.jpg)
លោក Lavrov(ឆ្វេង)និងលោកBorrell ធ្វើសន្និសីទកាសែតរួមគ្នា។ AFP
នៅថ្ងៃចន្ទ ទី ៨ កុម្ភៈ ប្រទេសអាល្លឺម៉ង់ ប៉ូឡូញ និងស៊ុយអែត បានបណ្ដេញអ្នកការទូតរុស្ស៊ីចេញពីប្រទេសរៀងៗខ្លួនក្នុងការតបតនឹងការបណ្ដេញចេញមន្ត្រីការទូតសហភាពអឺរ៉ុប (EU) ៣ រូប ដោយក្រុងម៉ូស្គូ កាលពីសប្ដាហ៍មុន ខណៈរដ្ឋមន្ត្រីការបរទេស EU កំពុងធ្វើទស្សនកិច្ចទៅប្រទេសនោះ។
រុស្ស៊ីបានចោទប្រកាន់មន្ត្រីការទូតសហភាពអឺរ៉ុបទាំង ៣ រូប មកពីអាល្លឺម៉ង់ ប៉ូឡូញ និងស៊ុយអែតថា បានចូលរួមបាតុកម្មទាមទារការដោះលែងមេដឹកនាំចលនាប្រឆាំងលោក Alexei Navalny តែប្រទេសខាងលើបានច្រានចោលការចោទប្រកាន់នេះ។
រដ្ឋមន្ត្រីការបរទេសសហភាពអឺរ៉ុបលោក Joseph Borrell បាននិយាយថា លោកបានដឹងអំពីការបណ្ដេញចេញតាមរយៈបណ្ដាញសង្គមនៅពេលនិយាយជាមួយរដ្ឋមន្ត្រីការបរទេសរុស្ស៊ីលោក Sergei Lavrov នៅទីក្រុងម៉ូស្គូ កាលពីថ្ងៃសុក្រ។ តែអ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃចន្ទថា មន្ត្រីការទូតសហភាពអឺរ៉ុបទាំង ៣ រូបបានធ្វើឡើងមួយថ្ងៃមុនលោក Borrell បានមកដល់រុស្ស៊ី។
លោក Borrell និង Lavrov បានធ្វើសន្និសីទសារព័ត៌មានដែលក្នុងនោះភាគីរុស្ស៊ីបាននិយាយថា សហភាពអឺរ៉ុបគឺជា «ដៃគូដែលមិនអាចជឿទុកចិត្តបាន»។
ក្នុងសេចក្ដីថ្លែងការណ៍មួយទាក់ទងនឹងការបណ្ដេញចេញមន្ត្រីការទូតរុស្ស៊ី ក្រសួងការបរទេសអាល្លឺម៉ង់បាននិយាយថា មន្ត្រីការទូតអាល្លឺម៉ង់ ដែលត្រូវបានរុស្ស៊ីបណ្ដេញចេញនោះ គឺគ្រាន់តែ «បំពេញភារកិច្ចរបស់គាត់ក្នុងការរាយការណ៍អំពីការវិវត្តនៅនឹងកន្លែងតាមរបៀបស្របច្បាប់»។ ស៊ុយអែតបានប្រកាន់ជំហរដូចអាល្លឺម៉ង់ហើយនិយាយថា សកម្មភាពរបស់រុស្ស៊ីគឺ «មិនអាចទទួលយកបាន»។
ក្រសួងការបរទេសប៉ូឡូញ បាននិយាយថា ខ្លួនបានបញ្ជាឱ្យសមាជិកនៃស្ថានកុងស៊ុលរុស្ស៊ីនៅទីក្រុង Poznan ចាកចេញ «ស្របតាមគោលការណ៍បដិភាគ និងក្នុងការសម្របសម្រួលជាមួយអាល្លឺម៉ង់ និងស៊ុយអែត»។
ជាការឆ្លើយតប អ្នកនាំពាក្យក្រសួងការបរទេសរុស្ស៊ីលោកស្រី Maria Zakharovaបាននិយាយតាមរយៈការផ្សាយទូរទស្សន៍រដ្ឋរុស្ស៊ីថា ការបណ្ដេញមន្ត្រីការទូតរុស្ស៊ីគឺ «មិនសមហេតុផល និងជាការបន្តសកម្មភាពដដែលៗ ដែលលោកខាងលិចកំពុងធ្វើប្រឆាំងនឹងប្រទេសរបស់យើង ដែលយើងចាត់ទុកជាសកម្មភាពជ្រៀតជ្រែកក្នុងកិច្ចការផ្ទៃក្នុងរបស់យើង»។
ក្នុងសារបង្ហោះទៅកាន់បណ្ដាញសង្គមលោក Borrell បាននិយាយថា ការសំណូមពររបស់លោកទៅកាន់ប្រទេសរុស្ស៊ី ដើម្បីបញ្ឈប់ការបណ្ដេញចេញនេះ ត្រូវបានគេមិនធ្វើតាម។
សមាជិកសភាសហភាពអឺរ៉ុបលោក RihoTerras បានចាប់ផ្ដើមយុទ្ធនាការដកលោក Borrell ចេញពីតំណែង តែមន្ត្រីនៃគណៈកម្មការសហភាពអឺរ៉ុប បានការពារលោក Borrell ដោយនិយាយថា ពួកគេមិនមានការសោកស្ដាយចំពោះលោក Borrell ដែលបានធ្វើដំណើរលើកដំបូងទៅកាន់ទីក្រុងម៉ូស្គូ ក្នុងនាមជាអ្នកសម្របសម្រួលនៃគោលនយោបាយការបរទេសរបស់សហភាពអឺរ៉ុប ព្រោះប្រទេសរុស្ស៊ី បានចាប់ផ្ដើមដំណើរឆ្ពោះទៅរកការប្រឈមមុខគ្នារួចទៅហើយ។
យ៉ាងណាមិញដំណើរទស្សនកិច្ចរបស់លោក Borrel ទៅកាន់ក្រុងម៉ូស្គូ គឺដើម្បីបញ្ចុះបញ្ចូលឱ្យរុស្ស៊ីដោះលែងលោក Navalny ដែលកាលពីថ្ងៃទី ២ កុម្ភៈតុលាការរុស្ស៊ីបានសម្រេចឱ្យជាប់ពន្ធនាគារក្រោមការចោទប្រកាន់ថា លោកបានរំលោភលក្ខខណ្ឌនៃការព្យួរទោសទាក់ទងនឹងរឿងក្ដីបោកប្រាស់កាលពីឆ្នាំ ២០១៤។ អាជ្ញាធរពន្ធនាគារបានចោទប្រកាន់ថា លោកបានរំលោភលក្ខខណ្ឌនេះ នៅពេលដែលលោកត្រូវបានគេបញ្ជូនទៅព្យាបាលនៅអាល្លឺម៉ង់ក្រោយពីការបំពុលសារធាតុគីមី ឈ្មោះថា Novichok។
ដោយសារព្រឹត្តិការណ៍ទាក់ទងនឹងលោក Navalny ប្រទេសជាសមាជិកសហភាពអឺរ៉ុបមួយចំនួនបានទាមទារឱ្យដាក់ទណ្ឌកម្មបន្ថែមលើរុស្ស៊ី ហើយទាមទារឱ្យមានការបញ្ឈប់ការសាងសង់បំពង់បង្ហូរឧស្ម័នធម្មជាតិ NordStream 2 ដែលនឹងនាំចូលឧស្ម័នធម្មជាតិពីរុស្ស៊ី មកទ្វីបអឺរ៉ុបតាមរយៈប្រទេសអាល្លឺម៉ង់៕
