រដ្ឋាភិបាលអាហ្វ្រិកខាងត្បូងកាលពីថ្ងៃអាទិត្យ ទី ៧ កុម្ភៈ បាននិយាយថា ខ្លួននឹងផ្អាកផែនការចាក់វ៉ាក់សាំងកូវីដ ១៩ របស់ក្រុមហ៊ុនឱសថអន្តរជាតិ Oxford-AstraZeneca បន្ទាប់ពីការសាកល្បងដំបូងបានបង្ហាញលទ្ធផលប្រសិទ្ធភាពតិចតួចប្រឆាំងនឹងវីរុសកូរ៉ូណាបំប្លែងថ្មីរកឃើញក្នុងប្រទេសនេះ។
ប្រទេសអាហ្រ្វិកខាងត្បូងបានទទួលវ៉ាក់សាំងនេះចំនួន ១ លានដូស ដោយគ្រោងនឹងចាប់ផ្ដើមចាក់ជូនបុគ្គលិកសុខាភិបាលជួរមុខចាប់ពីពាក់កណ្តាលខែកុម្ភៈ។ ការសិក្សាដែលពាក់ព័ន្ធនឹងមនុស្សប្រមាណ ២ ០០០ នាក់ បានរកឃើញថា វ៉ាក់សាំងនេះផ្តល់ការការពារតិចតួចបំផុតពីការកើតករណីស្រាល និងមធ្យមនៃជំងឺកូវីដ ១៩។ តែការសិក្សានេះមិនទាន់បានពិនិត្យឡើងវិញទេ។
អ្នកវិទ្យាសាស្ត្រនឹងសិក្សាបន្តថា តើវ៉ាក់សាំង AstraZeneca មានប្រសិទ្ធភាពក្នុងការការពារករណីជំងឺធ្ងន់ធ្ងរ និងករណីស្លាប់ ដោយសារវីរុសបំប្លែងថ្មីនេះឬទេ៕