.jpg)
ស្ត្រីអុីស្រាអែលម្នាក់រងរបួសត្រូវបានជម្លៀសចេញពីអាផាតមិនមួយ។ AFP
ក្រុងហ្គាហ្សាៈ អំពើហិង្សាថ្មីនៅតំបន់ហ្គាហ្សា បានគំរាម-កំហែងដល់កិច្ចខិតខំប្រឹងប្រែង ដើម្បីបញ្ចប់ភាពចលាចលរយៈពេលជាច្រើនខែនោះ ខណៈការវាយប្រហារតាមផ្លូវអាកាសរបស់អ៊ីស្រាអែល បានបណ្តាលឲ្យពលរដ្ឋប៉ាឡេស្ទីន ៤ នាក់ស្លាប់ ហើយបានបំផ្លាញអគារទូរទស្សន៍មួយរបស់ក្រុមហាម៉ាស ស្របពេលជាមួយគ្នានោះ រ៉ុក្កែតមួយគ្រាប់ ត្រូវបានគេបាញ់ចេញពីដែនដីនោះ បង្កឲ្យមនុស្សម្នាក់ស្លាប់កាលពីថ្ងៃអង្គារ។
អំពើហិង្សានោះបានកើតឡើងក្រោយពីប្រតិបត្តិការរបស់កងកម្លាំងពិសេសអ៊ីស្រាអែល ដែលបណ្តាលឲ្យមនុស្សស្លាប់ច្រើននៅតំបន់ហ្គាហ្សាកាលពីថ្ងៃអាទិត្យ ដែលដឹកនាំឲ្យក្រុមហាម៉ាស បេ្តជ្ញាធ្វើការសងសឹកវិញ។
ក្រុមយោធាអ៊ីស្រាអែល បាននិយាយថា រហូតមកទល់ពេលនេះ ខ្លួនបានបើក ការវាយប្រហារទៅលើទីតាំងឈរជើងជាង ១០០ កន្លែងរបស់ក្រុមជនសកម្មប្រយុទ្ធ ជាការឆ្លើយតបទៅនឹងរ៉ុក្កែត ៣៧០ គ្រាប់ដែលត្រូវបានបាញ់ចេញពីទឹកដីដែលគ្រប់គ្រង ដោយក្រុមហាម៉ាស កាលពីរសៀលថ្ងៃចន្ទ រហូតដល់ព្រឹកថ្ងៃអង្គារ។
យោធានោះ បាននិយាយថាប្រព័ន្ធការពារមីស៊ីល ចាប់បានរ៉ុក្កែតជាង ១០០ គ្រាប់ ដែលត្រូវបានគេបាញ់ពីតំបន់ហ្គាហ្សា ហើយរ៉ុក្កែតភាគច្រើនបានធ្លាក់នៅតំបន់វាលលម្ហ និងខ្លះធ្លាក់ចំផ្ទះសំបែង និងសំណង់របស់ក្រុមជនស៊ីវិល។
អង្គការសេវាគ្រាអាសន្ន United Hatzalah បានឲ្យដឹងថា សាកសពរបស់បុរសម្នាក់ត្រូវបានទាញចេញពីអគារបាក់បែកមួយ ដោយបានបន្ថែមថា ស្ត្រីម្នាក់ដែលត្រូវបានរកឃើញនិងទាញចេញពីអគារតែមួយនៅក្នុងក្រុង Ashkelon ស្ថិតនៅក្នុងស្ថានភាពធ្ងន់ធ្ងរ។
ក្រុមគ្រូពេទ្យ បាននិយាយថា ពលរដ្ឋអ៊ីស្រាអែលប្រមាណ ២០ នាក់រងរបួស៕
