.jpg)
បុគ្គលិកសុខាភិបាលម្នាក់បង្ហាញវ៉ាក់សាំង Sputnik V (Gam-COVID Vac)។ AFP
កាលពីថ្ងៃពុធ ទី ២៣ ធ្នូ ក្រសួងសុខាភិបាលអាហ្សង់ទីនបានអនុញ្ញាតឱ្យប្រើប្រាស់វ៉ាក់សាំងកូវីដ ១៩ Sputnik V របស់រុស្សីក្នុងគ្រាអាសន្ន។ នេះធ្វើឱ្យអាហ្សង់ទីនក្លាយជាប្រទេសអាមេរិកឡាទីន និងប្រទេសខាងក្រៅអតីតសហភាពសូវៀតដំបូងគេដែលបានអនុញ្ញាតឱ្យប្រើប្រាស់វ៉ាក់សាំងនេះ។
ក្នុងសេចក្ដីថ្លែងការណ៍មួយក្រសួងសុខាភិបាលអាហ្សង់ទីនបានសរសេរថា៖ «ANMAT (រដ្ឋបាលជាតិឱសថ ចំណីអាហារ និងបច្ចេកវិទ្យាវេជ្ជសាស្ត្រ) បានផ្ដល់អនុសាសន៍ដល់រដ្ឋមន្ត្រីក្រសួងសុខាភិបាលឱ្យផ្ដល់ការអនុញ្ញាតប្រើប្រាស់វ៉ាក់សាំង Sputnik V ក្នុងគ្រាអាសន្ន»។
ក្នុងសេចក្ដីថ្លែងការណ៍ផ្សេងទៀត ANMAT បាននិយាយថា វ៉ាក់សាំង Sputnik V បាន «បង្ហាញតុល្យភាពរវាងអត្ថប្រយោជន៍ និងហានិភ័យ ដែលអាចទទួលយកបាន»។
ការប្រកាសនេះ ធ្វើឡើងខណៈពេលយន្តហោះរបស់ក្រុមហ៊ុនអាកាសចរណ៍រដ្ឋអាហ្សង់ទីន Aerolineas Argentinas ១ គ្រឿង បានចុះចតនៅទីក្រុងម៉ូស្គូ ដើម្បីធ្វើការដឹកជញ្ជូនវ៉ាក់សាំងដំបូងចំនួន ៣០០ ០០០ ដូស ដែលគេរំពឹងថានឹងមកដល់រដ្ឋធានីប៊ុយណូស៊ែ វិញនៅថ្ងៃព្រហស្បតិ៍។ កាលពីដើមខែធ្នូ អាហ្សង់ទីនបានធ្វើកិច្ចព្រមព្រៀងជាមួយរុស្ស៊ី ដើម្បីទិញយកវ៉ាក់សាំងប្រមាណ ២៥ លានដូស។
ប្រទេសអាហ្សង់ទីន ដែលមានចំនួនប្រជាជនប្រមាណ ៤៥ លាននាក់ មកដល់ពេលនេះជាប់លំដាប់ថ្នាក់ទី១១ ទូទាំងពិភពលោកមានករណីឆ្លងវីរុសកូវីដ ១៩ ច្រើនជាងគេ ដោយមានករណីឆ្លង ១,៦ លានករណី ហើយមានករណីស្លាប់ ៤២ ០០០ ករណី។
ប្រធានាធិបតីអាហ្សង់ទីនលោក Alberto Fernandez បាននិយាយកាលពីដើមខែនេះថា លោករំពឹងថា រដ្ឋាភិបាលនឹងចាក់វ៉ាក់សាំង Sputnik V ជូនប្រជាជនអាហ្សង់ទីនចំនួន ៣០០ ០០០ នាក់ ត្រឹមដំណាច់ឆ្នាំ និងចាក់ជូនប្រជាជនចំនួន ១០ លាននាក់ក្នុងរយៈពេល ២ ខែដំបូងនៃឆ្នាំ ២០២១ ហើយក៏បានបង្ហាញថា លោកនឹងទទួលវ៉ាក់សាំងដោយផ្ទាល់ ដើម្បីធានាសុវត្ថិភាពជូនប្រជាជន។
មកដល់ពេលនេះក្រៅពីអាហ្សង់ទីន មានតែប្រទេសរុស្ស៊ី និងបេឡារុសទេ ដែលបានអនុញ្ញាតឱ្យប្រើប្រាស់ Sputnik V។ វ៉ាក់សាំងនេះបានរងការរិះគន់ពីក្នុង និងក្រៅប្រទេសរុស្ស៊ី ដោយសាររដ្ឋាភិបាលរុស្ស៊ីបានអនុញ្ញាតឱ្យប្រើប្រាស់មុនពេលធ្វើការសាកល្បងសុវត្ថិភាព និងប្រសិទ្ធភាពខ្នាតធំ។ រុស្ស៊ីបានអះអាងថា វ៉ាក់សាំងពួកគេ គឺមានប្រសិទ្ធភាព ៩១,៤% ហើយមានផលប៉ះពាល់តិចតួច។
លោក Kirill Dmitriev ប្រធានមូលនិធិវិនិយោគផ្ទាល់របស់រដ្ឋរុស្ស៊ីដែលបានវិនិយោគលើ Sputnik V បាននិយាយថា៖ «ការអនុញ្ញាតឱ្យវ៉ាក់សាំង Sputnik V នៅអាហ្សង់ទីនដោយមិនចាំបាច់បន្ថែមការធ្វើការសាកល្បងម្ដងទៀតនៅក្នុងប្រទេស គឺបង្កើតឱ្យមានការទទួលស្គាល់យ៉ាងសំខាន់ដល់ច្បាប់ បទបញ្ជា និងគុណភាពនៃការសាកល្បងរបស់រុស្ស៊ី»។
យ៉ាងណាមិញ ការអនុញ្ញាតឱ្យប្រើប្រាស់ Sputnik V គឺបានធ្វើឡើងប៉ុន្មានម៉ោងក្រោយ ANMAT បានអនុញ្ញាតឱ្យប្រើប្រាស់វ៉ាក់សាំង Pfizer/BioNTech ក្នុងគ្រាអាសន្ន តែមិនទាន់ធ្វើការនាំចូលនៅឡើយ ដោយការចរចាបញ្ជាទិញយក គឺមិនទាន់ធ្វើហើយ។ រដ្ឋមន្ត្រីក្រសួងសុខាភិបាលអាហ្សង់ទីនលោក Gines Gonzalez Garcia បានរិះគន់ Pfizer/BioNTech ថាបានទាមទារ «លក្ខខណ្ឌដែលមិនអាចយកបាន» ក្នុងចរចាតែលោកមិនបានបញ្ជាក់ថា Pfizer/BioNTech បានទាមទារអ្វីទេ។
ក្រៅពីវ៉ាក់សាំងទាំ ២ នេះ អាហ្សង់ទីនក៏បានបញ្ជាទិញវ៉ាក់សាំង AstraZeneca/Oxford ផងដែរ ហើយក៏នឹងធ្វើការទិញយកវ៉ាក់សាំងតាមរយៈកម្មវិធី COVAX របស់អង្គការសុខភាពពិភពលោកផងដែរ៕
