ក្រុងរីយ៉ាដ៖ មន្ត្រីអាមេរិក និងប្រទេសអារ៉ាប៊ី សាអ៊ូឌីត កាលពីថ្ងៃចន្ទ បានអំពាវនាវឲ្យបន្តហាមប្រាមមិនឲ្យទិញ-លក់អាវុធរបស់អង្គការសហប្រជាជាតិ ទៅលើប្រទេសអ៊ិរ៉ង់ ដោយបានព្រមានអំពីភាពស្មុគស្មាញជាច្រើនចំពោះសន្តិសុខក្នុងតំបន់ ដោយបានចោទប្រកាន់ក្រុងតេអេរ៉ង់ ពីបទផ្តល់អាវុធទៅឲ្យក្រុមឧទ្ទាមនៅយេម៉ែន។
ការហាមប្រាមទិញលក់អាវុធនោះដែលត្រូវបានដាក់ចូលជាធរមានជាផ្នែកនៃកិច្ចព្រមព្រៀងអាវុធនុយក្លេអ៊ែរមួយ ដែលបានចុះហត្ថលេខាជាមួយក្រុងតេអេរ៉ង់កាលពីឆ្នាំ ២០១៥ នឹងអស់សុពលភាពនៅខែតុលាខាងមុខនេះ ប៉ុន្តែក្រុងវ៉ាស៊ីនតោន កំពុងធ្វើការងារ ដើម្បីបន្តហាមប្រាម ខណៈភាពតានតឹងជាមួយគូសត្រូវបដិបក្ខរបស់ខ្លួននៅតែឡើងកម្តៅ។
តំណាងប្រេសិតពិសេសអាមេរិកទទួលបន្ទុកនៅអ៊ីរ៉ង់ គឺលោក ប្រៀន ហ៊ុក បានថ្លែងប្រាប់ក្រុមអ្នកកាសែតនៅក្នុងទីក្រុងរីយ៉ាដថា ការដកបម្រាមនឹង «លើកទឹកចិត្ត» អ៊ីរ៉ង់ ហើយអាចនឹងបង្កឲ្យមានការប្រកួតប្រជែងសព្វាវុធក្នុងតំបន់។
លោក ហ៊ុក បានថ្លែងនៅសន្និសីទសារព័ត៌មានរួមមួយ ជាមួយលោក អាឌែល អាល់-ជូប៊ីរ ជារដ្ឋមន្ត្រីក្រសួងការបរទេសអារ៉ាប៊ី សាអ៊ូឌីត ថា៖ «បញ្ហានេះ មិនមែនជាលទ្ធផល ដែលក្រុមប្រឹក្សាសន្តិសុខអង្គការសហប្រជាជាតិអាចទទួលយកបាននោះទេ»។
នៅកន្លែងសន្និសីទសារព័ត៌មាននោះ មន្ត្រីអារ៉ាប៊ី សាអ៊ូឌីត បានបង្ហាញអំពីបំណែកមីស៊ីល និងយន្តហោះដ្រូន ដែលបានបាញ់ទម្លាក់ ហើយពួកគេបានថ្លែងថា សម្ភារទាំងអស់នោះបានផ្តល់ដោយអ៊ីរ៉ង់ទៅឲ្យក្រុមឧទ្ទាមហ៊ូធី៕ AFP/SK