.jpg)
ក្រុងតេអេរ៉ង់ៈ លោករដ្ឋមន្ត្រីការបរទេសអ៊ីរ់ង់ ម៉ូហាម៉េដ ចាវ៉ាដ ហ្សារិហ្វ កាលពីថ្ងៃអង្គារបានស្នើឲ្យក្រុមប្រឹក្សាសន្តិសុខអង្គការសហប្រជាជាតិ អនុវត្តតាមគោលការណ៍ច្បាប់ក្នុងការធ្វើការសម្រេចចិត្តរបស់ខ្លួនទៅលើកិច្ចព្រមព្រៀងនុយក្លេអ៊ែរអ៊ីរ៉ង់។
លោក ហ្សារិហ្វ បានថ្លែងនៅលើគេហទំព័រធ្វីធើរក្រោយពីធ្វើការថ្លែងជាក់ស្តែងទៅកាន់ជំនួប UNSC កាលពីថ្ងៃអង្គារថា៖ «ជាទូទៅសហគមន៍អន្តរជាតិ និងក្រុមប្រឹក្សាសន្តិសុខអង្គការសហប្រជាជាតិជាពិសេសប្រឈមនឹងការសម្រេចចិត្តដ៏មានសារៈសំខាន់មួយៈតើយើងបន្តគោរពតាមគោលការណ៍ច្បាប់ ឬក៏ ត្រឡប់ទៅរកច្បាប់ព្រៃទៅវិញឬ?» ។
ការថ្លែងនៅលើធ្វីធើររបស់លោកហ្សារិហ្វបានកើតឡើងក្រោយពីរដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ កាលពីថ្ងៃអង្គារបានស្នើឲ្យក្រុមប្រឹក្សាសន្តិសុខអង្គការសហប្រជាជាតិបន្តហាមប្រាមទិញលក់អាវុធទៅលើប្រទេសអ៊ីរ៉ង់ ដែលនឹងផុតសុពលភាពនៅក្នុងខែតុលា ខាងមុខនេះ។
នៅក្រោមសេចក្តីសម្រេចលេខ ២២៣១ របស់ក្រុមប្រឹក្សាសន្តិសុខអង្គការសហប្រជាជាតិ ដែលអនុម័តកិច្ចព្រមព្រៀងនុយក្លេអ៊ែរអ៊ីរ៉ង់ ការហាមប្រាមលក់ដូរអាវុធទៅលើប្រទេសអ៊ីរ៉ង់ នឹងត្រូវដកនៅពាក់កណ្តាលខែតុលានោះ។ ក្រុងតេអេរ៉ង់បានថ្លែងថា ខ្លួននឹងមិនទទួលយកការបន្តបម្រាមលក់ដូរអាវុធនេះទេ៕ Xinhua/PSA
