ក្រុងតេអេរ៉ង់៖ ប្រធានាធិបតីអ៊ីរ៉ង់ លោក ហាស្សាន រូហានី បានប្រកាសកាលពីថ្ងៃអាទិត្យថា «ថវិកាសម្រាប់ទប់ទល់» ប្រឆាំងការដាក់ទណ្ឌកម្មរបស់អាមេរិក ដែលមានគោលដៅទៅលើវិស័យប្រេងដ៏សំខាន់របស់ប្រទេសមួយនេះដែលបានគាំទ្រដោយការវិនិយោគរបស់ប្រទេស រុស្ស៊ី ចំនួន ៥ ពាន់លានដុល្លារ។
លោក ហាស្សាន រូហានី បានថ្លែងថា គោលដៅត្រូវបានកាត់បន្ថយ «ទុក្ខលំបាកនានា» នៅក្នុងសាធារណរដ្ឋអ៊ិស្លាមដែលបានដំឡើងថ្លៃប្រេងខ្ពស់កាលពីខែមុន បានបង្កឲ្យមានការធ្វើបាតុកម្មនៅទូទាំងប្រទេស ដែលបណ្តាលឲ្យមនុស្សស្លាប់អស់ជាច្រើននាក់នៅអ៊ីរ៉ង់។
ការដាក់ទណ្ឌកម្មរបស់អាមេរិកបានធ្វើឡើងកាលពីឆ្នាំ ២០១៨ នៅក្នុងជម្លោះដ៏ជូរចត់មួយបានផ្តោតទៅលើកម្មវិធីអាវុធនុយក្លេអ៊ែររបស់អ៊ីរ៉ង់ នៅក្នុងនោះមានការហាមប្រាមទៅលើវិស័យលក់ប្រេងឥន្ធនៈ ដែលក្រុងវ៉ាស៊ីនតោន មានគោលបំណងចង់កាត់បន្ថយឲ្យនៅត្រឹមសូន្យ ទាំងស្រុងនៅក្នុងយុទ្ធនាការ «ដាក់សម្ពាធអតិបរមា»។
ប្រទេស អ៊ីរ៉ង់ បានទទួលការឈឺចាប់ដោយសារសេដ្ឋកិច្ចធ្លាក់ចុះយ៉ាងខ្លាំង ដោយមានរូបិយវត្ថុធ្លាក់ចុះ ដែលបានធ្វើឲ្យអតិផរណាឡើងខ្ពស់ និងជំរុញឲ្យមានការនាំចូល។
លោក ហាស្សាន រូហានី បានថ្លែងប្រាប់សភាថា ថវិកាចំនួន ៣៦ ពាន់លានដុល្លារ ត្រូវបានបង្កើតឡើង ដើម្បីជួយដល់ប្រជាជនអ៊ីរ៉ង់ដែលមានទុក្ខលំបាកនៅក្នុងប្រទេស។
លោក រូហានី បានថ្លែងថា៖ «យើងបានដឹងថា ស្ថិតនៅក្នុងស្ថានការណ៍នៃការដាក់ទណ្ឌកម្ម និងសម្ពាធនោះ ប្រជាជនអ៊ីរ៉ង់គឺមានផលលំបាកយ៉ាងខ្លាំង នៅក្នុងជីវភាពរស់នៅរបស់ពួកគេ។ យើងបានដឹងថា ការទិញថាមពលរបស់ប្រជាជនអ៊ីរ៉ង់ បានធ្លាក់ចុះ»។
លោក រូហានី បានថ្លែងថា ថវិកាអាចទទួលបានប្រាក់ចំណេញពី «ការវិនិយោគ» ចំនួន ៥ ពាន់លានដុល្លារ ពីប្រទេស រុស្ស៊ី ដែលសភាកំពុងប្រជុំពិភាក្សាជាលើកចុងក្រោយ។
លោកបានថ្លែងថា៖ «យើងសង្ឃឹមថា ទឹកប្រាក់ចំនួន ៥ ពាន់លានដុល្លារ នឹងមកដល់ប្រទេស អ៊ីរ៉ង់ តាមរយៈគម្រោងផ្សេងៗដែលត្រូវបានប្រជុំសភាជាលើកចុងក្រោយ ឬដែលនឹងត្រូវបញ្ចប់នៅឆ្នាំ ២០២០ ខាងមុខនេះ»។
ប្រទេស អ៊ីរ៉ង់ និងរុស្ស៊ី បានពង្រឹងចំណងទាក់ទងនៅក្នុងរយៈពេលប៉ុន្មានឆ្នាំថ្មីៗនេះ ដោយប្រទេសទាំង ២ បានគាំទ្រប្រធានាធិបតីស៊ីរីលោក បាសារ អាល់-អាសាដ នៅក្នុងសង្គ្រាមស៊ីវិលរយៈពេល ៨ ឆ្នាំ នៅប្រទេស ស៊ីរី៕ AFP/SK