ក្រុងប្រ៊ុចសែល៖ អ្នកការទូតចំនួន ៤ រូបកាលពីថ្ងៃទី ១០ ឧសភាបាននិយាយថាសហភាពអឺរ៉ុបកំពុងត្រៀមដាក់ទណ្ឌកម្មជុំទី ៤ ប្រឆាំងនឹងមន្ត្រីជាន់ខ្ពស់ប្រទេសបេឡារុសជាការឆ្លើយតបទៅនឹងការបោះឆ្នោតប្រកួតប្រជែងប្រធានាធិបតីដ៏ចម្រូងចម្រាសកាលពីឆ្នាំមុនដោយកំណត់គោលដៅមន្ត្រីចំនួន ៥០ នាក់ចាប់ពីខែមិថុនា។
រដ្ឋមន្ត្រីការបរទេសសហភាពអឺរ៉ុបបានពិភាក្សាពីប្រទេសបេឡារុសកាលម្សិលមិញហើយក្រុមអ្នកការទូតបាននិយាយថាសមាជិកទាំង ២៧ រូបនៃប្លុកនេះ បានគាំទ្រចំពោះការដាក់ទណ្ឌកម្មបន្ថែមទៀត ប៉ុន្តែថាទីក្រុងប្រ៊ុចសែលត្រូវការប្រមូលភ័ស្តុតាងគ្រប់គ្រាន់ ដើម្បីផ្តល់នូវភាពត្រឹមត្រូវតាមច្បាប់។
ប្រធានគោលនយោបាយការបរទេសសហភាពអឺរ៉ុបលោក JosepBorrell ដែលជាប្រធាននៃកិច្ចប្រជុំបាននិយាយថា៖ «យើងកំពុងធ្វើការលើការដាក់ទណ្ឌកម្មជំហានបន្ទាប់ដែលខ្ញុំសង្ឃឹមថានឹងត្រូវបានអនុម័តនៅប៉ុន្មានសប្តាហ៍ខាងមុខនេះ»។
សហគមន៍អឺរ៉ុប និងសហរដ្ឋអាមេរិកចោទប្រកាន់ថាលោក Lukashenko នៅតែកាន់អំណាចដោយរៀបចំការបោះឆ្នោតក្លែងក្លាយការចាប់អ្នកប្រឆាំងដាក់គុក និងបំបិទសិទ្ធិសេរីភាពសារព័ត៌មានជាដើម។ រួមជាមួយគ្នានេះក្រុមប្រទេសខាងលើរួមទាំងអង់គ្លេស និងកាណាដាផងបានបង្កកទ្រព្យសម្បត្តិ និងហាមឃាត់ការធ្វើដំណើររបស់មន្ត្រីជិត ៩០ នាក់រួចមកហើយក្នុងនោះមានទាំងប្រធានាធិបតីបេឡារុសលោក Alexander Lukashenko ។ ការដាក់ទណ្ឌកម្មនេះធ្វើឡើងក្រោយការបោះឆ្នោតកាលពីខែសីហាឆ្នាំ ២០២០ ដែលបក្សប្រឆាំង និងប្រទេសលោកខាងលិចបានចោទថាមានការលួចបន្លំ។
ទោះយ៉ាងណាការឆ្លើយតបរបស់សហភាពអឺរ៉ុបលើកនេះហាក់មានទំហំតូចជាងមុនបើប្រៀបធៀបទៅនឹងការដាក់ទណ្ឌកម្មកាលពីឆ្នាំ ២០០៤ ដល់ឆ្នាំ ២០១៥ ដែលកាលនោះមនុស្សជាង ២០០ នាក់ត្រូវបានដាក់ក្នុងបញ្ជីខ្មៅ។
ប៉ូឡូញ និងលីទុយអានីដែលមេដឹកនាំបក្សប្រឆាំងបេឡារុសលោកស្រី SviatlanaTsikhanouskaya បានភៀសខ្លួនទៅ បន្ទាប់ពីការបោះឆ្នោតបានជំរុញឱ្យមានការដាក់ទណ្ឌកម្មបន្ថែមទៀត ខណៈដែលប្រទេសទាំង ២ នេះនិយាយថាវិធានការទណ្ឌកម្មលើប្រទេសសម្ព័ន្ធមិត្តរុស្ស៊ីមួយនេះ មានប្រសិទ្ធភាពតិចតួច។
លោក Lukashenko ដែលកាន់អំណាចតាំងពីឆ្នាំ ១៩៩៤ ធ្លាប់បាននិយាយថាលោកខាងលិចកំពុងជ្រៀតជ្រែកកិច្ចការផ្ទៃក្នុងរបស់ប្រទេសបេឡារុសហើយជាការឆ្លើយតបបេឡារុសក៏ចេញនូវបញ្ជរប្រឆាំងនឹងការដាក់ទណ្ឌកម្មរបស់សហភាពអឺរ៉ុប និងហាមឃាត់មន្ត្រីសហភាពអឺរ៉ុបមួយចំនួនមិនឱ្យចូលក្នុងប្រទេសនេះ៕
ហួន ឌីណា