ក្រុងតេអេរ៉ង់ៈ ប្រទេស អ៊ីរ៉ង់ បានបដិសេធការអះអាងមួយ របស់រដ្ឋមន្ត្រីក្រសួងមហាផ្ទៃតួកគីថា ខ្លួនមិនបានចូលរួមនៅក្នុងប្រតិបត្តិការរួមគ្នាកាលពីថ្ងៃចន្ទ ដោយបានយកក្រុមឧទ្ទាម ឃើដនៅតំបន់ព្រំដែនជាគោលដៅ។
ក្នុងរយៈពេលប៉ុន្មានសប្តាហ៍ថ្មីៗនេះ ក្រុងអង់ការ៉ា បានលើកឡើងអំពីទស្សនវិស័យ នៃសកម្មភាពយោធារួមជាមួយក្រុងតេអេរ៉ង់ប្រឆាំងគណបក្សពលករឃើដ (PKK) និងសម្ព័ន្ធមិត្តរបស់ខ្លួន ប៉ុន្តែជាក់ស្តែងកាលពីថ្ងៃចន្ទជាលើកដំបូងហើយ ដែលខ្លួនបាននិយាយអំពីប្រតិបត្តិការរួមមួយ ដែលត្រូវបានគេធ្វើឡើង។
ទីភ្នាក់ងារសារព័ត៌មាន IRNA ផ្លូវការបានដកស្រង់សម្តីប្រភពមួយនៅក្នុងអគ្គសេនាធិការចម្រុះ» ដោយបាននិយាយកាលពីល្ងាចថ្ងៃចន្ទថា៖ «កងកម្លាំងរបស់អ៊ីរ៉ង់គ្មានតួនាទីនៅក្នុងប្រតិបត្តិការនេះទេ»។
ប្រភពនោះបានបន្ថែមថា ទោះបីជាយ៉ាងណាក៏ដោយក៏អ៊ីរ៉ង់ «នឹងទប់ទល់ជាមួយក្រុមណាមួយដែលចង់បង្កភាពចលាចលនៅលើទឹកដីប្រទេសរបស់ពួកយើង»។
កាលពីព្រឹកថ្ងៃចន្ទ រដ្ឋមន្ត្រី មហាផ្ទៃតួកគី លោក Suleyman Soylu បានថ្លែងថា៖ «យើងចាប់ផ្តើមចូលរួមប្រតិបត្តិការមួយជាមួយអ៊ីរ៉ង់ប្រឆាំងក្រុម PKK នៅតាមព្រំដែនភាគខាងកើតរបស់យើង»។
លោក Soylu មិនបានបញ្ជាក់អំពីប្រតិបត្តិការរួមគ្រោងធ្វើឡើងនៅកន្លែងណានៅឡើយទេ ប៉ុន្តែ ប្រធានាធិបតីតួកគី លោក រ៉េសិប តៃយីប អេរដូហ្គែន បានថ្លែងកាលពីពេលកន្លងទៅថា សកម្មភាពយោធារួមនឹងផ្តោតទៅលើមូលដ្ឋានចុងក្រោយរបស់ PKK នៅប្រទេស អ៊ីរ៉ាក់ នៅក្បែរកន្លែងព្រំដែនប្រសព្វគ្នារបស់ប្រទេសទាំង ៣ នោះ។
យោធាតួកគី បានបើកយុទ្ធនាការវាយប្រហារម្តងហើយម្តងទៀតប្រឆាំងនឹងកងកម្លាំង PKK នៅជួរភ្នំអ៊ីរ៉ាក់ភាគខាងជើងជាគោលដៅនៅអំឡុងពេលយុទ្ធនាការវាយលុកអស់រយៈពេលជាង ៣ ទសវត្សរ៍របស់ខ្លួន ដើម្បីកម្ទេចយុទ្ធនាការរបស់ក្រុមឧទ្ទាមគ្រប់គ្រងដោយឃើដ នៅក្នុងប្រទេស តួកគី ភាគអាគ្នេយ៍។
នៅក្នុងរយៈពេលប៉ុន្មានឆ្នាំថ្មីៗនេះ ក្រុងតេអេរ៉ង់ បានបើកប្រតិបត្តិការយ៉ាងច្រើន នៅអ៊ីរ៉ាក់ភាគខាងជើងប្រឆាំងនឹងមូលដ្ឋានចុងក្រោយគួរឲ្យសង្ស័យរបស់ក្រុមសម្ព័ន្ធមិត្តមានទំនាក់ទំនងជាមួយអ៊ីរ៉ង់ឃើដ ដែលជាគណបក្សសេរីភាពឃើដ (PJAK)។
PJAK គឺជាក្រុមឧទ្ទាមមួយនៅក្នុងចំណោមឧទ្ទាមឃើដ ដែលបានវាយប្រហារទៅលើកងកម្លាំងសន្តិសុខអ៊ីរ៉ង់ នៅក្នុងស្រុកជនជាតិភាគតិចឃើដនៅតាមបណ្តោយព្រំដែន។
សម្ព័ន្ធមិត្ត PKK ផ្សេងទៀត ជាអង្គភាពការពារប្រជាជន (YPG) គឺជាក្រុមប្រដាប់អាវុធឃើដដ៏សំខាន់នៅស៊ីរី ដែលជាកន្លែងប្រព្រឹត្តអំពើយ៉ាងឃោរឃៅរបស់ក្រុងអង់ការ៉ា និងជាសម្ព័ន្ធមិត្តដ៏សំខាន់មួយនៅ ក្នុងយុទ្ធនាការដឹកនាំដោយអាមេរិក ប្រឆាំងក្រុម IS នៅ ពេលបច្ចុប្បន្ននេះ៕ AFP/SK