៈកម្មាធិការពិគ្រោះយោបល់របស់ FDA នៅថ្ងៃព្រហស្បតិ៍ ដែលនឹងពិភាក្សាគ្នាថា តើត្រូវធ្វើការអនុញ្ញាតឱ្យប្រើប្រាស់បន្ទាន់ឬអត់?
កាលពីចុងខែវិច្ឆិកា ក្រុមហ៊ុន Pfizer បានឱ្យដឹងថា វ៉ាក់សាំងរបស់ខ្លួនគឺមានប្រសិទ្ធភាព ៩៥% និងមិនមានផលប៉ះពាល់ធ្ងន់ធ្ងរទេក្រោយពីការចាក់ចំនួន ២ ដូស ហើយបានស្នើសុំការអនុញ្ញាតប្រើប្រាស់បន្ទាន់។ ឯកសាររបស់ FDA បានបញ្ជាក់ពីប្រសិទ្ធភាពនៃវ៉ាក់សាំងនេះ គឺពិតជា ៩៥% ហើយបន្ថែមទៀតថា ការចាក់វ៉ាក់សាំងនេះត្រឹមតែ ១ ដូសអាចផ្ដល់ប្រសិទ្ធភាព ៨៩% តែមិនច្បាស់ថា អាចការពារបានរយៈពេលយូរ ឬអត់នោះទេ។ ផលប៉ះពាល់ទូទៅបំផុតដែលបានជួបប្រទះដោយអ្នកដែលបានចាក់វ៉ាក់សាំង គឺឈឺចាប់ឡើងក្រហម ឬហើម នៅកន្លែងចាក់(ជាទូទៅគឺដៃ) ក្រោយមកអមដោយភាពអស់កម្លាំង ឈឺក្បាល និងឈឺសាច់ដុំរយៈពេលខ្លី។
ក្នុងការសាកល្បងវ៉ាក់សាំងនេះមានជនស្ម័គ្រចិត្តចំនួន ៦ នាក់ក្នុងចំណោម ៤៣ ៤៤៨ នាក់ (០,០០១%) បានស្លាប់ ដែល ៤ រូប គឺបានទទួល Placebo (មិនបានទទួលវ៉ាក់សាំង) និង ២ រូបទៀតបានទទួលវ៉ាក់សាំង។
តែការស្លាប់របស់ជនស្ម័គ្រចិត្តទទួលវ៉ាក់សាំង គឺត្រូវបានសន្និដ្ឋានថា មិនទាក់ទងនឹងវ៉ាក់សាំងទេ ដោយជនទី១ បានស្លាប់ដោយសារការគាំងបេះដូង ៦២ ថ្ងៃ ក្រោយទទួលបានវ៉ាក់សាំងដូសទី២ និងជនទី២ បានស្លាប់ដោយសារជំងឺស្ទះសរសៃឈាមបេះដូង ៣ ថ្ងៃ ក្រោយពីបានទទួលដូសទី១ ហើយជនទាំង ២ នេះ គឺមានអាយុលើសពី ៥៥ ឆ្នាំទៅហើយ។ បើទោះបីគេសន្និដ្ឋានថា ការស្លាប់នេះ គឺមិនទាក់ទងនឹងវ៉ាក់សាំងក៏ដោយ ក៏គេត្រូវតែរាយការណ៍ពីករណីស្លាប់នេះ ដើម្បីរក្សាតម្លាភាពនៃការសាកល្បងរបស់ពួកគេ។
មកដល់ពេលនេះ FDA មិនទាន់បានផ្ដល់ការអនុញ្ញាតឱ្យប្រើប្រាស់វ៉ាក់សាំងនេះនៅឡើយទេ តែក្នុងការប្រកាសរបស់ពួកគេបានសរសេរថា លទ្ធផលនៃការសាកល្បង គឺស្របជាមួយនឹងអនុសាសន៍ដែលមានចែងនៅក្នុងការណែនាំអំពីការប្រើប្រាស់បន្ទាន់របស់ពួកគេ។
