ការប៉ះទង្គិចគ្នានៅក្រុងហ្ស៊េរុយសាឡឹមបានកើនឡើងយ៉ាងខ្លាំងនៅថ្ងៃចន្ទទី ១០ ឧសភាដោយមន្ត្រីសុខាភិបាលបានរាយការណ៍ថាមានមនុស្ស ២២ នាក់ដែលក្នុងនោះមានកុមារ ៩ នាក់បានស្លាប់ក្នុងការវាយប្រហារបាញ់រ៉ុក្កែត និងទម្លាក់គ្រាប់បែកទៅវិញទៅមករវាងយោធាអ៊ីស្រាអែល និងក្រុមប្រដាប់អាវុធប៉ាឡេស្ទីន។
ក្រុមប្រដាប់អាវុធ Hamas បានបើកការបាញ់រ៉ុក្កែតចូលទៅទឹកដីអ៊ីស្រាអែលនៅយប់ថ្ងៃចន្ទ បន្ទាប់ពីពេលកំណត់ដាក់ដោយពួកគេក្នុងការទាមទារឱ្យអ៊ីស្រាអែលដកកងកម្លាំងសន្តិសុខចេញពីព្រះវិហារអ៊ីស្លាម Al-Aqsa។ នេះជាលើកដំបូងដែលក្រុម Hamas បានបាញ់រ៉ុក្កែតវាយប្រហារអ៊ីស្រាអែលតាំងពីសង្គ្រាមឆ្នាំ ២០១៤ មក។
នៅយប់ថ្ងៃចន្ទសប្ដាហ៍នេះក្រុមយោធាអ៊ីស្រាអែលបាននិយាយថាក្រុម Hamas បានបាញ់រ៉ុក្កែតយ៉ាងហោចណាស់ ១៥០ គ្រាប់ ហើយចំនួននេះបានឡើងរហូតដល់ ២០០ គ្រាប់នៅព្រឹកថ្ងៃអង្គារដែលក្នុងនោះមាន ៦ គ្រាប់បានតម្រង់ទៅក្រុងហ្ស៊េរុយសាឡឹម។ រ៉ុក្កែតភាគច្រើនត្រូវបានបាញ់ទម្លាក់ដោយប្រព័ន្ធការពារដែនអាកាស Iron Dome ប៉ុន្តែរ៉ុក្កែត ១ គ្រាប់បានធ្លាក់នៅជាយក្រុងហ្ស៊េរុយសាឡឹមបណ្ដាលឱ្យមានការខូចខាតស្រាល និងបង្កឱ្យមានអគ្គិភ័យជិតនោះ។ នៅភាគខាងត្បូងប្រទេសអ៊ីស្រាអែលបុរសអ៊ីស្រាអែលម្នាក់បានរងរបួសស្រាល បន្ទាប់ពីរ៉ុក្កែត ១ គ្រាប់បានធ្លាក់ទៅលើរថយន្តរបស់លោក។
អ្នកនាំពាក្យរបស់ក្រុម Hamas លោក Abu Ubaida បាននិយាយថាពួកគេបានចាប់ផ្ដើម «ការបាញ់រ៉ុក្កែតប្រឆាំងសត្រូវនៅដែនដីពួកគេកាន់កាប់ហ្ស៊េរុយសាឡឹម ដើម្បីឆ្លើយតបនឹងឧក្រិដ្ឋកម្ម និងអំពើអរិភាពរបស់ពួកគេប្រឆាំងនឹងទីក្រុងពិសិដ្ឋនេះ និងអំពើអរិភាពប្រឆាំងប្រជាជនយើងនៅសង្កាត់ Sheikh Jarrah និងវិហារ Al-Aqsa»។
នាយករដ្ឋមន្ត្រីអ៊ីស្រាអែលលោក Benjamin Netanyahu បានឆ្លើយតបថា៖ «អង្គការភេរវកម្មបានឆ្លងកាត់ខ្សែបន្ទាត់ក្រហមនៅថ្ងៃទិវាក្រុងហ្សេរុយសាឡឹមហើយបានវាយប្រហារយើងនៅជាយក្រុងហ្ស៊េរុយសាឡឹម»។
លោកបានបន្ថែមទៀតថា៖ «អ៊ីស្រាអែលនឹងឆ្លើយតបជាកម្លាំង។ យើងនឹងមិនអត់ធ្មត់ចំពោះការវាយប្រហារលើទឹកដីរបស់យើងរដ្ឋធានីប្រជាជន និងទាហានរបស់យើងទេ»។
យោធាអ៊ីស្រាអែលបានឆ្លើយតបវិញដោយធ្វើការវាយប្រហារតាមអាកាស និងទម្លាក់គ្រាប់បែកទៅលើគោលដៅក្រុម Hamas ដូចជាកន្លែងបាញ់រ៉ុក្កែត និងមូលដ្ឋានក្រុមប្រដាប់អាវុធក្នុងតំបន់ Gaza។ នៅព្រឹកថ្ងៃអង្គារការវាយប្រហារដោយយន្តហោះដ្រូនបានសម្លាប់បុរសម្នាក់ហើយក្នុងការវាយប្រហារមួយទៀតបានសម្លាប់ស្ត្រីម្នាក់ និងបុរស ២ នាក់នៅពេលដែលមីស៊ីល ១ គ្រាប់បានបាញ់ចំជាន់លើនៃអគារស្នាក់នៅមួយក្នុងជំរំជនភៀសខ្លួន Shati។
