ក្រុងវ៉ាស៊ីនតោន៖ អំពើហិង្សា និងការលួចប្លន់កាលពីថ្ងៃអង្គារ បានរាលដាលរហូតដល់ទីក្រុងជាច្រើនបន្ថែមទៀតនៅអាមេរិក ខណៈប្រធានាធិបតីលោក ដូណាល់ ត្រាំ បានប្រឈមនឹងការរិះគន់យ៉ាងក្តៅគគុកចំពោះការប្រើប្រាស់កម្លាំងយោធានៅខាងក្រៅសេតវិមាន ដើម្បីបំបែកក្រុមអ្នកធ្វើបាតុកម្មដោយសន្តិវិធីប្រឆាំងអយុត្តិធម៌ពូជសាសន៍នៅអាមេរិកនាពេលបច្ចុប្បន្ន។
នៅពេលបាតុកម្មជាបន្តបន្ទាប់ក្នុងជំនាន់មួយបាននាំឲ្យមានការជួបជុំតវ៉ាចម្រុះជាតិសាសន៍ និងដោយសន្តិវិធីយ៉ាងច្រើនសន្ធឹកសន្ធាប់ នៅតាមដងផ្លូវកាលពីសប្តាហ៍មុន ប៉ុន្តែការធ្វើបាតុកម្មរាល់យប់បានឈានទៅរកការបំផ្លិចបំផ្លាញ ដោយទាំងក្រុមសកម្មជន និងមន្ត្រីបានស្តីបន្ទោសទៅលើក្រុមជនអន្ធពាលទាំងនោះ។
ហាងលក់ទំនិញខ្លះ នៅក្នុងចំណោមហាងលក់ទំនិញជាច្រើន នៅក្នុងទីក្រុងញូវយ៉កនៅតាមផ្លូវនានា ត្រូវបានកម្ទេចកាលពីថ្ងៃចន្ទនៅក្នុងនោះមានទង់ជាតិធំៗផងដែរ ខណៈមន្ត្រីប៉ូលិស ៤ នាក់ផ្សេងទៀតបានត្រូវគ្រាប់កាំភ្លើងនៅក្នុងទីក្រុងអេសធីឡូវីស ដែលបានបង្កឡើងដោយសារភាពតានតឹងពូជសាសន៍យ៉ាងយូរនៅអាមេរិកនោះ។
ប៉ុន្តែមានការថយចុះទៅវិញនៅក្នុងទីក្រុងមីននៀប៉ូលិស ជាទីដែលការបះបោរបានចាប់ផ្តើមកើតឡើង បន្ទាប់ពីការស្លាប់របស់លោក George Floyd កាលពីថ្ងៃទី ២៥ ខែឧសភា កន្លងទៅ ជាបុរសជនជាតិអាមេរិកស្បែកខ្មៅម្នាក់គ្មានអាវុធនៅក្នុងដៃ ដែលត្រូវបានគេមុជក្បាលនៅលើដីជិត ៩ នាទី នៅក្រោមជង្គង់របស់ប៉ូលិសស្បែកសម្នាក់ ដែលមិនបានអើពើចំពោះការអង្វរសុំទុកជីវិតឲ្យលោកនោះទេ។
នៅក្នុងទីក្រុងវ៉ាស៊ីនតោនវិញ ប៉ូលិសសហព័ន្ធកាលពីថ្ងៃចន្ទបានបាញ់គ្រាប់កាំភ្លើងកៅស៊ូ និងឧស្ម័នបង្ហូរទឹកភ្នែកយ៉ាងសាហាវទៅលើហ្វូងបាតុកម្មដោយសន្តិវិធីមួយនៅកន្លែងសួនច្បារឡាហ្វាយីតទី នៅខាងក្រៅសេតវិមាន ដោយបានបើកផ្លូវឲ្យលោក ដូណាល់ ត្រាំ ដើរឆ្លងកាត់ទៅកាន់ព្រះវិហារប្រវត្តិសាស្ត្រមួយ ដែលបានធ្វើឲ្យខូចខាតកាលពីយប់ថ្ងៃអង្គារ។
ដោយនឹកស្រមៃដល់កាលពីអាមេរិកបានគ្រប់គ្រងប្រទេសអ៊ីរ៉ាក់ ក្រុមយោធាឧទ្ធម្ភាគចក្របានហោះសំកាំងពីលើហ្វូងបាតុករ នៅក្នុងទីប្រជុំជនទីក្រុងវ៉ាស៊ីនតោន ខណៈក្រុមអ្នកតវ៉ាបានយកដំឥដ្ឋគប់យ៉ាងទ្រហឹងពេញទីក្រុង ដែលពួកគេបានផ្គើនទៅនឹងការដាក់បម្រាមគោចរ។
លោក ត្រាំ បានថ្លែងនៅលើគេហទំព័រធ្វីធើរជុំវិញការឆ្លើយតបនៅក្រុងវ៉ាស៊ីនតោន ដោយចោទប្រកាន់មេដឹកនាំទីក្រុងញូវយ៉កពីបទបង្កសកម្មភាពឧក្រិដ្ឋកម្ម៕ AFP/SK