ក្រុងវ៉ាស៊ីនតោន៖ ប្រទេសរុស្ស៊ី កាលពីថ្ងៃអង្គារ បានអំពាវនាវឲ្យអាមេរិកធ្វើសំណើ «វិជ្ជមាន» មួយ ខណៈក្រុមប្រទេសមហាអំណាចបានបើកកិច្ចពិភាក្សាអំពីសន្ធិសញ្ញាកាត់បន្ថយអាវុធនុយក្លេអ៊ែរ ដោយបានព្រមានថា ការទទូចរបស់អាមេរិកឲ្យដាក់បញ្ចូលប្រទេសចិននោះ អាចបំផ្លាញកិច្ចខិតខំប្រឹងប្រែងនេះ។
អនុរដ្ឋមន្ត្រីការបរទេសលោក ស៊ើហ្គេយ៍ រីយ៉ាបកូវ នឹងជួបគ្នានៅក្នុងទីក្រុងវីនណា នៅថ្ងៃទី ២២ ខែមិថុនា ជាមួយប្រេសិតពិសេសរបស់អាមេរិក គឺលោក ម៉ារស្សលល៍ ប៊ិលលីងស្លៀ ដើម្បីចាប់ផ្តើមចរចាអំពីសន្ធិសញ្ញា New START ដែលបានផុតកំណត់កាលពីខែកុម្ភៈនោះ ឡើងវិញ។
ប្រធានាធិបតីអាមេរិកលោក ដូណាល់ ត្រាំ បានដើរចេញពីកិច្ចព្រមព្រៀងអន្តរជាតិមួយចំនួន ប៉ុន្តែបានរិះគន់អំពីផលប្រយោជន៍ទូទៅនៅក្នុងការការពារកិច្ចព្រមព្រៀង New-START ដែលតម្រូវឲ្យអាមេរិក និងប្រទេសរុស្ស៊ី កាត់បន្ថយក្បាលគ្រាប់បំពាក់នុយក្លេអ៊ែររបស់ពួកគេ។
ប៉ុន្តែរដ្ឋការរបស់លោក ដូណាល់ ត្រាំ បានថ្លែងថា អ្នកកាន់តំណែងមុនដែលបានចុះកិច្ចព្រមព្រៀង New START ជាកេរដំណែលសម័យសង្គ្រាមត្រជាក់ ដែលត្រូវបានធ្វើការចរចានៅក្រោមការគ្រប់គ្រងរបស់អតីតប្រធានាធិបតី បារ៉ាក់ អូបាម៉ា គួរតែបញ្ចូលប្រទេសចិន ដែលចំនួនអាវុធនុយក្លេអ៊ែរ កាន់តែកើនឡើង ប៉ុន្តែនៅតិចជាងអាវុធនុយក្លេអ៊ែររបស់រុស្ស៊ី និងអាមេរិក។
ដោយបានថ្លែងសុន្ទរកថា ទៅកាន់ក្រុមប្រឹក្សាទំនាក់ទំនងការបរទេសតាមរយៈវីដេអូខុនហ្វើរិន លោក ស៊ើហ្គេយ៍ រីយ៉ាបកូវ បានពិពណ៌នាអំពីឆន្ទៈរបស់អាមេរិក ដើម្បីចាប់ផ្តើមចរចានោះថាជា «ដំណឹងល្អ» ប៉ុន្តែលោកបានថ្លែងថា៖ «លទ្ធផល គឺស្ថិតទៅលើភាគីអាមេរិកជាអ្នកសម្រេច»។
«យើងត្រូវការឮសំឡេងខ្លាំងៗ និងច្បាស់លាស់ ថាតើរដ្ឋការនេះ ចង់បានអ្វី ថាតើខ្លួនបានជឿជាក់លើការចរចាទៅតាមលទ្ធភាព ដើម្បីធ្វើអ្វីមួយវិជ្ជមានដោយរបៀបណា ហើយមិនមែនគ្រាន់តែ ដើម្បីរំលាយចោលសន្ធិសញ្ញាគ្រប់គ្រងអាវុធនុយក្លេអ៊ែរមួយ ឬការសម្របសម្រួល ក្រោយពីមានសន្ធិសញ្ញាមួយផ្សេងទៀតនោះ»។
នៅក្នុងទីក្រុងប៉េកាំង អ្នកនាំពាក្យក្រសួងការបរទេស លោកស្រី ហ៊ួ ឈុនយីង បានថ្លែងថា ប្រទេសចិន «មិនចាប់អារម្មណ៍អំពីការចូលរួម» នៅក្នុងកិច្ចចរចានេះទេ ហើយបានចោទប្រកាន់អាមេរិកពីបទព្យាយាមមិនទទួលខុសត្រូវចំពោះបញ្ហាផ្សេងៗជាច្រើនទៀត»។
លោក ប៊ិលលីងស្លៀ បានសរសេរនៅលើគេហទំព័រធ្វីធើរថា លោកបានជំរុញឲ្យចិនពិចារណាឡើងវិញ។
«ការទទួលបានឋានៈមហាអំណាចដ៏អស្ចារ្យនោះតម្រូវឲ្យមានអាកប្បកិរិយាទទួលខុសត្រូវក្នុងលក្ខណៈជាមហាអំណាច។ គ្មានមហាកំពែងសម្ងាត់ច្រើនបន្ថែមទៀត ជុំវិញការផលិតអាវុធនុយក្លេអ៊ែររបស់ខ្លួននោះទេ។ អាសនៈមួយកំពុងរងប្រទេសចិន នៅក្នុងក្រុងវីយែន»។
លោក រីយ៉ាបកូវ បានបង្ហាញថា ប្រទេសរុស្ស៊ី មិនបានប្រឆាំងអាមេរិកក្នុងការអញ្ជើញប្រទេសចិន ដែលជាសម្ព័ន្ធមិត្តអន្តរជាតិមួយរបស់ក្រុងម៉ូស្គូឲ្យចូលរួមការចរចាទេ ទោះបីជាមានទំនាក់ទំនងប្រវត្តិសាស្ត្រដ៏ស្មុគស្មាញក្តី ប៉ុន្តែសង្ស័យថា ក្រុងប៉េកាំងនឹងយល់ព្រមចំពោះបញ្ហានេះដែរឬទេ?
លោកបានថ្លែងថា៖ «វាមិនទាន់ប្រាកដថា តើប្រទេសចិន នឹងចូលរួមចរចា ឬក៏អត់នោះទេ?»៕ AFP/SK