ក្រុងតេអេរ៉ង់៖ ប្រទេសអ៊ីរ៉ង់បានព្រមានកាលពីថ្ងៃសៅរ៍ ប្រឆាំងរាល់ការ «ឈ្លានពាន» ណាមួយ ដោយប្រទេសអាមេនី និងកងកម្លាំងអាស៊ែបៃហ្សង់ ដែលបានប្រយុទ្ធគ្នា ជុំវិញតំបន់ជម្លោះណាហ្គូរណូ និងការ៉ាបាក់ហ៍ ក្រោយពីមានការបាញ់កាំភ្លើងត្បាល់ ទៅលើភូមិអ៊ីរ៉ង់មួយចំនួន នៅតាមបណ្តោយព្រំដែន។
អ្នកនាំពាក្យរដ្ឋមន្ត្រីការបរទេស គឺលោក សាអ៊ីដ ហ្គាទីបហ្សាដេហ៍ បានថ្លែងនៅក្នុងសេចក្តីថ្លែងការណ៍មួយថា៖ «ការឈ្លានពានណាមួយ ទៅលើទឹកដីរបស់ប្រទេសយើងរបស់ភាគីជម្លោះណាមួយនោះ គឺមិនអាចអត់ឱនឲ្យបានជាដាច់ខាត ហើយយើងសូមព្រមានយ៉ាងដាច់អហង្ការថា គ្រប់ភាគីទាំងអស់ ត្រូវមានការប្រុងប្រយ័ត្នជាចាំបាច់ចំពោះបញ្ហានេះ»។
លោកបានអំពាវនាវឲ្យបញ្ចប់ការប្រយុទ្ធគ្នា រវាងប្រទេសទាំង ២ ហើយបាននិយាយថា ប្រទេសអ៊ីរ៉ង់ បានត្រៀមលក្ខណៈរួចជាស្រេច ដើម្បីសម្រួលឲ្យមានកិច្ចពិភាក្សាទាំងនេះ។
ប្រទេសអាមេនី និងអាស៊ែបៃហ្សង់ បានជាប់គាំងអស់រយៈពេលជាច្រើនទសវត្សរ៍ នៅក្នុងជម្លោះមួយ ជុំវិញតំបន់ណាហ្គូរណូ និងការ៉ាបាក់ហ៍ ជាតំបន់កុលសម្ព័ន្ធអាមេនីមួយ របស់ប្រទេសអាស៊ែបៃហ្សង់ ដែលបានបំបែកខ្លួនចេញពីទីក្រុងបាគូ នៅក្នុងសង្គ្រាមទសវត្សរ៍ឆ្នាំ ១៩៩០ ដែលកន្លងទៅបានផ្តាច់ជីវិតមនុស្ស ប្រហែល ៣០ ០០០ នាក់។
ភាគីទាំង ២ បានផ្គើនទៅនឹង ការអំពាវនាវរបស់អន្តរជាតិឲ្យមានបទឈប់បាញ់ ១ ហើយបានចោទប្រកាន់ភាគីផ្សេងទៀត ពីបទចាប់ផ្តើមបើកការវាយប្រហារថ្មី ដែលបានផ្ទុះឡើងកាលពីថ្ងៃអាទិត្យមុន ត្រូវបានគេមើលឃើញថា មានការប្រយុទ្ធយ៉ាងខ្លាំង៕ AFP/SK