.jpg)
បុរសម្នាក់ប្រើស្មាតហ្វូន និយាយជាមួយអ្នកជិះលើម៉ូតូ នៅទីក្រុងតេអេរ៉ង់។ AFP
ក្រុងវ៉ាស៊ីនតោន៖ ក្រសួងការបរទេសអាមេរិកកាលពីថ្ងៃសៅរ៍ បានអំពាវនាវឲ្យបណ្តាញសង្គមហ្វេសប៊ុក អ៊ីនស្តាក្រាម និងធ្វីធើរ ផ្អាកដំណើរការគណនីហ្វេសប៊ុករបស់ក្រុមមេដឹកនាំរដ្ឋាភិបាលអ៊ីរ៉ង់ រហូតដល់ក្រុងតេអេរ៉ង់រៀបចំបណ្តាញអ៊ីនធឺណិតនៅទូទាំងប្រទេសហែកហួរដោយកុបកម្មនេះឡើងវិញ។
រដ្ឋាភិបាលអ៊ីរ៉ង់បានបិទអ៊ីនធឺណិតស្ទើរតែទាំងស្រុងជាង ១ សប្តាហ៍ហើយ នៅចំពេលដែលមានការតវ៉ាហិង្សានៅទីក្រុងតេអេរ៉ង់។
លោក ប្រ៊េន ហ៊ុក ជាប្រេសិតពិសេសអាមេរិកប្រចាំនៅប្រទេស អ៊ីរ៉ង់ បានថ្លែងនៅក្នុងបទសម្ភាសមួយជាមួយសារព័ត៌មានប៊្លូមប៊ឺក ដែលបានបង្ហោះនៅលើគណនីធ្វីធើរក្រសួងការបរទេសផ្លូវការថា៖ «ការបិទមិនឲ្យប្រើប្រាស់អ៊ីនធឺណិតនោះ វាគឺជារបបមិនស្មោះត្រង់មួយ»។
«អ៊ីរ៉ង់បានបិទអ៊ីនធឺណិតនោះ ខណៈរដ្ឋាភិបាលរបស់ខ្លួន នៅបន្តការប្រើប្រាស់បណ្តាញសង្គម»។
«ដូច្នេះបញ្ហាមួយក្នុងចំណោមបញ្ហាជាច្រើនដែលយើងកំពុងអំពាវនាវឲ្យក្រុមហ៊ុនបណ្តាញសង្គម ដូចជា ហ្វេសប៊ុក អ៊ីនស្តាក្រាម និងធ្វីធើរត្រូវបិទគណនីហ្វេសប៊ុករបស់មេដឹកនាំកំពូល គឺលោក កាមីនី រដ្ឋមន្ត្រីការបរទេសលោក ហ្សារីហ្វ និងប្រធានាធិបតីលោក ហាស្សាន រូហានី រហូតដល់ពួកគេបានបើកអ៊ីនធឺណិតឲ្យប្រជាជនរបស់ពួកគេប្រើប្រាស់ឡើងវិញ»។
បាតុកម្មបានផ្ទុះឡើងនៅអ៊ីរ៉ង់កាលពីថ្ងៃទី ១៥ ខែវិច្ឆិកា រយៈពេល ២-៣ ម៉ោង ក្រោយពីការប្រកាសសេក្តីសម្រេចចិត្តដំឡើងថ្លៃប្រេងរហូតដល់ ២០០ ភាគរយ៕ AFP/SK
