រដ្ឋាភិបាលឥណ្ឌាបានប្រកាសឲ្យដឹងកាលពីថ្ងៃសៅរ៍ថា និយតករឱសថបានអនុញ្ញាតឱ្យប្រើប្រាស់វ៉ាក់សាំងចំនួន ២ ទី១ គឺរបស់ក្រុមហ៊ុនអង់គ្លេស/ស៊ុយអែត AstraZena និងសាកលវិទ្យាល័យ Oxford ហើយវ៉ាក់សាំងមួយទៀតផលិតដោយក្រុមហ៊ុនក្នុងស្រុក។
រដ្ឋមន្ត្រីក្រសួងព័ត៌មាន និងសោតទស្សន៍ឥណ្ឌាលោក Prakash Javadekar បាននិយាយថា ក្រុមអ្នកជំនាញបានអនុញ្ញាតឱ្យប្រើវ៉ាក់សាំង AstraZeneca/Oxford ក្នុងគ្រាអាសន្នតាំងពីថ្ងៃសុក្រ ទី ១ មករា ធ្វើឱ្យវ៉ាក់សាំងនេះក្លាយជាវ៉ាក់សាំងកូវីដ ១៩ ដំបូងគេ ដែលត្រូវបានអនុញ្ញាតឱ្យប្រើប្រាស់នៅក្នុងឥណ្ឌា។
លោក Javadekar បាននិយាយថា៖ «ឆ្នាំមុនបានចាប់ផ្ដើម ជាមួយកូរ៉ូណាប៉ុន្តែឆ្នាំនេះ កំពុងចាប់ផ្ដើមជាមួយវ៉ាក់សាំង»។
វ៉ាក់សាំងនេះ នឹងត្រូវផលិតក្នុងស្រុកក្រោមឈ្មោះ COVISHIELD ដោយវិទ្យាស្ថានសេរ៉ូមឥណ្ឌា (SII) ដែលជាផលិតករវ៉ាក់សាំងធំជាងគេក្នុងពិភពលោក បើគិតតាមបរិមាណ។ SII បានចាប់ផ្ដើមផលិតវ៉ាក់សាំង AstraZeneca ទ្រង់ទ្រាយធំតាំងពីមុនពេលចាប់ផ្ដើមការសាកល្បងមកម្ល៉េះហើយមកដល់ពេលនេះបានស្តុកទុកចំនួន ៥០ លានដូស ដែលនឹងត្រូវលក់ទៅឱ្យរដ្ឋាភិបាលក្នុងតម្លៃប្រហែល ២៥០ រូពី (៣,៤២ ដុល្លារ) ក្នុង ១ ដូស និង ១ ០០០ រូពី លើទីផ្សារឯកជន។ នាយកប្រតិបត្តិ SII បាននិយាយថា យ៉ាងហោចណាស់ ៥០% នៃវ៉ាក់សាំងដែលពួកគេផលិតនឹងត្រូវប្រើប្រាស់ក្នុងប្រទេសឥណ្ឌា។
វ៉ាក់សាំង AstraZeneca គឺងាយស្រួលផលិត ងាយស្រួលរក្សាទុក ងាយស្រួលប្រើប្រាស់ និងមានតម្លៃទាប បើប្រៀបធៀបជាមួយនឹងវ៉ាក់សាំងPfizer/BioNTech និងវ៉ាក់សាំង Morderna ធ្វើឱ្យវ៉ាក់សាំងនេះល្អសម្រាប់ប្រើប្រាស់ក្នុងប្រទេសដែលមានប្រជាជនច្រើន និងសម្បូរតំបន់ជនបទដូចជាប្រទេសឥណ្ឌា។
បើទោះជាយ៉ាងនេះក៏ដោយវ៉ាក់សាំង AstraZeneca បានបង្កឱ្យមានភាពមិនទុកចិត្តទាក់ទងនឹងភាពមិនច្បាស់លាស់ទំហំដូសដែលមានប្រសិទ្ធភាពល្អ។ កាលពីខែវិច្ឆិកា អ្នកវិទ្យាសាស្ត្របានរកឃើញថា វ៉ាក់សាំងនេះមានប្រសិទ្ធភាព ៦២% ក្រោយពីការចាក់ចំនួន ២ ដូស តែក្រោយមករកឃើញថា មានប្រសិទ្ធភាព ៩០% ក្នុងជនស្ម័គ្រចិត្តដែលត្រូវបានគេច្រឡំផ្ដល់ឱ្យពាក់កណ្ដាលដូសក្នុងការចាក់លើកទី១ និងដូសពេញនៅក្នុងការចាក់លើកទី២។
ក្នុងសេចក្ដីថ្លែងការណ៍មួយ រដ្ឋាភិបាលឥណ្ឌាបាននិយាយថា ការអនុញ្ញាតឱ្យប្រើប្រាស់គឺ «ស្ថិតក្រោមលក្ខខណ្ឌបទប្បញ្ញត្តិ» តែមិនបានផ្ដល់ព័ត៌មានលម្អិតអំពីលក្ខខណ្ឌទាំងនោះ។
វ៉ាក់សាំងមួយទៀតដែលរដ្ឋាភិបាលឥណ្ឌាបានអនុញ្ញាតឱ្យប្រើប្រាស់ គឺវ៉ាក់សាំង COVAXIN ផលិតក្នុងស្រុកដោយក្រុមហ៊ុន Bharat Biotech និងក្រុមប្រឹក្សាស្រាវជ្រាវវេជ្ជសាស្ត្រឥណ្ឌា។ ការអនុញ្ញាត នេះ បានធ្វើឡើង ខណៈពេលដែលមានព័ត៌មានជាសាធារណៈតិចតួចអំពីលទ្ធផលការសាកល្បងសុវត្ថិភាព និងប្រសិទ្ធភាពនៃវ៉ាក់សាំងនេះ។
