.jpg)
កាលពីថ្ងៃអង្គារ ទី ៩ មីនា រដ្ឋមន្ត្រីការបរទេសអាល្លឺម៉ង់សង្ឃឹមថា ទំនាក់ទំនងរវាងសហរដ្ឋអាមេរិក និងអាល្លឺម៉ង់ នឹងមានភាពប្រសើរឡើងក្រោមរដ្ឋបាលលោក Joe Biden។ អាល្លឺម៉ង់សង្ឃឹមថា ខ្លួននឹងអាចចូលរួមសហការជាមួយអាមេរិកក្នុងការដាក់ទណ្ឌកម្មប្រឆាំងនឹងចិន និងរុស្ស៊ី ជុំវិញបញ្ហាសិទ្ធិមនុស្ស និងការរំលោភបំពានផ្សេង។
រដ្ឋមន្ត្រីការបរទេសអាល្លឺម៉ង់លោក Heiko Maas បាននិយាយថា សម្ព័ន្ធភាពឆ្លងអាត្លង់ទិក គួរតែធ្វើសកម្មភាពរួមគ្នា ដើម្បីការពារផលប្រយោជន៍រួម និងគុណតម្លៃ។ លោកក៏បានលើកឡើងអំពីកង្វះនៃសកម្មភាពសម្របសម្រួលក្រោមការដឹកនាំរបស់អតីតប្រធានាធិបតីអាមេរិកលោក Donald Trump ផងដែរ។
ថ្មីៗនេះ ប្រទេសអាល្លឺម៉ង់ បានពង្រីកបេសកកម្មយោធារបស់ខ្លួននៅប្រទេសអាហ្វហ្គានីស្ថាន និងគ្រោងនឹងបញ្ជូននាវាចម្បាំងឆ្លងកាត់សមុទ្រចិនខាងត្បូង ដែលអាមេរិកបានលើកឡើងពីការគំរាមកំហែងសេរីភាពនាវាចរណ៍ពីប្រទេសចិន៕
