.jpg)
លោឧត្តមសេនីយ៍អាមេរិក Kenneth F. McKenzie Jr. (ទី៧ ឆ្វេង) និងលោកឧត្តមសេនីយ៍ Fahd bin Turki bin Abdulaziz (ទី៦ ស្តាំ ) មេបញ្ជាការកងទ័ពចម្រុះដឹកនាំដោយអារ៉ាប៊ី សាអ៊ូឌីត នៅយ៉េម៉ែនក្នុងអំឡុងទស្សនកិច្ចមូលដ្ឋានយោធានៅអារ៉ាប៊ី សាអ៊ូឌីត៕ AFP
ក្រុងរីយ៉ាដៈ ក្រសួងការពារជាតិរបស់ព្រះរាជាណាចក្រនេះបានថ្លែងថា អារ៉ាប៊ី សាអ៊ូឌីត បានសម្រេចចិត្តទទួលធ្វើជាម្ចាស់ផ្ទះដល់កងទ័ពអាមេរិក ជាក្នុងវិធានការរួមជាមួយក្រុងវ៉ាស៊ីនតោន ដើម្បីពង្រឹងសន្តិសុខក្នុងតំបន់ ខណៈភាពតានតឹងបានកើនឡើងក្នុងតំបន់ឈូងសមុទ្រនេះ។
អ្នកនាំពាក្យក្រសួងការពារជាតិ ត្រូវបានគេដកស្រង់សម្តីដោយទីភ្នាក់ងារសារព័ត៌មាន SPA របស់រដ្ឋបានឲ្យដឹងថា៖ «ដោយបានពឹងផ្អែកទៅលើកិច្ចសហប្រតិបត្តិការគ្នាទៅវិញទៅមករវាងអារ៉ាប៊ី សាអ៊ូឌីតនិងអាមេរិក និងគោលបំណងរបស់ពួកគេក្នុងការធ្វើឲ្យកិច្ចការគ្រប់យ៉ាងល្អប្រសើរឡើងដែលអាចដែលអាចរក្សាសន្តិសុខនិងស្ថេរភាពនៅក្នុងតំបន់របស់ខ្លួន ព្រះអង្គម្ចាស់សាល់ម៉ែនយល់ព្រមឲ្យរៀបចំទទួលកងកម្លាំងអាមេរិកទាំងនោះ»។
អារ៉ាប៊ី សាអ៊ូឌីត មិនបានរៀបចំទទួលកងកម្លាំងអាមេរិកនោះទេ ចាប់តាំងពីឆ្នាំ ២០០៣ នៅពេលពួកគេ បានដកកងទ័ពចេញ បន្ទាប់ពីបានបញ្ចប់សង្គ្រាមជាមួយអ៊ីរ៉ាក់មកនោះ។
វត្តមានកងទ័ពអាមេរិកនៅអារ៉ាប៊ី សាអ៊ូឌីត អស់រយៈពេល ១២ ឆ្នាំ ដោយបានចាប់ផ្តើមជាមួយប្រតិបត្តិការព្យុះសមុទ្រខ្សាច់ (ODS) នៅក្នុងឆ្នាំ ១៩៩១ នៅពេលអ៊ីរ៉ាក់ បានចូលឈ្លានពានប្រទេស កូវ៉ែត នោះ៕ SK
