ប្រទេសអ៊ីស្រាអែល បានយល់ព្រមផ្ទេរវ៉ាក់សាំងកូវីដ ១៩ ចំនួន ៥ ០០០ ដូស ទៅឱ្យប្រទេសប៉ាឡេស្ទីន ដើម្បីផ្ដល់ដល់បុគ្គលិកសុខាភិបាលជួរមុខ។ នេះបើតាមការប្រកាសកាលពីថ្ងៃអាទិត្យ ទី ៣១ ខែមករា ដោយខុទ្ទកាល័យរដ្ឋមន្ត្រីក្រសួងការពារជាតិអ៊ីស្រាអែលលោក Benny Gantz។
នេះគឺជាលើកដំបូងហើយដែលអ៊ីស្រាអែល បានបញ្ជាក់ពីការផ្ទេរវ៉ាក់សាំងទៅឱ្យប្រជាជនប៉ាឡេស្ទីន ដែលមិនទាន់បានទទួលវ៉ាក់សាំងណាមួយនៅឡើយ។ អាជ្ញាធរប៉ាឡេស្ទីន គឺកំពុងព្យាយាម ដើម្បីទទួលបាននូវវ៉ាក់សាំងតាមរយៈកម្មវិធី COVAX របស់អង្គការសុខភាពពិភពលោក។ ប៉ុន្តែកម្មវិធី COVAX ដែលមានគោលបំណងដើម្បីផ្ដល់វ៉ាក់សាំងសម្រាប់ប្រទេសខ្វះសមត្ថភាពទិញ មានភាពយឺតយ៉ាវក្នុងការចាប់ផ្ដើមទិញយក និងចែកចាយវ៉ាក់សាំងនៅឡើយ៕