ក្រុងគែរ៖ ក្រសួងការបរទេសអេហ្ស៊ីបបានថ្លែងនៅក្នុងសេចក្តីថ្លែងការណ៍មួយកាលពីថ្ងៃអាទិត្យថា ប្រទេស អេហ្ស៊ីប បានថ្កោលទោសការវាយប្រហារមីស៊ីលបាលីស្ទិក ២ គ្រាប់ កាលពីពេលថ្មីៗនេះ ដែលបានធ្វើឡើងដោយក្រុមឧទ្ទាមហ៊ូធីនៅក្នុងប្រទេស យេម៉ែន ទៅលើទីក្រុងរីយ៉ាដ និងទីក្រុងជីហ្សានរបស់ប្រទេស អារ៉ាប៊ី សាអ៊ូឌីត។
សេចក្តីថ្លែងការណ៍នោះ បាននិយាយថា៖ «រដ្ឋាភិបាល និងប្រជាជនអេហ្ស៊ីប បានឈរនៅក្នុងការសាមគ្គីភាពជាមួយក្រុមសមភាគីរបស់ពួកគេ នៅក្នុងព្រះរាជាណាចក្ររបស់ អារ៉ាប៊ី សាអ៊ូឌីត ហើយបានគាំទ្ររាល់ដំណើរការចាំបាច់ទាំងអស់ ដែលបានចាត់វិធានការ ដើម្បីរក្សាសន្តិសុខ និងស្ថិរភាពរបស់ព្រះរាជាណាចក្រមួយនេះ»។
មន្ត្រីយោធាអារ៉ាប៊ី សាអ៊ូឌីត បានថ្លែងកាលពីថ្ងៃអាទិត្យថា មីស៊ីលបាលីស្ទិក ២ គ្រាប់ បានបាញ់ដោយក្រុមជីវពលហ៊ូធី ត្រូវបានបាញ់ទម្លាក់ ប៉ុន្តែប្រជាជនស៊ីវិល ២ នាក់ បានរងរបួសធ្ងន់ ដោយសារកម្ទេចគ្រាប់មីស៊ីល ដែលបានផ្ទុះពីលើសង្កាត់លំនៅឋាននានានៅទីនោះ។
ប្រទេស យេម៉ែន ត្រូវបានជាប់គាំងនៅក្នុងសង្គ្រាមស៊ីវិលចាប់តាំងពីចុងឆ្នាំ ២០១៤ មក នៅពេលក្រុមឧទ្ទាមហ៊ូធី ដែលគាំទ្រដោយប្រទេស អ៊ីរ៉ង់ បានដណ្តើមគ្រប់គ្រងយកទឹកដីមួយភាគធំនៅប្រទេស យេម៉ែនភាគខាងជើង ហើយបានបង្ខំឲ្យរដ្ឋាភិបាលរបស់ប្រធានាធិបតីយេម៉ែន គឺលោក អាប់ដ៍-រ៉ាប់ប៊ូ មែនស៊ួរ ហាឌី ដែលគាំទ្រដោយប្រទេស អារ៉ាប៊ី សាអ៊ូឌីត រត់ភៀសខ្លួនចេញពីរដ្ឋធានីសាណា។
អស់រយៈពេលជាង ៥ ឆ្នាំ ប្រទេស អារ៉ាប៊ី សាអ៊ូឌីត បាននិងកំពុងដឹកនាំក្រុមចម្រុះយោធាអារ៉ាប៊ី សាអ៊ូឌីត ប្រឆាំងក្រុមឧទ្ទាមហ៊ូធី នៅក្នុងប្រទេស យេម៉ែន៕ Xinhua/SK