ក្រុងតេអេរ៉ង់៖ ប្រទេសអ៊ីរ៉ង់ កំពុងឃ្លាំមើលការវិវឌ្ឍជាច្រើននៅក្នុងប្រទេសលីបង់ យ៉ាងយកចិត្តទុកដាក់បំផុត ដោយមានការព្រួយបារម្ភអំពីការបាត់បង់ឥទ្ធិពលណាមួយ ដែលទទួលបានដោយលំបាករបស់ខ្លួន ក្រោយពីការផ្ទុះទ្រង់ទ្រាយធំ បណ្តាលឲ្យមនុស្សស្លាប់យ៉ាងច្រើននៅក្នុងទីក្រុងបេរូត បានបង្កឲ្យមានការផ្ទុះកំហឹងទាមទារឲ្យធ្វើកំណែទម្រង់ប្រព័ន្ធតុល្យភាពទន់ខ្សោយរបស់ខ្លួនឡើងវិញនៅក្នុងប្រទេសនេះ។
១ សប្តាហ៍ ក្រោយពីការផ្ទុះឃ្លាំងស្តុកសារធាតុគីមី ដែលបានបង្កឲ្យមានការបំផ្លិចបំផ្លាញនៅទូទាំងរដ្ឋធានីលីបង់ ជាប្រទេសសំខាន់មួយនៅមហាសមុទ្រមេឌីទែរ៉ាណេភាគខាងកើត នៅតែងាយទទួលរងការប៉ះពាល់។
ប្រជាជនលីបង់បាននាំគ្នាចេញតវ៉ានៅតាមដងផ្លូវ ជុំវិញមហន្តរាយដែលបានផ្តាច់ជីវិតមនុស្សយ៉ាងតិច ១៥៨ នាក់ និង ៦ ០០០ នាក់ផ្សេងទៀតរងរបួស ដោយពួកគេបានអំពាវនាវឲ្យធ្វើកំណែទម្រង់ និងផ្លាស់ប្តូរទ្រង់ទ្រាយធំ នៅក្នុងប្រទេសលីបង់។
កាលពីល្ងាចថ្ងៃចន្ទ លោកនាយករដ្ឋមន្ត្រី ហាស្សាន ឌៀប បានប្រកាសអំពីការលាលែងពីតំណែងរបស់រដ្ឋាភិបាលលោក ដោយបានបង្កឲ្យមានចលាចលកាន់តែខ្លាំងឡើងនៅពេលខាងមុខនេះ។
ខណៈអ្នកតវ៉ាខ្លះ បានស្រែកពាក្យស្លោកប្រឆាំងចលនាហេបូឡាហ៍ស៊ីអ៊ីតគាំទ្រដោយអ៊ីរ៉ង់ដ៏មានអំណាចនៅលីបង់ ពួកគេភាគច្រើនបានបង្ហាញឲ្យឃើញកំហឹងរបស់ពួកគេ ប្រឆាំងនឹងមេដឹកនាំគ្រប់គ្រងអំណាចដែលបានប្រព្រឹត្តអំពើពុករលួយ និងអសមត្ថភាពបង្កឲ្យមានសោកនាដកម្មកាលពីថ្ងៃទី ៤ ខែសីហា៕ AFP/SK