ក្រុងវ៉ាស៊ីនតោនៈ ប្រធានាធិបតីអាមេរិកលោក ដូណាល់ ត្រាំ កាលពីថ្ងៃសៅរ៍ បានប្តេជា្តវាយប្រហារអ៊ីរ៉ង់ដោយទណ្ឌកម្មថ្មីធំជាងមុន ខណៈដែល ក្រុងតេអេរ៉ង់ បានព្រមានក្រុងវ៉ាស៊ីនតោនថា ការវាយប្រហារណាមួយ នឹងត្រូវបានមើលឃើញថា ផលប្រយោជន៍របស់ខ្លួននៅទូទាំងមជ្ឈិមបូព៌ានោះ នឹងឆាបឆះដោយភ្លើងសង្គ្រាមជាក់ជាមិនខាន។
សង្គ្រាមពាក្យសម្តី បានផ្ទុះឡើង ក្រោយពីលោក ដូណាល់ ត្រាំ បានសម្រេចចិត្តមិនឲ្យមានសកម្មភាពយោធាប្រឆាំងអ៊ីរ៉ង់ ជាការឆ្លើយតបទៅនឹងការបាញ់ទម្លាក់យន្តហោះដ្រូនឈ្លបយកការណ៍របស់ខ្លួនដោយអ៊ីរ៉ង់នោះ។
ឧប្បត្តិហេតុ ដែលកើតឡើងក្រោយពីមានការបាញ់ទៅលើនាវាដឹកប្រេងជាច្រើនគ្រឿងជាបន្តបន្ទាប់ នៅតាមផ្លូវដឹកជញ្ជូនចេញពីឈូងសមុទ្រ ដែលអាមេរិក បានរិះគន់ទៅលើអ៊ីរ៉ង់ បានបង្កឲ្យមានទំនាក់ទំនងតានតឹងកាន់តែខ្លាំងឡើងរវាងប្រទេសទាំង ២។
អ៊ីរ៉ង់ បដិសេធមិនទទួលខុសត្រូវចំពោះការវាយប្រហារណាមួយឡើយ។
លោក ដូណាល់ ត្រាំ ដែលកាលពីថ្ងៃសៅរ៍ បានកោះប្រជុំជាមួយក្រុមទីប្រឹក្សារបស់លោកនៅឯមូលដ្ឋានយោធា Camp David បានថ្លែងប្រាប់ទៅកាន់ក្រុមអ្នកកាសែតជាលើកដំបូងថា លោកចង់ធ្វើជា «មិត្តដ៏ល្អបំផុត» របស់អ៊ីរ៉ង់ ប្រសិនបើប្រទេសមួយនេះបានព្រមព្រៀងលុបចោលកម្មវិធីអាវុធនុយក្លេអ៊ែរនោះ។
លោក ត្រាំ បានថ្លែងប្រាប់ក្រុមអ្នកកាសែតថា៖ «នៅពេលដែលពួកគេ បានយល់ព្រមដោះស្រាយបញ្ហានោះ ពួកគេនឹងទទួលបានទ្រព្យសម្បត្តិជាច្រើននៅក្នុងប្រទេស។ ពួកគេនឹងសប្បាយចិត្តជាក់ជាមិនខាន ហើយខ្ញុំនឹងក្លាយទៅជាមិត្តដ៏ល្អបំផុតរបស់ពួកគេ»។
ប្រទេស អ៊ីរ៉ង់ បានបដិសេធមិនព្រមបោះបង់ចោលកម្មវិធីនុយក្លេអ៊ែរទេ ហើយបានថ្លែងថា កម្មវិធីនុយក្លេអ៊ែររបស់ខ្លួនគឺធ្វើឡើង ដើម្បីគោលបំណងស៊ីវិលតែប៉ុណ្ណោះ។
កិច្ចព្រមព្រៀងអន្តរជាតិ បានធ្វើឡើងដោយក្រុងតេអេរ៉ង់ និងបណ្តាប្រទេសមហាអំណាចពិភពលោកកាលពីឆ្នាំ ២០១៥ ដើម្បីទប់ទល់មហិច្ឆតានុយក្លេអ៊ែរអ៊ីរ៉ង់ជាថ្នូរនឹង ការដកទណ្ឌកម្មនោះ។
ប៉ុន្តែលោក ដូណាល់ ត្រាំ បានបោះបង់ចោលកិច្ចព្រមព្រៀងនោះជាង ១ ឆ្នាំ ហើយនឹងបានដាក់ទណ្ឌកម្មសេដ្ឋកិច្ចយ៉ាងធ្ងន់ធ្ងរ ដើម្បីរាំងខ្ទប់ការលក់ប្រេងរបស់អ៊ីរ៉ង់ និងធ្វើឲ្យសេដ្ឋកិច្ចរបស់ខ្លួនជាប់គាំង បច្ចុប្បន្ន លោក ត្រាំ មានផែនការចង់ពង្រីកការដាក់ទណ្ឌកម្មឲ្យបានច្រើនទៅលើអ៊ីរ៉ង់បន្ថែមទៀត៕ AFP/SK