The Phnom Penh Post Search

Search form




Logo of Phnom Penh Post newspaper Phnom Penh Post - អូស្ត្រាលីបញ្ចប់​គម្រោង​ផ្លូវ ១ ខ្សែក្រវាត់ ១ ជាមួយ​ចិន ខណៈ​ទំនាក់ទំនង​នៃ​ប្រទេស​ទាំង ២ ចាប់ផ្ដើម​ធ្លាក់ចុះ

អូស្ត្រាលីបញ្ចប់​គម្រោង​ផ្លូវ ១ ខ្សែក្រវាត់ ១ ជាមួយ​ចិន ខណៈ​ទំនាក់ទំនង​នៃ​ប្រទេស​ទាំង ២ ចាប់ផ្ដើម​ធ្លាក់ចុះ

Content image - Phnom Penh Post
រដ្ឋមន្ត្រី​ក្រសួង​ការបរទេស​លោកស្រី Marise Payne។ AFP

អូស្ត្រាលីបញ្ចប់​គម្រោង​ផ្លូវ ១ ខ្សែក្រវាត់ ១ ជាមួយ​ចិន ខណៈ​ទំនាក់ទំនង​នៃ​ប្រទេស​ទាំង ២ ចាប់ផ្ដើម​ធ្លាក់ចុះ

ប្រទេស​អូស្ត្រាលី បាន​លុបចោល​គម្រោង «ផ្លូវ១ ខ្សែក្រវាត់១»( Belt and Road Initiative) ជាមួយ​ចិន ដែល​បង្កឱ្យ មាន​ការខឹង​សម្បា​ពី​ទីក្រុង​ប៉េកាំង។

រដ្ឋមន្ត្រី​ក្រសួង ការបរទេស​នៃ​ប្រទេស​អូស្ត្រាលី លោកស្រី Marise Payne បានឱ្យដឹង​កាលពី​ថ្ងៃ ពុធ ថា៖ «កិច្ចព្រមព្រៀង ទ្វេភាគី រវាង​ទីក្រុង​ប៉េកាំង ជាមួយ​រដ្ឋ Victoria ស្ថិតក្នុង​ចំណោម​ច្បាប់​ចំនួន ៤ អនុម័ត​ដោយ​ច្បាប់​ថ្មី ដែល​ផ្តល់​អំណាច​ដល់​រដ្ឋាភិបាល​សហព័ន្ធ ដើម្បី​លុបចោល​កិច្ចព្រមព្រៀង​អន្តរជាតិ​ណា ដែល​រំលោភ​ផលប្រយោជន៍​ជាតិ»។

កិច្ចព្រមព្រៀង​ចំនួន ៤ នោះ រួមមាន គម្រោង «ផ្លូវ១ ខ្សែក្រវាត់១» (Belt and Road Initiative ) រវាង​អូស្ដ្រាលី និង​ចិន​ឆ្នាំ ២០១៨ និង​ឆ្នាំ ២០១៩ កតិកាសញ្ញា​ក្រសួង​អប់រំ Victoria ជាមួយ​ប្រទេស​ស៊ីរី ក្នុង​ឆ្នាំ ១៩៩៩ និង​អ៊ីរ៉ង់ ក្នុង​ឆ្នាំ ២០០៤ សុទ្ធតែ​ត្រូវបាន​លុបចោល ក្រោម​ច្បាប់​ថ្មី​របស់​ប្រទេស​អូស្ដ្រាលី។

លោកស្រី Payne បានឱ្យ​ដឹងថា៖ «យើង​ចាត់ទុក​កិច្ចព្រមព្រៀង​ចំនួន ៤ មិនបាន​ស្រប​ទៅ​នឹង​គោលនយោបាយ​ការបរទេស​របស់​អូស្ត្រាលី ឬ​ផ្ទុយ​ពី​ទំនាក់ទំនង​ការបរទេស​របស់​យើង»។

ស្ថានទូត​ចិន​ប្រចាំ​នៅ​អូស្ត្រាលី​បាន​ឱ្យដឹង​នៅក្នុង​សេចក្តី​ថ្លែងការណ៍​មួយ​ថា៖ «សេចក្តី​សម្រេច​នេះ បង្ហាញ​ថា​រដ្ឋាភិបាល​អូស្ត្រាលី គ្មាន​ភាពស្មោះត្រង់​ក្នុង​ការធ្វើ​ឱ្យ​ប្រសើរឡើង​នូវ​ទំនាក់ទំនង​ចិន-អូស្ត្រាលី​នោះទេ»។

