កាលពីថ្ងៃសៅរ៍ ទី ៩ មករា ប្រធានាធិបតីអ៊ីរ៉ង់ លោក Hassan Rouhani បានប្រកាសថា ក្រុមហ៊ុនបរទេសនឹងមិនត្រូវអនុញ្ញាតឱ្យធ្វើការសាកល្បងវ៉ាក់សាំងកូវីដ ១៩ លើប្រជាជនអ៊ីរ៉ង់ទេ ដែលការប្រកាសនេះបានធ្វើឡើង ១ ថ្ងៃបន្ទាប់ពីមេដឹកនាំកំពូលអ៊ីរ៉ង់លោក Ayatollah Ali Khameni ធ្វើការបិទការនាំចូលវ៉ាក់សាំងផលិតដោយសហរដ្ឋអាមេរិក និងចក្រភពអង់គ្លេស។
«ក្រុមហ៊ុនបរទេសចង់ផ្ដល់វ៉ាក់សាំងឱ្យយើង ដើម្បីធ្វើការសាកល្បងវ៉ាក់សាំងលើប្រជាជនអ៊ីរ៉ង់។ ប៉ុន្តែក្រសួងសុខាភិបាលបានរារាំង»។ លោក Rouhani បាននិយាយបែបនេះ ក្នុងការថ្លែងសុន្ទរកថា ផ្សាយតាមទូរទស្សន៍ហើយនិយាយបន្តថា៖ «ប្រជាជនរបស់យើងនឹងមិនធ្វើជាឧបករណ៍សាកល្បងរបស់ក្រុមហ៊ុនផលិតវ៉ាក់សាំងទេ»។
លោក Rouhani បាននិយាយបន្ថែមទៀតថា៖ «យើងនឹងទិញវ៉ាក់សាំងបរទេសដែលមានសុវត្ថិភាព»។
ប្រធានាធិបតីរូបនេះ មិនបានបញ្ជាក់អត្តសញ្ញាណ ឬប្រទេសដើមនៃក្រុមហ៊ុនផលិតវ៉ាក់សាំងបរទេសដែលលោកលើកឡើងក្នុងការថ្លែងសុន្ទរកថារបស់លោកនោះទេ។
ការប្រកាសរបស់លោក Rouhani គឺហាក់ដូចជាផ្ទុយការប្រកាសរបស់ប្រទេសគុយបា ដែលបាននិយាយថា ពួកគេបានចុះហត្ថលេខាលើកិច្ចព្រមព្រៀងជាមួយប្រទេសអ៊ីរ៉ង់ ដើម្បីផ្ទេរបច្ចេកវិទ្យាវ៉ាក់សាំងរបស់ពួកគេ និងធ្វើការសាកល្បងដំណាក់កាលចុងក្រោយនៅក្នុងសាធារណរដ្ឋអ៊ីស្លាមនេះ។
សារព័ត៌មានអ៊ីរ៉ង់បានរាយការណ៍ថា ក្រសួងសុខាភិបាលអ៊ីរ៉ង់នឹងជ្រើសរើសអ្នកស្ម័គ្រចិត្តចំនួន ៥០ ០០០ នាក់ ដើម្បីធ្វើការសាកល្បងដំណាក់កាលទី៣ នៃវ៉ាក់សាំង Soberana 2 (អធិបតេយ្យ ២) របស់គុយបា។
មេដឹកនាំកំពូលអ៊ីរ៉ង់លោក Khameni ដែលមានអំណាចលំដាប់ខ្ពស់ក្នុងអ៊ីរ៉ង់ កាលពីថ្ងៃសុក្រទី ៨ បានចេញបញ្ជាហាមឃាត់ការនាំចូលវ៉ាក់សាំងផលិតដោយអាមេរិក និងអង់គ្លេសដោយលើកឡើងថា ប្រទេសទាំង ២ នេះគឺ «មិនអាចទុកចិត្តបាន» ហើយអាចមានបំណងធ្វើឱ្យមានការរាលដាលជំងឺកូវីដ ១៩ ទៅប្រទេសផ្សេង។
ក្នុងការថ្លែងសុន្ទរកថា ផ្សាយផ្ទាល់លើទូរទស្សន៍លោក Khameni បាននិយាយថា៖ «ការនាំចូលវ៉ាក់សាំងសហរដ្ឋអាមេរិក និងចក្រភពអង់គ្លេសចូលក្នុងប្រទេសគឺត្រូវបានហាមឃាត់។ ពួកគេគឺមិនអាចទុកចិត្តបានទេ។ ពួកគេទំនងចង់បំពុលប្រទេសផ្សេង»។
លោកបានបន្តទៀតថា៖ «តាមបទពិសោធរបស់យើងជាមួយនឹងការផ្គត់ផ្គង់ឈាមដែលមានផ្ទុកមេរោគអេដស៍ដោយបារាំង វ៉ាក់សាំងបារាំងក៏មិនអាចទុកចិត្តផងដែរ»។ លោក Khameni គឺនិយាយសំដៅទៅរឿងអាស្រូវការផ្គត់ផ្គង់ឈាមកខ្វក់កាលពីទសវត្សរ៍ឆ្នាំ ១៩៨០ និង ១៩៩០។
