ក្រុងអ៊ីស្តង់ប៊ុលៈ ប្រធានាធិបតីតួកគី លោក រ៉េសិប តៃយីប អេរដូហ្គែន បានសន្ទនា តាមទូរស័ព្ទជាមួយសមភាគីអាមេរិកលោក ដូណាល់ ត្រាំថា តួកគី បានត្រៀមខ្លួនរួចជាស្រេច ដើម្បីធានាឲ្យមានសន្តិសុខ និងសុវត្ថិភាពនៅក្រុង Manbij នៅស៊ីរីភាគខាងជើងឲ្យបានល្អប្រសើរឡើងវិញ ដើម្បី «កុំឲ្យខាតពេលវេលា»។
ក្រុង Manbij ត្រូវបានគ្រប់គ្រងដោយក្រុមសកម្មប្រយុទ្ធឃើដ ដែលគាំទ្រដោយយោធាអាមេរិក កាលពីថ្ងៃពុធ ត្រូវរងការវាយប្រហារមួយអះអាងដោយក្រុមរដ្ឋអ៊ិស្លាម (IS) ដែលបានបណ្តាលឲ្យមនុស្ស ១៩ នាក់ ស្លាប់ នៅក្នុងនោះរួមមានទាហានអាមេរិក ៤ នាក់ផងដែរ។
ភ្នាក់ងារសារព័ត៌មានរដ្ឋ Anadolu បានរាយការណ៍ថា ការសន្ទនាតាមទូរស័ព្ទលើកទី ២ របស់ពួកគេនោះមិនដល់ ១ សប្តាហ៍ផង លោក អេរ ដូហ្គែន បានប្រាប់លោក ត្រាំ ថា ការវាយប្រហារនោះ គឺជាការបង្កហេតុមួយដែលមានគោលបំណងធ្វើឲ្យប៉ះពាល់ដល់ការសម្រេចចិត្តដកកងទ័ពអាមេរិកចេញពីទឹកដីស៊ីរី។
តួកគី បាននិងកំពុងបង្កការគំរាមកំហែងអស់រយៈពេលជាច្រើនខែ ដើម្បីបើកការវាយប្រហារទ្រង់ទ្រាយធំមួយនៅក្រុង Manbij ដើម្បីរុញច្រានក្រុមជីវពលនៃអង្គភាពការពារប្រជាជនឃើដ (YPG)។
ទោះបីជាយ៉ាងណាក៏ដោយ ក៏កងកម្លាំងរបស់ YPG នេះ ត្រូវបានគាំទ្រដោយអាមេរិកនៅក្នុងការវាយប្រហារប្រឆាំងក្រុមជីហាដជ្រុលនិយមISនោះ។
ប៉ុន្តែក្រុងអង់ការ៉ា បានចាត់ទុក YPG ថាជា «ក្រុមអង្គការភេរវកម្ម» ដោយមិនចង់ឃើញឲ្យមានការបង្កើតនៅតាមព្រំដែនរបស់ខ្លួនឡើយ រដ្ឋឃើដមួយដែលទើបតែបង្កើតឡើងនោះ អាចនឹងធ្វើឲ្យគណបក្ស ពលករឃើដ (PKK) នៅក្នុងប្រទេស តួកគី រឹងមាំ។
ដើម្បីកាត់បន្ថយភាពតានតឹងនោះ តួកគី និងអាមេរិកកាលពីខែឧសភា បានឯកភាពគ្នាបង្កើតផែនទីផ្លូវមួយ នៅក្នុងនោះ រួមមានការដកកងកម្លាំងរបស់ YPG ចេញពីក្រុង Manbij និងការចូលរួមល្បាតជាមួយតួកគី-អាមេរិក ដែលបានចាប់ផ្តើមនៅខែវិច្ឆិកាខាងមុខនេះ។
ក្រុមសម្ព័ន្ធមិត្តអង្គការណាតូទាំង ២ នេះ នឹងបង្កើត «តំបន់សន្តិសុខ» មួយដែលមានគោលបំណង ដើម្បីបំបែកទឹកដីដែលបានរៀបចំឡើងដោយ កងកម្លាំង YPG ចេញពីព្រំដែនតួកគី៕ AFP/SK