សេចក្ដីថ្លែងការណ៍របស់រដ្ឋាភិបាលបាននិយាយថា រដ្ឋាភិបាលបាន «ផ្តល់ការអនុញ្ញាតសម្រាប់ការប្រើប្រាស់មានកម្រិតក្នុងស្ថានភាពអាសន្នក្នុងផលប្រយោជន៍សាធារណៈជាការប្រុងប្រយ័ត្នខ្ពស់ ក្នុងរបៀបជាការសាកល្បងគ្លីនិក ជាពិសេសក្នុងបរិបទនៃការឆ្លងវ៉ារ្យ៉ង់ថ្មី»។
ដំណាក់កាលចុងក្រោយនៃការអនុញ្ញាតឱ្យវ៉ាក់សាំងទាំង ២ នេះគឺការអនុម័តជាផ្លូវការដោយប្រធានរបស់អង្គការត្រួតពិនិត្យស្តង់ដាឱសថ ដែលគេរំពឹងថានឹងធ្វើឡើងនៅពេលឆាប់ៗ។ ឥណ្ឌាមានគម្រោងចាប់ផ្ដើមការចាក់វ៉ាក់សាំងនៅខែមករានេះ ដោយមានគោលដៅចាក់ជូនប្រជាជនចំនួន ៣០០ លាននាក់ក្នុងរយៈពេលពី ៦ ទៅ ៨ ខែខាងមុខ។ ក្រសួងសុខាភិបាលឥណ្ឌា គឺគ្រោងនឹងផ្តល់អាទិភាពចាក់ជូនបុគ្គលិកសុខាភិបាលជាង ៣០ លាននាក់ ដោយឥតគិតថ្លៃ។
ក្រៅពីវ៉ាក់សាំងទាំង ២ នេះ លោករដ្ឋមន្ត្រី Prakash Javadekar ក៏បានបង្ហាញផងដែរថា វ៉ាក់សាំង ២ ផ្សេងទៀតគឺកំពុងរង់ចាំការអនុញ្ញាតឱ្យប្រើប្រាស់ គឺវ៉ាក់សាំង ZyCoV-D ផលិតដោយក្រុមហ៊ុនក្នុងស្រុក Zydus Cadila និង Sputnik V របស់រុស្ស៊ី។
សេចក្ដីប្រកាសរបស់ឥណ្ឌាធ្វើឡើងប៉ុន្មានថ្ងៃបន្ទាប់ពីចក្រភពអង់គ្លេសបានធ្វើការអនុញ្ញាតឱ្យប្រើប្រាស់វ៉ាក់សាំង AstraZeneca/Oxford។
អង់គ្លេសបានមានផែនការចាប់ផ្ដើមការចែកចាយវ៉ាក់សាំងនេះនៅថ្ងៃទី ៤ ខែមករា ហើយមានគោលដៅឱ្យប្រជាជន ២ លាននាក់ទទួលបានដូសទី១ នៃវ៉ាក់សាំង AstraZeneca/Oxford ឬវ៉ាក់សាំង Pfizer/BioNTech នៅត្រឹមដំណាច់សប្ដាហ៍ដំបូងនៃឆ្នាំ ២០២១។
ដោយសារការកើនឡើងនូវករណីឆ្លង និងរកឃើញការរីករាលដាលវ៉ារ្យ៉ង់ថ្មី ដែលងាយជាងមុន នៅខាងត្បូងប្រទេសបានធ្វើឱ្យរដ្ឋាភិបាលចក្រភពអង់គ្លេស ក៏បានផ្លាស់ប្ដូរយុទ្ធសាស្ត្រមកធ្វើការចាក់វ៉ាក់សាំងដូសទី១ ឱ្យមនុស្សឱ្យច្រើនបំផុត ជាជាងរក្សាទុកវ៉ាក់សាំងសម្រាប់ការចាក់ដូសទី២ ដើម្បីបង្កើនចំនួនមនុស្សដែលទទួលបានវ៉ាក់សាំង។ ថ្មីៗនេះ រដ្ឋាភិបាលអង់គ្លេសបានចេញការអនុញ្ញាតឱ្យមនុស្សម្នាក់ចាក់វ៉ាក់សាំង ២ ប្រភេទផ្សេងគ្នា បើសិនដាច់ស្តុកវ៉ាក់សាំងដើមរបស់ពួកគេ។
ការណែនាំទាំង ២ នេះ ត្រូវរិះគន់ដោយអ្នកជំនាញជំងឺឆ្លងជាច្រើនថា គឺជាការប្រថុយរបស់រដ្ឋាភិបាលអង់គ្លេសដោយសារការសាកល្បងវ៉ាក់សាំងទាំង ២ មិនបានសិក្សាអំពីប្រសិទ្ធភាព និងសុវត្ថិភាពនៃការពង្រីកគម្លាតរវាងការចាក់ដូសនីមួយៗ និងការចាក់វ៉ាក់សាំងលាយគ្នាទេ។ អ្នកវិភាគមួយចំនួនបានគិតថា ការណែនាំនេះអាចកាត់បន្ថយការជឿទុកចិត្តលើយុទ្ធនាការចាក់វ៉ាក់សាំង និងវិធានការសុខភាពសាធារណៈជាទូទៅ៕