បន្ទាប់មក លោក Khameni បានធ្វើការចោទប្រកាន់ដដែលនៅក្នុងការបង្ហោះសារទៅកាន់បណ្ដាញសង្គម Twitter ដែលក្រោយមកសារនេះត្រូវបានក្រុមហ៊ុន Twitter លុបចោលដោយក្រុមហ៊ុនបានលើកឡើងថា សារលោក Khameni បានរំលោភលើគោលការណ៍ប្រឆាំងនឹងព័ត៌មានមិនពិត។
ការប្រកាសរបស់មេដឹកនាំអ៊ីរ៉ង់ទាំង ២ រូបនេះ គឺជាផ្នែកមួយនៃសកម្មភាពមួយចំនួនកើតឡើងក្នុងសប្ដាហ៍មុន ដែលបង្កើនភាពតានតឹងជាមួយប្រទេសអាមេរិក។ កាលពីថ្ងៃចន្ទទី ៤ អ៊ីរ៉ង់ បានប្រកាសថា ពួកគេបានចាប់ផ្ដើមឡើងវិញនូវការបន្សុទ្ធសារធាតុអ៊ុយរ៉ានីញ៉ូមដល់កម្រិតបរិសុទ្ធ ២០% ដែលហួសពីដែនកំណត់ចែងនៅក្នុងកិច្ចព្រមព្រៀងនុយក្លេអ៊ែរឆ្នាំ ២០១៥។
នៅថ្ងៃដដែលកងការពារបដិវត្តន៍អ៊ីរ៉ង់បានរិបអូសនាវាដឹកសារធាតុគីមីរបស់កូរ៉េខាងត្បូង ដើម្បីធ្វើការចរចាការដោះលែងប្រាក់ទិញវ៉ាក់សាំងរបស់ខ្លួន ដែលត្រូវបានបង្កកតាមសំណើរបស់សហរដ្ឋអាមេរិក។ កាលពីថ្ងៃសុក្រ អ៊ីរ៉ង់បានបង្ហាញមូលដ្ឋានមីស៊ីលក្រោមដី នៅឆ្នេរនៃឈូងសមុទ្រពែរ្ស។
អ្នកវិភាគមួយចំនួនបានគិតថា សកម្មភាពទាំងនេះ គឺបង្ហាញថា អ៊ីរ៉ង់មានបំណងជំរុញឱ្យប្រធានាធិបតីជាប់ឆ្នោត Joe Biden ដែលនឹងចូលកាន់អំណាចនៅថ្ងៃ ២០ ខែមករា ដកទណ្ឌកម្មរបស់ប្រធានាធិបតី Donald Trump ចេញជាបន្ទាន់ និងដោយគ្មានលក្ខខណ្ឌ។
លោក Biden និយាយថា ពេលដែលលោកចូលកាន់អំណាចរដ្ឋបាលលោកនឹងធ្វើការចរចា ដើម្បីស្ដារកិច្ចព្រមព្រៀងនុយក្លេអ៊ែរជាមួយអ៊ីរ៉ង់។ ក្នុងការថ្លែងសុន្ទរកថាខាងលើ លោក Khmeni ក៏បាននិយាយថា ក្រុងតេអេរ៉ង់មិនប្រញាប់ប្រញាល់ចូលកិច្ចព្រមព្រៀងជាមួយអាមេរិកឡើងវិញទេ ប៉ុន្តែលោកបានបន្តធ្វើការទាមទារឱ្យដកការដាក់ទណ្ឌកម្មលើប្រទេសរបស់លោកជាបន្ទាន់។
ភាពតានតឹងរវាងអ៊ីរ៉ង់ និងសហរដ្ឋអាមេរិកបានកើតឡើងជាថ្មីកាលពីដើមឆ្នាំ ២០១៨ បន្ទាប់ពីរដ្ឋបាលលោក Trump បានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ ហើយធ្វើការដាក់ទណ្ឌកម្មលើក្រុងតេអេរ៉ង់ឡើងវិញ ដើម្បីដាក់សម្ពាធអ៊ីរ៉ង់ឱ្យចរចារឹតបន្តឹង លើកម្មវិធីនុយក្លេអ៊ែររបស់ខ្លួនការអភិវឌ្ឍកម្មវិធីមីស៊ីល និងការប្រើប្រាស់កងកម្លាំងប្រូកស៊ីនៅក្នុងតំបន់។
ក្នុងរយៈពេលប៉ុន្មានឆ្នាំបន្ទាប់ពីភាពតានតឹងរវាងប្រទេសទាំង ២ កាន់តែកើនឡើងដោយសារការដាក់ទណ្ឌកម្មបន្តបន្ទាប់ក្នុងយុទ្ធនាការ «សម្ពាធអតិបរមា» របស់ក្រសួងការបរទេសអាមេរិក។ ភាពតានតឹងឈានដល់ចំណុចកំពូលនៅពេលដែលអាមេរិកបានសម្លាប់មេបញ្ជាការឆ្មាំបដិវត្តន៍ ១ រូប លោក Qasem Solei mani កាលពីដើមឆ្នាំ ២០២០ នៅក្នុងប្រទេសអ៊ីរ៉ាក់៕