កាលពីថ្ងៃទី ៥ ធ្នូ រដ្ឋបាលក្រុងវ៉ាស៊ីនតោនបានលុបចោលកម្មវិធីផ្លាស់ប្តូរវប្បធម៌ចំនួន ៥ ជាមួយប្រទេសចិន ដោយអះអាងថា ចិនយកឱកាសនេះ ដើម្បីឃោសនាប្រទេសខ្លួន ហើយមិនបានផ្ដល់ផលប្រយោជន៍អ្វីដល់សហរដ្ឋអាមេរិកឡើយ។
ការសម្រេចដូចនេះ ធ្វើឡើងក្រោយការប្រកាសរឹតត្បិតទិដ្ឋាការថ្មីដោយទីក្រុងវ៉ាស៊ីនតោនដោយកំណត់ការស្នាក់របស់សមាជិកនៃបក្សកុម្មុយនីស្តចិននៅអាមេរិក និងជាសញ្ញានៃការរង្គោះរង្គើបន្ថែមទៀតនៃទំនាក់ទំនងជាមួយទីក្រុងប៉េកាំងនៅក្នុងសប្តាហ៍ចុងក្រោយនៃពេលវេលារបស់ប្រធានាធិបតី ដូណាល់ ត្រាំ ក្នុងការកាន់តំណែង។
រដ្ឋមន្រ្តីក្រសួងការបរទេសលោក Mike Pompeo បាននិយាយថា កម្មវិធីផ្លាស់ប្តូរវប្បធម៌ដែលលោកបានបញ្ចប់ នេះត្រូវបានផ្ដល់ថវិកា និងដំណើរការដោយរដ្ឋាភិបាលចិនពេញទំហឹងដើម្បីធ្វើជា «ឧបករណ៍ឃោសនាអំណាចស្រាលមួយ»។ លោកបាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃសុក្រថា ពួកគេបាន «ឱ្យអ្នកដែលជាមន្រ្តីគណបក្សកុម្មុយនីស្តចិនមកចូលរួម មិនមែនប្រជាជនចិនឡើយ ហើយប្រជាជនទាំងនោះមិនមានសេរីភាពក្នុងការបញ្ចេញមតិ និងការជួបជុំឡើយ»។
ក្រសួងការបរទេសអាមេរិកបានលុបចោលកម្មវិធីផ្លាស់ប្ដូរវប្បធម៌ចំនួន ៥ រួមមាន កម្មវិធីអ្នកធ្វើគោលនយោបាយទស្សនកិច្ចអប់រំចិន កម្មវិធីទស្សនកិច្ចមិត្តភាពសហរដ្ឋអាមេរិក-ចិន កម្មវិធីផ្លាស់ប្តូរភាពជាអ្នកដឹកនាំសហរដ្ឋអាមេរិក-ចិន កម្មវិធីផ្លាស់ប្តូរប៉ាស៊ីហ្វិកសហរដ្ឋអាមេរិក-ចិន និងកម្មវិធីអប់រំ និងវប្បធម៌ហុងកុងផងដែរ។
កម្មវិធីនីមួយៗ អនុញ្ញាតឱ្យមន្រ្តីសហរដ្ឋអាមេរិកធ្វើដំណើរទៅកាន់ប្រទេសចិន ដោយថ្លៃចំណាយទាំងអស់ជាការរ៉ាប់រងរបស់ទីក្រុងប៉េកាំង។
លោក Pompeo បានមានប្រសាសន៍ថា សហរដ្ឋអាមេរិកសូមស្វាគមន៍ចំពោះ «ការផ្លាស់ប្តូរកម្មវិធីវប្បធម៌ទៅវិញទៅមក និងដោយយុត្តិធម៌» ជាមួយប្រទេសចិន ហើយកម្មវិធីដែលមានផលប្រយោជន៍ទៅវិញទៅមកនឹងនៅរក្សាទុកដដែល។
ក្រសួងការបរទេសបាននិយាយនៅថ្ងៃសុក្រថា ខ្លួននឹងបដិសេធទិដ្ឋាការដល់ពលរដ្ឋចិនដែលមានជាប់ទាក់ទងនឹងប្រតិបត្ដិការដែលមានឥទ្ធិពលនៅបរទេសដែលពាក់ព័ន្ធនឹងអំពើហិង្សា និងមធ្យោបាយបំភិតបំភ័យផ្សេងៗ។ ក្នុងនោះ រដ្ឋមន្រ្តីក្រសួងការបរទេសលោក Mike Pompeoបាននិយាយថា ការរឹតត្បិតនេះ នឹងអនុវត្តចំពោះមន្ត្រីបក្សកុម្មុយនីស្តចិន ឬនរណាម្នាក់ផ្សេងទៀត ដែលចូលរួមក្នុងការឃោសនា ឬផ្ដល់ឥទ្ធិពលយុទ្ធនាការ ដែលមានទំនាក់ទំនងជាមួយនាយកដ្ឋានរណសិរ្សរួបរួម (United Front Work Department) ប៉ុណ្ណោះ។
