ក្រុងញូវយ៉កៈ កាលពីថ្ងៃសៅរ៍ អ៊ីរ៉ង់បានព្រមានថា ខ្លួនបានត្រៀមបន្តកម្មវិធីនុយក្លេអ៊ែររបស់ខ្លួន ប្រសិនបើអាមេរិកបោះបង់ចោលកិច្ចព្រមព្រៀងនុយក្លេអ៊ែរឆ្នាំ ២០១៥ បាននិយាយថា វិធានការជាច្រើនកំពុងត្រូវបានពិចារណាដើម្បីឆ្លើយតបទៅនឹងការចាកចេញរបស់អាមេរិកនោះ។
រដ្ឋមន្ត្រីការបរទេសអ៊ីរ៉ង់លោកមហាម៉ាដចាវ៉ាដ ហ្សារិហ្វ បានថ្លែងប្រាប់ក្រុមអ្នកកាសែតនៅក្នុងក្រុងញូវយ៉កថា អ៊ីរ៉ង់ មិនស្វះសែ្វងទិញគ្រាប់បែកនុយក្លេអ៊ែរទេ ប៉ុន្តែថា លទ្ធភាពការឆ្លើយតបទៅនឹងការដកខ្លួនចេញរបស់អាមេរិកពីកិច្ចព្រមព្រៀង នឹងត្រូវចាប់ផ្តើមផលិតកម្មអ៊ុយរ៉ានីញ៉ូមជាថ្មី ជាធាតុផ្សំដ៏សំខាន់សម្រាប់ផលិតគ្រាប់បែក។
លោកហ្សារិហ្វ ដែលកំពុងនៅអាមេរិក ដើម្បីចូលរួមជំនួបមួយរបស់អង្គការសហប្រជាជាតិស្តីពីការរក្សាសន្តិភាព បានបន្ថែមទៀតថា៖ «អាមេរិកមិនដែលខ្លាចអ៊ីរ៉ង់ផលិតគ្រាប់បែកនុយក្លេអ៊ែរទេ ប៉ុន្តែយើងនឹងបន្តការផលិតសារធាតុអ៊ុយរ៉ានីញ៉ូមរបស់យើង»។
ប្រធានាធិបតីអាមេរិកលោកដូណាល់ ត្រាំ បានកំណត់ឱសានវាទថ្ងៃទី ១២ ខែឧសភាសម្រាប់ប្រទេសនៅអឺរ៉ុបកែប្រែលក្ខខណ្ឌ នៃកិច្ចព្រមព្រៀងនុយក្លេអ៊ែរឆ្នាំ ២០១៥ ដែលឲ្យអ៊ីរ៉ង់កាត់បន្ថយកម្មវិធីផលិតអាវុធនុយក្លេអ៊ែរ ជាថ្នូរនឹងទណ្ឌកម្មហិរញ្ញវត្ថុ។
សម្តីរបស់លោកហ្សារិហ្វ បានបង្ហាញពីការបន្តប្រើវោហារស័ព្ទខ្លាំងៗ បន្ទាប់ពីមានការព្រមានមួយកាលពីដើមខែនេះពីប្រធានាធិបតីអ៊ីរ៉ង់លោកហាសាន រ៉ូហានីថា ក្រុងវ៉ាស៊ីនតោននឹងសោកស្តាយដោយសារការដកខ្លួនចេញពីកិច្ចព្រមព្រៀងនោះហើយ អ៊ីរ៉ង់នឹងឆ្លើយតបក្នុងរយៈពេលមួយសប្តាហ៍បើអាមេរិកដកខ្លួន។
ជោគវាសនារបស់កិច្ចព្រមព្រៀងនោះ គឺជាបញ្ហាសំខាន់មួយក្នុងអំឡុងទស្សនកិច្ចផ្លូវរដ្ឋរបស់លោកអេម៉ានុយអែល ម៉ាក្រុងទៅកាន់ក្រុងវ៉ាស៊ីនតោននៅថ្ងៃចន្ទនេះ៕