ក្រុងហ៊្សេរុយសាឡិម៖ ប្រទេស អ៊ីស្រាអែល បានថ្លែងថា យន្តហោះចម្បាំងជាច្រើនគ្រឿងរបស់ខ្លួន បានបើកការវាយប្រហារប្រឆាំងទៅលើគោលដៅរបស់កងកម្លាំងអ៊ីរ៉ង់ និងយោធាស៊ីរីនៅប្រទេស ស៊ីរី កាលពីថ្ងៃពុធ នៅក្នុងការវាយប្រហារដែលក្រុមឃ្លាំមើលសិទ្ធិមនុស្សបានរាយការណ៍ថា មនុស្សយ៉ាងតិច ២៣ នាក់បានស្លាប់។
នៅក្នុងការអះអាងដ៏កម្រមួយអំពីប្រតិបត្តិការរបស់ពួកគេនៅប្រទេស ស៊ីរី យោធាអ៊ីស្រាអែលបានថ្លែងថា ពួកគេបានបើកការវាយប្រហារផ្លូវអាកាសរាប់សិបលើកទៅលើកងកម្លាំងអ៊ីរ៉ង់ និងយោធាស៊ីរី ក្នុងការឆ្លើយតបទៅនឹងរ៉ុក្កែត ៤ គ្រាប់ បានបាញ់ទៅអ៊ីស្រាអែលមុន ១ ថ្ងៃ។
ក្រុមឃ្លាំមើលសិទ្ធិមនុស្សស៊ីរីមានមូលដ្ឋាននៅអង់គ្លេស (SOHR) បានថ្លែងថា មនុស្ស ២៣ នាក់បានស្លាប់ នៅក្នុងការវាយប្រហារផ្លូវអាកាស នៅក្នុងនោះមានយុទ្ធជន ២១ នាក់ និងជនស៊ីវិល ២ នាក់។
ប្រមុខក្រុមសិទ្ធិមនុស្សលោក រ៉ាមីអាប់ឌែល រ៉ាហ៍ម៉ាន់ បានថ្លែងថា ១៦ នាក់ មិនមែនជាក្រុមយុទ្ធជនសកម្មប្រយុទ្ធស៊ីរីនោះទេ។
ប្រទេស អ៊ីរ៉ង់ បានចូលរួមប្រយុទ្ធជាមួយកងកម្លាំងរបស់ប្រធានាធិបតីស៊ីរីលោក បាសារ អាល់ អាសាដ នៅក្នុងសង្គ្រាមស៊ីវិលរយៈពេល ៨ ឆ្នាំរបស់ប្រទេសនេះ ដោយមានការព្រួយបារម្ភយ៉ាងខ្លាំងរបស់អ៊ីស្រាអែលចំពោះវត្តមានកងកម្លាំងរបស់គូសត្រូវស្លាប់រស់នៅតាមព្រំដែនប្រទេសរបស់ខ្លួន។
នៅក្នុងសេចក្តីថ្លែងការណ៍មួយ នាយករដ្ឋមន្ត្រីអ៊ីស្រាអែលលោក បេនចាមីន នេតានីយ៉ាហ៊ូ បានថ្លែងថា៖ «នរណាក៏ដោយបានធ្វើឲ្យយើងឈឺចាប់នោះ យើងនឹងធ្វើឲ្យគេនោះឈឺចាប់វិញ»។
«នេះគឺជាអ្វីដែលយើងបានវាយប្រហារនៅពេលយប់ ទៅលើគោលដៅយោធារបស់កងកម្លាំងការពារបដិវត្តន៍អ៊ីរ៉ង់ និងគោលដៅយោធាស៊ីរីនៅប្រទេស ស៊ីរី ក្រោយពីរ៉ុក្កែតជាច្រើនគ្រាប់ បានបាញ់ទៅលើប្រទេស អ៊ីស្រាអែល នោះ»។
យោធាអ៊ីស្រាអែលបានថ្លែងថា ពួកគេបានកំណត់គោលដៅទៅលើទីតាំងយោធាប្រហែល ១២ កន្លែង នៅក្នុងនោះមានឃ្លាំង និងមជ្ឈមណ្ឌលទីបញ្ជាការយោធាជាច្រើនទៀត។
អ្នកនាំពាក្យយោធាអ៊ីស្រាអែលបានប្រាប់ AFP ថា៖ «ការវាយប្រហារនោះ ពិតជាខ្លាំងណាស់»៕ AFP/SK