.jpg)
មេទ័ពម៉ាលី Gouassou Diara (ឆ្វេង) និយាយជាមួយមេទ័ពបារាំងលោក Gauthier កាលពីថ្ងៃទី១ ខែវិច្ឆិកា ឆ្នាំ ២០១៧។ AFP
បុរីញូវយ៉ក: កាលពីថ្ងៃពុធ អាមេរិក បានទាត់ចោលការអំពាវនាវសុំឲ្យមានការជួយគាំទ្រដ៏ខ្លាំងក្លាពីអង្គការសហប្រជាជាតិ (UN) ចំពោះកងកម្លាំងនៅទ្វីបអាហ្រ្វិកខាងលិចដែលកំពុងវាយប្រយុទ្ធប្រឆាំងក្រុមជីហាដ នៅក្នុងតំបន់សាហែលដែលកំពុងមានភាពតានតឹងខ្លាំង។
ដោយទទួលបានការគាំទ្រពីបារាំង ក្រុមប្រទេសទាំង ៥ នៅក្នុងតំបន់រួមមាន ប្រទេស បួគីណាហ្វាសូ ឆាត ម៉ាលី ម៉ូរីតានីញ៉ា និងនីហ្ស៊េ កាលពីឆ្នាំទៅបានឯកភាពគ្នាបង្កើតកងកម្លាំងតំបន់សាហែល G5 និងទទួលបានការសន្យាផ្តល់ជំនួយពីសហគមន៍អន្តរជាតិជាង ៥០០ លានដុល្លារ។
កងទ័ពប្រហែល ៥០០០ នាក់ នឹងត្រូវបានដាក់ពង្រាយនៅក្នុងតំបន់សាហែលដោយមានតួនាទីប្រយុទ្ធប្រឆាំងក្រុមជីហាដ រួមជាមួយប្រតិបត្តិការ Barkhane Operation របស់បារាំង ប៉ុន្តែការដាក់ពង្រាយកងកម្លាំងនេះបានប្រឈមជាមួយការពន្យារពេល ហើយកងកម្លាំងចម្រុះមានការខ្វះខាតគ្រឿងបរិក្ខារបំពាក់។
អគ្គលេខាធិការអង្គការសហប្រជាជាតិ លោក Antonio Guterres បានជំរុញឲ្យក្រុមប្រឹក្សាសន្តិសុខធ្វើការឯកភាពយល់ព្រមចំពោះការផ្តល់ថវិកា ជាទៀងទាត់ប្រចាំឆ្នាំពីអង្គការសហប្រជាជាតិចំពោះកងកម្លាំងនេះ ហើយបារាំងក៏បានលើកឡើងថា មានកិច្ចការជាច្រើនទៀតត្រូវតែអនុវត្តធ្វើដើម្បីជួយគាំទ្រដល់ប្រតិបត្តិការយោធាចម្រុះ។
ខណៈធ្វើការអះអាងគោលជំហររបស់ខ្លួនជាថ្មី អាមេរិកបានបញ្ជាក់ច្បាស់ថា ខ្លួន ប្រឆាំងចំពោះតួនាទីណាមួយ នៃក្រុមប្រឹក្សាសន្តិសុខចំពោះកងកម្លាំងតំបន់សាហែល និងការផ្តល់ថវិកា ដោយផ្ទាល់ពីអង្គការសហប្រជាជាតិ។
អ្នកសម្របសម្រួលនយោបាយអាមេរិក លោក Amy Tachco បានថ្លែងប្រាប់កិច្ចប្រជុំក្រុមប្រឹក្សាសន្តិសុខថា៖ «អាមេរិក នឹងមិនទទួលយកសំណើនៅក្នុងការដំណើរការទៅមុខចំពោះបញ្ហានេះក្នុងក្រុមប្រឹក្សាសន្តិសុខឡើយ»។
នោះគឺជាសារមួយដែលមានគោលដៅចំពោះបារាំងដែលមិនបានបញ្ចុះបញ្ចូល US កាលពីឆ្នាំមុន៕
