តួកគីបានកោះហៅឯកអគ្គរដ្ឋទូតអាមេរិកប្រចាំនៅទីក្រុងអង់ការ៉ា (Ankara) ទាក់ទងនឹងសេចក្តីថ្លែងការណ៍របស់សហរដ្ឋអាមេរិកស្តីពីការស្លាប់របស់ប្រជាជនតួកគី ១៣ នាក់។
ដំបូងឡើយសហរដ្ឋអាមេរិកបាននិយាយថា ខ្លួននឹងថ្កោលទោសចំពោះការសម្លាប់នេះប្រសិនបើគណបក្សកម្មករ Kurdistan ដែលហៅកាត់ថា PKK ជាអ្នកបណ្តាលឱ្យមានការស្លាប់នេះ។ អាមេរិកមានភាពជាដៃគូជាមួយកងទ័ព Kurd បានធ្វើឱ្យមានការមិនពេញចិត្តពីភាគីតួកគីបន្ទាប់ពីអាមេរិកបានចេញសេចក្តីថ្លែងការណ៍ទាក់ទងនឹងករណីនេះ។
កាលពីថ្ងៃទី ១៤ កុម្ភៈ តួកគី បាននិយាយថា អ្នកប្រយុទ្ធមកពី Kurdistan Workers'' Party (PKK) បានសម្លាប់ជនជាតិតួកគី ១៣ នាក់ រួមទាំងបុគ្គលិកយោធា និងប៉ូលិសតួកគី។ PKK បានស្តីបន្ទោសថា អ្នកស្លាប់ទាំង ១៣ នាក់នោះ បណ្តាលមកពីការវាយឆ្មក់របស់តួកគីតាមអាកាស។
តួកគីបានបើកប្រតិបត្តិការយោធាប្រឆាំងនឹងមូលដ្ឋាន PKK នៅភាគខាងជើងប្រទេសអ៊ីរ៉ាក់ ដែលត្រូវបានរៀបចំឡើងដើម្បីដោះលែងចំណាប់ខ្មាំងទាំង ១៣ នាក់នោះ៕