.jpg)
តុលាការជាន់ខ្ពស់ Justice Graham Lang នៅក្រុង Gisborne នាព្រឹកថ្ងៃអង្គារនេះបានកាត់ទោសលោក John Bracken អាយុ ៥៥ ឆ្នាំឱ្យជាប់ពន្ធនាគារ ៨ ឆ្នាំ ៦ ខែជុំវិញករណីដែលលោកបន្លំពន្ធរត់គេចពីនាយកដ្ឋានពន្ធដារ IRD របស់នូវែលសេឡង់ចំនួន ១៧,៣ លានដុល្លារតាមរយៈបណ្ដឹងសំណងពន្ធទំនិញ និងសេវាកម្ម (GST ) ក្លែងក្លាយ។
សាក្សីម្នាក់របស់លោក Bracken បានជំទាស់យ៉ាងខ្លាំងទៅលើការកាត់ទោសនេះដោយលោកបានស្រែកថាករណីនេះនឹងត្រូវប្តឹងទៅឧទ្ធរណ៍ហើយតុលាការមិនមានយុត្តាធិការក្នុងការដាក់សម្រេចវានោះទេ ដោយថាវាបានប្រឆាំងនឹងគំនិតផ្តួចផ្តើមដែលបានព្រមព្រៀងគ្នាសម្រាប់ទំនាក់ទំនងល្អរវាងអាជ្ញាធរ Māori និង Pākehā ។
ការជំទាស់ទាំងនោះធ្លាប់ត្រូវបានចៅក្រមលើកយក និងច្រានចោល បន្ទាប់ពីការជំនុំជម្រះរយៈពេល ៨ ថ្ងៃកាលពីខែមីនាដែលបានរកឃើញថាមាន ៣៩ បទចោទប្រកាន់លើលោក Bracken ពីបទមិនស្មោះត្រង់ក្នុងការប្រើប្រាស់ឯកសារ ដើម្បីទទួលបានអត្ថប្រយោជន៍ហិរញ្ញវត្ថុ។
ការចោទប្រកាន់នីមួយៗតំណាងឱ្យរយៈពេលមួយរបស់ GST ចន្លោះខែសីហាឆ្នាំ ២០១៤ និងខែកក្កដាឆ្នាំ ២០១៨ និងពាក់ព័ន្ធទៅនឹងការនាំចេញរបស់ក្រុមហ៊ុន Bracken Enterprises Limited (BEL) - ដែលមិនមែនជាប្រតិបត្តិការកសិកម្ម Matawai របស់លោកដែលស្របច្បាប់នោះទេ។
ព្រះរាជអាជ្ញា Megan Mitchell នៅព្រឹកនេះបាននិយាយថាទោះបីជាចំនួនប្រាក់ក្លែងបន្លំត្រូវបានកាត់បន្ថយពី ១៧,៤ លានដុល្លារក៏ដោយ ក៏ចំនួននេះនៅតែរាប់ថាជាការបន្លំដ៏ធំបំផុតនៅក្នុងប្រវត្តិសាស្ត្រពន្ធរបស់នូវែលសេឡង់៕
ហួន ឌីណា