សេចក្ដី​ថ្លែងការណ៍​បាន​បន្តថា៖ « ការសម្រេច​ដូចនេះ​នឹង​កាន់តែ​ធ្វើឱ្យ​ទំនាក់ទំនង​ទ្វេភាគី​នៃ​ប្រទេស​ទាំង ២ កាន់តែ​អាក្រក់​ឡើង និង​អាច​បង្ក​អន្តរាយ​ដល់​ខ្លួនឯង។

គួរបញ្ជាក់​ផងដែរ​ថា ទំនាក់ទំនង​ទ្វេភាគី​រវាង​ប្រទេស​ទាំង ២ ធ្លាក់​ក្នុងស្ថានភាព​អាក្រក់​ទៅៗ​ក្នុង​រយៈពេល​ប៉ុន្មាន​ទសវត្សរ៍​ក្រោយនេះ។ រដ្ឋមន្ត្រី​រដ្ឋាភិបាល​ចិន​បដិសេធ​មិន​ទទួល​ទូរស័ព្ទ​ពី​សមភាគី​អូស្ត្រាលី និង​ធ្វើឱ្យមាន​ការរំខាន​ផ្នែក​ពាណិជ្ជកម្ម ដែល​អ្នកខ្លះ​បាន​មើលឃើញ​ថា សកម្មភាព​នេះ​គឺជា​សកម្មភាព​ដែល​ចិន​ដាក់ទណ្ឌកម្ម​សេដ្ឋកិច្ច​ប្រទេស​នេះ។

ក្រៅពី​ការលុបចោល​កិច្ចព្រមព្រៀង និង​ការរំខាន​ផ្នែក​ពាណិជ្ជកម្ម​រវាង​ប្រទេស​ទាំង ២ នៅមាន​បញ្ហា​ជាច្រើន​ទៀត ដែល​ធ្វើឱ្យប៉ះពាល់​ដល់​ប្រទេស​ទាំង។ ជាក់ស្ដែង​កាលពី​ខែមេសា ឆ្នាំ​មុន ប្រទេស​អូស្ត្រាលី​បាន​សហការ​ជាមួយ​សហរដ្ឋអាមេរិក​អំពាវនាវ​ឱ្យមាន​ការស៊ើបអង្កេត​ឱ្យបាន​ហ្មត់ចត់ ស្ដីអំពី​ការរីក​រាលដាល​នៃ​ជំងឺ​កូវីដ១៩ តាម​តំបន់​នៅ​ភាគ​កណ្តាល​ប្រទេស​ចិន ដែល​បង្ក​ឱ្យ​មាន​ការខឹងសម្បា​ពី​ឯកអគ្គរដ្ឋទូត​ចិន ប្រចាំ​ប្រទេស​នេះ។

ក្រៅពីនេះ បញ្ហា​មួយទៀត​ដែល​កាន់តែ​ធ្វើឱ្យ​ប៉ះពាល់​ដល់​ទំនាក់ទំនង​ទ្វេភាគី រវាង​ប្រទេស​ទាំង ២ គឺ​ទាក់ទិន​នឹង​ករណី​ប្រទេស​ចិន ឃុំខ្លួន​បុគ្គល​មានមុខ​មាន​មាត់​នៅ​អូស្ត្រាលី ២ នាក់ គឺ​អ្នកនិពន្ធ Yang Jun និង​អ្នក​សារព័ត៌មាន Cheng Lei។

បន្ថែម​ពីនេះ អូស្ត្រាលី​ក៏​ស្ថិត​ក្នុងចំណោម​សម្ព័ន្ធមិត្ត​របស់​លោក​ខាងលិច ដែល​ហៅថា «ភ្នែក ៥» ដែល​ចោទប្រកាន់​ប្រទេស​ចិន​ពី​បទរំលោភ​លើ​ការប្តេជ្ញាចិត្ត​អន្តរជាតិ​ទាក់ទិន​នឹង​បញ្ហា​នៅ​ហុងកុង ក្រោយពី​ប្រទេស​ចិន​ដាក់ចេញ​នូវ​ច្បាប់​សន្តិសុខ​រឹតត្បិត​លើ​ទីក្រុង​នេះ។

យ៉ាងណាមិញ អ្នកនាំពាក្យ​ក្រសួង​ការបរទេស​ចិន​បាន​ព្រមាន​ថា៖ «ទោះបី​ពួកគេ​មាន​ភ្នែក ៥ ឬ ១០ ក៏ដោយ ប្រសិន​បើ​ពួកគេ​ហ៊ាន​ធ្វើឱ្យ​ខូចខាត​ដល់​អធិបតេយ្យភាព​សន្តិសុខ និង​ផលប្រយោជន៍​នៃ​ការអភិវឌ្ឍ​របស់​ចិន អ្នក​ទាំងនេះ​គួរតែ​ប្រយ័ត្ន ត្រូវ​ខ្វាក់ភ្នែក»៕

អត្ថបទគួរចាប់អារម្មណ៍