យ៉ាងហោចណាស់មានមនុស្ស ១៥ នាក់ក្នុងចំណោម ២២ នាក់ដែលបានស្លាប់នៅក្នុងតំបន់ Gaza ត្រូវបានមន្ត្រីសុខាភិបាលប៉ាឡេស្ទីនសន្មតថាជាការស្លាប់បង្កដោយការវាយប្រហារតាមអាកាសរបស់អ៊ីស្រាអែល។ អ្នកស្លាប់ចំនួន ៧ នាក់ផ្សេងទៀតគឺជាសមាជិកនៃក្រុមគ្រួសារមួយដែលរួមទាំងកុមារ ៣នាក់បានស្លាប់ក្នុងការផ្ទុះមិនដឹងប្រភពនៅខាងជើងតំបន់ Gaza។ គេមិនដឹងថាការផ្ទុះនេះគឺបង្កដោយការវាយប្រហារអាកាសរបស់អ៊ីស្រាអែល ឬការធ្លាក់រ៉ុក្កែតរបស់ Hamas នោះទេ។
ភាពតានតឹងរវាងភាគីទាំង ២ នៅទីតាំងដែលជនមូស្លីមស្គាល់ថាជា «ជម្រកថ្លៃថ្នូរ» ហើយជនជាតិជ្វីហ្វស្គាល់ថាជា «ភ្នំប្រាសាទ» បានកើនឡើងអស់រយៈពេលជាច្រើនសប្ដាហ៍ក្នុងខែរ៉ាម៉ាដានរបស់សាសនិកមូស្លីម ខណៈពេលដែលការប៉ះទង្គិចគ្នារវាងកងកម្លាំងសន្តិសុខអ៊ីស្រាអែល និងក្រុមបាតុករប៉ាឡេស្ទីនបានកើតឡើងជាប់ៗគ្នាដែលនាំឱ្យមានការព្រួយបារម្ភជាអន្តរជាតិថាព្រឹត្តិការណ៍ទាំងនេះអាចបង្កចលាចលក្នុងតំបន់។
ចំណុចកំពូលនៃភាពតានតឹងនេះគឺផែនការបណ្ដេញជនជាតិប៉ាឡេស្ទីនចេញពីគេហដ្ឋានពួកគេនៅសង្កាត់ Sheikh Jarrah នៅក្រុងហ្សេរុយឡឹមខាងកើតសម្រាប់អ្នកតាំងលំនៅអ៊ីស្រាអែលមករស់នៅទីនោះវិញ។ វិវាទដែនដីនេះមានប្រភពក្នុងសង្គ្រាម ៦ ថ្ងៃកាលពីឆ្នាំ ១៩៦៧ ដែលកាលនោះអ៊ីស្រាអែលបានវាយយកក្រុងហ្ស៊េរុយសាឡឹមខាងកើត និងតំបន់ West Bank ពីប្រទេសហ្សកដានីហើយតំបន់ Gaza ពីប្រទេសអេហ្ស៊ីប។ ការប៉ះទង្គិចរវាងបាតុករតវ៉ាផែនការបណ្ដេញនេះ និងប៉ូលិសបានបន្តពីចុងសប្ដាហ៍ដល់ល្ងាចថ្ងៃចន្ទ។
ដើម្បីចៀសវាងការប្រឈមមុខគ្នាបន្ថែមទៀតអាជ្ញាធរអ៊ីស្រាអែលបានផ្លាស់ប្តូរទិសដៅនៃក្បួនដង្ហែជនជាតិជ្វីហ្វជាតិនិយមរាប់ពាន់នាក់ដែលគ្រោងដង្ហែទង់ជាតិអ៊ីស្រាអែលចូលតំបន់ជនជាតិប៉ាឡេស្ទីននៅថ្ងៃទិវាក្រុងហ្ស៊េរុយឡឹម។ ទិវាប្រចាំឆ្នាំគឺដើម្បីរំលឹកដល់ការដណ្តើមយកក្រុងហ្ស៊េរុយសាឡឹមខាងកើតពីជនជាតិអារ៉ាប់ក្នុងសង្គ្រាមឆ្នាំ ១៩៦៧ ប៉ុន្តែវាត្រូវបានគេមើលឃើញថាជាការញុះញង់ដល់ប្រជាជនប៉ាឡេស្ទីនកំពុងរស់នៅក្នុងហ្ស៊េរុយឡឹម។
អ៊ីស្រាអែលបានចាត់ទុក្ខទីក្រុងហ្ស៊េរុយសាឡឹមទាំងមូលជារដ្ឋធានីរបស់ពួកគេ ប៉ុន្តែមិនបានទទួលការគាំទ្រពីអន្តរជាតិជុំវិញការទាមទារនេះទេ។ រីឯជនជាតិប៉ាឡេស្ទីនវិញបានចាត់ទុកតំបន់ Gaza និង West Bank ជាដែនដីរបស់ពួកគេ ហើយក្រុងហ្ស៊េរុយសាឡឹមខាងកើតនឹងក្លាយជារដ្ឋធានីរបស់ពួកគេនៅពេលពួកគេបង្កើតរដ្ឋថ្មីនាពេលអនាគត៕