សមុទ្រមេឌីទែរ៉ានេ៖ អ្នកប្រតិបត្តិការនាវា និងរដ្ឋាភិបាលបានថ្លែងថា ប្រទេសអ៊ីតាលី កាលពីថ្ងៃអាទិត្យបានអនុញ្ញាតឲ្យនាវាសង្គ្រោះ Ocean Viking ផ្ទេរក្រុមជនចំណាកស្រុកចំនួន ១៨០ នាក់ ដែលបានជួយសង្គ្រោះ នៅក្នុងមហាសមុទ្រមេឌីទែរ៉ានេ ទៅឲ្យនាវាមួយនៅក្នុងតំបន់ស៊ីស៊ីលី ដើម្បីដាក់ឲ្យនៅដាច់ដោយឡែកពីគេ។
ក្រុមអ្នកដែលនៅលើនាវាបានបង្ហាញការសប្បាយរីករាយយ៉ាងខ្លាំង ជាមួយសេចក្តីប្រកាសថា ការឈឺចាប់របស់ពួកគេនៅចំពេលមានលក្ខខណ្ឌដាក់ការរឹតត្បិតនៅលើនាវា Ocean Viking នឹងត្រូវបានបញ្ចប់ក្នុងពេលឆាប់ៗនេះ ដោយមានក្រុមជនចំណាកស្រុកមួយចំនួនបានច្រៀងចម្រៀង ការទះដៃ និងការថតរូបសែលហ្វ៊ីជាមួយគ្នានៅទីនោះ។
អ្នកនាំពាក្យនាវាសប្បុរសធម៌ SOS Mediterranee បានថ្លែងប្រាប់កាសែត AFP ដែលមានអ្នកឆ្លើយឆ្លងព័ត៌មានម្នាក់នៅលើនាវានោះថា៖ «យើងបានទទួលបញ្ជាពីអាជ្ញាធរដែនសមុទ្រអ៊ីតាលី ឲ្យនាវាចូលចតនៅកំពង់ផែក្រុង Porto Empedocle» នោះ។
លោក រ៉ាប៊ូល មានវ័យ ២៧ ឆ្នាំ មកពីប្រទេសបង់ក្លាដែស បាននិយាយថា៖ «យើងសប្បាយយ៉ាងខ្លាំង យើងបានធ្វើដំណើរដ៏វែងឆ្ងាយមួយ ប្រទេសលីប៊ី គឺដូចជាឋាននរក ហើយបច្ចុប្បន្នយ៉ាងហោចណាស់ យើងអាចមើលឃើញទីបញ្ចប់។ ខ្ញុំចង់ប្រាប់គ្រួសារខ្ញុំថា ខ្ញុំមានជីវិតនៅឡើយទេ»៕ AFP/SK