ក្រុងមីននៀប៉ូលិស៖ ក្រុមអ្នកតវ៉ានៅអាមេរិកកាលពីថ្ងៃពុធ បានស្វាគមន៍ការចោទប្រកាន់ថ្មីៗប្រឆាំងមន្ត្រីក្រុងមីននៀប៉ូលិសចំពោះការស្លាប់របស់បុរសជនជាតិអាមេរិកដើមកំណើតអាហ្វ្រិក លោក George Floyd ប៉ុន្តែមនុស្សរាប់ពាន់នាក់នៅតែដើរហែក្បួននៅក្នុងក្រុងនានានៅទូទាំងប្រទេសនេះចំនួន ៩ យប់ជាប់ៗគ្នា ដោយបានស្រែកបន្ទរប្រឆាំងការប្រកាន់ពូជសាសន៍ និងអំពើសាហាវព្រៃផ្សៃរបស់ប៉ូលិស។
ទោះបីជាការទាមទារសំខាន់មួយត្រូវបានឆ្លើយតបក្តី ក៏ក្រុមបាតុករបានធ្វើការជួបជុំគ្នាទ្រង់ទ្រាយធំៗដោយសន្តិវិធី ដែលបានទាមទារឲ្យមានការផ្លាស់ប្តូរស៊ីជម្រៅ នៅក្នុងក្រុងជាច្រើនចាប់ពីក្រុងញូវយ៉ក ដល់ក្រុងឡូសអេនជឺលេស ប៉ុន្មានម៉ោងក្រោយពីការចោទប្រកាន់ថ្មីៗត្រូវបានគេប្រកាស។
សម្ពាធទៅលើលោកប្រធានាធិបតី ដូណាល់ ត្រាំ បានកើនឡើងយ៉ាងខ្លាំង ខណៈអតីតប្រមុខមន្ទីរបញ្ចកោណរបស់លោកគឺ លោក ជីម ម៉ាធីស បានចាប់ផ្តើមរិះគន់យ៉ាងធ្ងន់ៗ ដោយបានចោទប្រកាន់មេដឹកនាំសាធារណរដ្ឋរូបនេះថាបានព្យាយាមបំបែកអាមេរិក នៅក្នុងអំឡុងភាពចលាចលនេះ។
នៅក្នុងក្រុងមីនីសូតា ក្រុមរដ្ឋអាជ្ញាពីដំបូងបានចោទប្រកាន់លោក Derek Chauvin អាយុ ៤៤ ឆ្នាំ ជាមន្ត្រីស្បែកស ដែលត្រូវបានគេឃើញថា លោកយកជង្គង់ទៅសង្កត់ករបស់លោក Floyd រយៈពេលជិត ៩ នាទី ដែលជាអំពើឃាតកម្មកម្រិតទី ៣។
ប៉ុន្តែពួកគេបាននិយាយកាលពីថ្ងៃពុធថា ពួកគេកំពុងធ្វើការកែប្រែការចោទប្រកាន់អំពើឃាតកម្មនេះ មកត្រឹមអំពើឃាតកម្មកម្រិតទី ២ ដែលមិនទាក់ទិននឹងការគិតទុកជាមុនទេ ប៉ុន្តែត្រូវទទួលទោសតឹងរ៊ឹងបំផុត។
សហសេវិក ៣ រូបរបស់លោក Chauvin នៅកន្លែងកើតហេតុនៃការចាប់ខ្លួនលោក Floyd កាលពីថ្ងៃទី ២៥ ខែឧសភា ពីបទស្វះស្វែងរកទិញបារីដោយប្រើក្រដាសប្រាក់ក្លែងក្លាយត្រូវបានចោទប្រកាន់ពីបទសមគំនិតក្នុងអំពើឃាតកម្មនោះ។
លោក Tou Thao អាយុ ៣៤ ឆ្នាំ លោកJ. Alexander Kueng អាយុ ២៦ ឆ្នាំ និងលោក Thomas Lane អាយុ ៣៧ ឆ្នាំ ត្រូវបានចោទកាន់ពីបទជួយ និងញុះញង់ឲ្យមានអំពើឃាតកម្មកម្រិតទី ៣ ហើយត្រូវបានគេឃុំខ្លួន។
ការចាប់ខ្លួនមន្ត្រីទាំង ៤ រូបនេះ គឺជាការផ្តោតសម្រាប់អ្នកតវ៉ារាប់ម៊ឺននាក់ដែលបានហែក្បួនតាមផ្លូវនានានៃក្រុងជាច្រើននៅ US ជារឿយៗផ្គើននឹងបម្រាមគោចរ ដើម្បីថ្កោលទោសអំពើសាហាវព្រៃផ្សៃរបស់ប៉ូលិស និងទាមទាររកយុត្តិធម៌ឲ្យ George Floyd។
អតីតប្រធានាធិបតី លោក បារ៉ាក់ អូបាម៉ា បានសរសើរចំពោះ «ការផ្លាស់ប្តូរផ្នត់គំនិត» ដែលលោកឃើញក្នុងចំណោមប្រជាជន US ដោយទាមទាររកយុត្តិធម៌សម្រាប់ការប្រកាន់ពូជសាសន៍នេះ៕ AFP/PSA