ក្រុងញូវដែលី៖ ឥណ្ឌាកាលពីថ្ងៃចន្ទបានក្លាយជាប្រទេសដែលមានករណីឆ្លងវីរុសកូរ៉ូណាខ្ពស់បំផុតទី៣ នៅក្នុងពិភពលោក ខណៈដែលអ្នកវិទ្យាសាស្ត្រមួយក្រុមបាននិយាយថា បច្ចុប្បន្ននេះមានភ័ស្តុតាងច្រើនលើសលប់ដែលជំងឺឆ្លងនេះ អាចរាលដាលបន្តទៅទៀត និងរយៈពេលយូរជាងការគិតទុកពីដំបូង។
ដោយប្រទេសរងប៉ះពាល់ខ្លាំងបំផុតនៅក្នុងពិភពលោក គឺអាមេរិក ដែលកំពុងប្រឹងប្រែងរឹតបន្តឹងការចេញគោលការណ៍ឲ្យរក្សាគម្លាតពីគ្នានៅក្នុងសង្គម និងពាក់ម៉ាស់ មន្ត្រីនៅទីនោះ បានព្រមានថា មន្ទីរពេទ្យខ្លះនៅក្នុងប្រទេសនេះ កំពុងប្រឈមនឹងគ្រោះថ្នាក់ ដោយសារចំនួនអ្នកឆ្លងវីរុសកើនឡើងច្រើនពេករកកន្លែងដាក់មិនបាន។
ថ្វីបើមានសញ្ញានៃការរីកចម្រើននៅក្នុងផ្នែកខ្លះនៃអឺរ៉ុប ជាទីដែលសារមន្ទីរ Louvre នៅក្នុងក្រុងប៉ារីសបានបើកឡើងវិញកាលពីថ្ងៃចន្ទក្តី ក៏ ចំនួនអ្នកឆ្លងវីរុសសរុបនៅក្នុងពិភពលោកបានកើតឡើងជាង ១១,៥ លាន ដោយមានអ្នកស្លាប់ជាង ៥៣៥ ០០០ នាក់ ចាប់តាំងពីវីរុសរាតត្បាតនេះ បានផ្ទុះឡើងដំបូងនៅក្នុងប្រទេសចិន កាលពីចុងឆ្នាំ ២០១៩។
រដ្ឋាភិបាលឥណ្ឌាក៏ដូចជារដ្ឋាភិបាលជាច្រើនទៀត នៅជុំវិញពិភពលោកបានដកការរឹតបន្តឹងបណ្តើរៗ ដើម្បីជួយសេដ្ឋកិច្ចដែលកំពុងរងប៉ះពាល់យ៉ាងខ្លាំងនេះ ប៉ុន្តែចំនួនករណីឆ្លងបានបន្តកើនឡើងដោយ ២៤ ០០០ នាក់ ត្រូវបានគេរាយការណ៍ក្នុងរយៈពេល ២៤ ម៉ោង នាំឲ្យចំនួនសរុបឡើងដល់ជិត ៧០ ម៊ឺននាក់កាលពីថ្ងៃចន្ទ ដែលចំនួននេះច្រើនជាងប្រទេសរុស្ស៊ី បន្តិច។
ក្រុងធំៗនៅប្រទេសឥណ្ឌា ក្នុងនោះមានក្រុងញូវដែលី និងក្រុមម៉ុមបៃ កំពុងរងប៉ះពាល់ខ្លាំងបំផុត ហើយក្រុមអ្នករិះគន់បាននិយាយថា មិនមានការធ្វើតេស្តឲ្យបានគ្រប់គ្រាន់ទេ ដោយមានន័យថា អ្នកឆ្លងជំងឺកូវីដ ១៩ ជាច្រើនទំនងជាមិនត្រូវបានធ្វើតេស្ត។
ការកើនឡើងនៃអ្នកឆ្លងជំងឺនេះ បានបង្ខំឲ្យអាជ្ញាធរនៅប្រទេសឥណ្ឌា បង្វែរសណ្ឋាគារ រោងការ មជ្ឈមណ្ឌលសាសនា និងរថភ្លើង ឲ្យជួយផ្តល់ការថែទាំដល់អ្នកជំងឺកូវីដ ១៩។
ចំណែកនៅអូស្ត្រាលីជាទីដែលការផ្ទុះឆ្លងរាលដាលនៃវីរុសផ្លូវដង្ហើមនេះ ត្រូវគ្រប់គ្រងបាននោះ ការផ្ទុះឆ្លងថ្មីនៅក្រុងមែលប៊នបានបង្ខំឲ្យអាជ្ញាធរបិទរដ្ឋវីកតូរីយ៉ាឲ្យមានប្រសិទ្ធភាព។
នៅជុំវិញពិភពលោក រដ្ឋាភិបាលទាំងអស់កំពុងប្រឹងប្រែងធ្វើឲ្យមានភាពស្មើគ្នាចំពោះតម្រូវការបើកសេដ្ឋកិច្ចដែលរងការប៉ះពាល់ដោយសារវិធានការបិទប្រទេសជាច្រើនសប្តាហ៍ប្រឆាំងនឹងគ្រោះថ្នាក់នៃការឆ្លងថ្មី ខណៈប្រជាជនវិលត្រឡប់ទៅរកជីវិតធម្មតាឡើងវិញនោះ។
នៅអឺរ៉ុបការឆ្លងរាតត្បាតនេះ ទំនងជាត្រូវគ្រប់គ្រងបានកាន់តែច្រើនថែមទៀត ទោះបីជាមន្ត្រីបានបញ្ជាឲ្យបិទតំបន់ខ្លះនៅអេស្ប៉ាញក្តី៕ AFP/PSA