រណសិរ្សរួបរួមនេះមានការពាក់ព័ន្ធទៅនឹងកិច្ចការងារដាក់សម្ពាធលើប្រជាជននៅក្រៅព្រំដែនប្រទេសចិន ដែលប្រជាជនទាំងនេះ ក៏មានការព្រួយបារម្ភអំពីការរំលោភសិទ្ធិមនុស្សនៅក្នុងតំបន់ អ៊ូហ្គួរ ទីបេ និងតំបន់ផ្សេងទៀតផងដែរ។
ពលរដ្ឋចិននឹងត្រូវគេបដិសេធមិនឱ្យទិដ្ឋាការចូលសហរដ្ឋអាមេរិកទេ ប្រសិនបើពួកគេមានពាក់ព័ន្ធនឹងរណសិរ្សរួបរួម ដោយប្រើអំពើហិង្សាការគំរាមកំហែង ឬមធ្យោបាយផ្សេងទៀត ក្នុងន័យដាក់សម្ពាធប្រឆាំងនឹងសហគមន៍ចិនក្រៅប្រទេស អ្នកសិក្សា ឬក្រុមសង្គមស៊ីវិលនៅសហរដ្ឋអាមេរិក ឬកន្លែងផ្សេងទៀតដើម្បីជំរុញ «កម្លាំងកុម្មុយនីស្តចិន និងផ្សព្វផ្សាយគោលនយោបាយរបស់ខ្លួន»។ នេះបើយោងតាមសេចក្តីពណ៌នាដាច់ដោយឡែកផ្សេងទៀតអំពី វិធានការរបស់ក្រសួងការបរទេសអាមេរិក។
យ៉ាងណាមិញនៅមិនទាន់មានការកំណត់ច្បាស់លាស់ទេថា តើមានមនុស្សប៉ុន្មាននាក់អាចត្រូវបានប៉ះពាល់ពេលចាប់ផ្ដើមការរឹតត្បិតថ្មីនេះ។
ការផ្លាស់ប្តូរនេះ បានកើតឡើងក្នុងសប្តាហ៍ដូចគ្នាដែលសហរដ្ឋអាមេរិក បានប្រកាសផែនការកំណត់ពេលវេលាថ្មីលើទិដ្ឋាការសម្រាប់សមាជិកនៃបក្សកុម្មុយនីស្តចិន និងក្រុមគ្រួសាររបស់ពួកគេដោយកាត់បន្ថយពេលវេលាដែលឯកសារធ្វើដំណើរមានសុពលភាពពី ១០ ឆ្នាំទៅ ១ ខែ។
ប្រទេសចិន បានឆ្លើយតបចំពោះការរឹតត្បិតទាំងនោះដោយចោទប្រកាន់រដ្ឋាភិបាលសហរដ្ឋអាមេរិកពីការ «បង្កើនការដាក់សម្ពាធនយោបាយ»។
អ្នកនាំពាក្យក្រសួងការបរទេស លោកស្រី ហួ ឈុនយីង បាននិយាយកាលពីថ្ងៃព្រហស្បតិ៍ថា ការរឹតត្បិតការធ្វើដំណើរគឺ «មិនត្រូវគ្នានឹងគោលការណ៍របស់អាមេរិកសោះ» ហើយនឹងធ្វើឱ្យខូចមុខមាត់អាមេរិកក្នុងពិភពលោកផងដែរ។
រដ្ឋបាលរបស់លោក Trump បានចាត់វិធានការដាក់ទណ្ឌកម្មផ្សេងៗគ្នាប្រឆាំងទៅនឹងប្រទេសចិន ខណៈដែលជម្លោះនៃប្រទេសទាំង ២ នេះ កាន់តែមានសភាពខ្លាំងឡើងៗលើបញ្ហាសិទ្ធិមនុស្ស ជំងឺរាតត្បាតកូវីដ ១៩ ពាណិជ្ជកម្មបច្ចេកវិទ្យា បញ្ហាតៃវ៉ាន់ និងបញ្ហាជាច្រើនទៀត។ គ្រប់ជំហានរបស់លោក Trump មានគោលបំណងធ្វើយ៉ាងណាធ្វើឱ្យប្រទេសមានការក្រឡាប់ចក្រមុនពេលលោក Joe Biden ក្លាយជាប្រធានាធិបតីនៅថ្ងៃទី ២០ ខែមករា៕