ក្រុងបាកដាដៈ ប្រទេសអ៊ីរ៉ាក់ កាលពីថ្ងៃអង្គារ បានថ្កោលទោសការវាយប្រហារផ្លូវអាកាស ដែលបានបង្កឲ្យមន្ត្រីអ៊ីរ៉ាក់ ២ នាក់ស្លាប់ និងទាហានម្នាក់ នៅក្នុងតំបន់ពាក់កណ្តាលស្វ័យយ័តឃើដឌីស្ថាន នៅប្រទេសអ៊ីរ៉ាក់ភាគខាងជើង។
ការិយាល័យប្រព័ន្ធផ្សព្វផ្សាយរបស់ប្រធានាធិបតីអ៊ីរ៉ាក់ បានថ្លែងនៅក្នុងសេចក្តីថ្លែងការណ៍មួយថា៖ «យើងថ្កោលទោសចំពោះការវាយប្រហារយ៉ាងខ្លាំង ដែលបានធ្វើឡើងដោយប្រទេសតួកគី តាមរយៈយន្តហោះចម្បាំងមួយគ្រឿង ដែលបានកំណត់គោលដៅទៅលើ តំបន់ស៊ីឌីកាន់ នៅក្នុងតំបន់ឃើដឌីស្ថាន»។
សេចក្តីថ្លែងការណ៍នោះ បានអំពាវនាវឲ្យបញ្ចប់ ការវាយប្រហារបែបនេះជាបន្ទាន់មួយ ដោយបានបន្ថែមថាភាគីទាំង ២ គួរអង្គុយតុចរចាជាមួយគ្នា ដើម្បីដោះស្រាយបញ្ហាព្រំដែនដោយមធ្យោបាយសន្តិវិធី និងនៅក្នុងឥរិយាបទមួយ ដែលរក្សាសន្តិសុខនិងស្ថិរភាពក្នុងតំបន់។
ចំណែកឯ លោក តាហ៍ស៊ីន អាល់-ហ្គាហ្វាជី ជាអ្នកនាំពាក្យទីបញ្ជាការប្រតិបត្តិ្កការរួមអ៊ីរ៉ាក់ (JOC) បានថ្លែងនៅក្នុងសន្និសីទសារព័ត៌មានមួយថា៖ «អ្វីដែលបានកើតឡើងនៅថ្ងៃនេះ គឺជាការវាយប្រហាររបស់តួកគីមួយ តាមរយៈយន្តហោះដ្រូនមួយគ្រឿង ដែលជាការអនុវត្តដ៏គ្រោះថ្នាក់មួយ»៕ Xinhua/SK