ជាធម្មតា FDA ធ្វើតាមអនុសាសន៍គណៈកម្មាធិការពិគ្រោះយោបល់របស់ខ្លួន បើទោះបីជាមិនមានការតម្រូវឱ្យធ្វើតាមក៏ដោយ។ គេមិនច្បាស់ថាតើ FDA នឹងចំណាយរយៈពេលប៉ុន្មានថ្ងៃ ឬសប្ដាហ៍ ដើម្បីធ្វើការសម្រេចចិត្ត ប៉ុន្តែរដ្ឋជាច្រើន គឺកំពុងត្រៀមសម្រាប់ចែកចាយ និងចាក់វ៉ាក់សាំងនៅពាក់កណ្ដាលខែធ្នូនេះ។
គួរបញ្ជាក់ផងដែរថា ការអនុញ្ញាតឱ្យប្រើប្រាស់បន្ទាន់នេះ គឺមានកម្រិតត្រឹមអាយុ ១៦ ឆ្នាំ ឡើងទៅ ដោយសារការសាកល្បងដំណាក់កាលទី៣ គឺមិនមានការចូលរួមពីជនស្ម័គ្រចិត្តអាយុក្រោម ១៦ ឆ្នាំទេ ហើយក៏មិនមានការចូលរួមពីស្ត្រីមានផ្ទៃពោះដែរ។
យ៉ាងណាមិញ កាលពីថ្ងៃទី ២ ធ្នូ ចក្រភពអង់គ្លេសបានធ្វើការអនុញ្ញាតប្រើប្រាស់វ៉ាក់សាំងនេះជាបន្ទាន់រួចហើយ ដោយមានស្ត្រីអាយុ ៩០ ឆ្នាំទទួលវ៉ាក់សាំងមុន គេនៅថ្ងៃអង្គារទី៨ ហើយរដ្ឋាភិបាលអង់គ្លេសមានផែនការចែកចាយវ៉ាក់សាំងចំនួន ៨០០ ០០០ ដូសក្នុងរយៈពេល ១ សប្ដាហ៍។
រីឯប្រទេសអ៊ីស្រាអែល វិញ បានប្រកាសថា ខ្លួនទទួលវ៉ាក់សាំង Pfizer/BioNTech ចំនួន ១១០ ០០០ ដូសនៅថ្ងៃពុធ ទី ៩ ហើយនឹងចាក់ជាខ្នាតតូចសិន ហើយនឹងចាប់ផ្ដើមចាក់ក្នុងសហគមន៍ជាទ្រង់ទ្រាយធំភ្លាមៗបន្ទាប់ពីបុណ្យណូអែល។
រដ្ឋាភិបាលអាមេរិកបានបញ្ជាទិញវ៉ាក់សាំងនេះចំនួន ១០០ លានដូស ក្នុងតម្លៃ ១,៩៥ ពាន់លានដុល្លារ ហើយនៅរង់ចាំការអនុញ្ញាតឱ្យប្រើជាបន្ទាន់ពី FDA ប៉ុណ្ណោះ។ ក្រៅពីវ៉ាក់សាំង Pfizer/BioNTech វ៉ាក់សាំងរបស់ក្រុមហ៊ុន Moderna ក៏បានស្នើការអនុញ្ញាតប្រើប្រាស់បន្ទាន់ផងដែរ ហើយរដ្ឋាភិបាលអាមេរិកក៏បានបញ្ជាទិញយកវ៉ាក់សាំងនេះចំនួន ១០០ លានដូសផងដែរ ក្នុងតម្លៃ ១,៥ ពាន់លានដុល្លារ។ បើសិនវ៉ាក់សាំងទាំងនេះត្រូវបានអនុញ្ញាតឱ្យប្រើប្រាស់នៅសហរដ្ឋអាមេរិកក៏ដោយ ក៏នៅតែត្រូវបន្តការសាកល្បងក្នុងដំណាក់កាលទី៣ ដដែល ដើម្បីធានាសុវត្ថិភាព៕
