បុរីញូវយ៉ក៖ មហាសន្និបាតអង្គការសហប្រជាជាតិកាលពីថ្ងៃពុធបានជ្រើសរើសសមាជិកថ្មីចំនួន ៤ របស់ក្រុមប្រឹក្សាសន្តិសុខសម្រាប់ឆ្នាំ ២០២១ និង ២០២២ ដោយប្រទេសកាណាដា បានបរាជ័យម្តងទៀត និងការប្រជែងយកអាសនៈនៅអាហ្វ្រិកនឹងបន្តទៅជុំក្រោយ។
ប្រទេសឥណ្ឌា ម៊ិកស៊ិក ន័រវែស និងអៀរឡង់ ត្រូវបានជ្រើសរើសជាសមាជិកមិនអចិន្រៃ្តយ៍ ខណៈប្រទេសជីប៊ូទី និងកេនយ៉ា ដែលខកខានមិនបានទទួលសំឡេងភាគច្រើន ២ ភាគ ៣ តាមតម្រូវការបានឈានទៅការបោះឆ្នោតជុំទី ២ កាលពីថ្ងៃព្រហស្បតិ៍។
ប្រទេសកាណាដា បានបរាជ័យម្តងទៀតសម្រាប់អាសនៈមួយក្នុងចំណោមអាសនៈទាំងអស់របស់លោកខាងលិច ដោយអៀរឡង់ និងន័រវែសជាអ្នកទទួលបានវិញ ទោះបីជាមានយុទ្ធនាការរយៈពេលយូរ និងនាំមកតារាស៊ុបភើស្តារមកសម្តែងក្តី ជាលទ្ធផលមួយ ដែលទំនងជាធ្វើឲ្យលោកនាយករដ្ឋមន្ត្រី ចាស្ទីន ទ្រូដូ កាន់តែទទួលភាពអាម៉ាស់ថែមទៀត។
នៅតំបន់អាស៊ីប៉ាស៊ីហ្វិក ប្រទេសឥណ្ឌា ដែលបានព្យាយាមប្រឹងប្រែងប្រជែងយកអាសនៈ ១ នៅក្រុមប្រឹក្សាសន្តិសុខ មិនបានទទួលជោគជ័យលើកមុននោះ បានទទួលសំឡេងឆ្នោតគាំទ្រ ១៨៤ សំឡេងនៅក្នុងចំណោមប្រទេសចំនួន ១៩២ ដែលបានចូលរួមការបោះឆ្នោតនោះ។
លទ្ធផលនោះមានន័យថាប្រទេសឥណ្ឌា នៅពេលនេះមានអាសនៈនៅក្នុងក្រុមប្រឹក្សានេះដូចប្រទេសចិន ដែរ ត្រឹមតែប៉ុន្មានថ្ងៃក្រោយពីប្រទេសនេះមានជម្លោះព្រំដែនភ្នំហិមាល័យដោយបានស្តីបន្ទោសគ្នាទៅវិញទៅមក ជុំវិញការប៉ះទង្គិច ដែលបានបណ្តាលឲ្យទាហានឥណ្ឌាយ៉ាងតិច ២០ នាក់ស្លាប់។
ប្រទេសម៊ិកស៊ិក ដែលគ្មានទទួលការជំទាស់ ទទួលបានសំឡេងឆ្នោតគាំទ្រ ១៨៧ សំឡេង។
បណ្តាប្រទេសនៅអាហ្វ្រិកកាលពីពេលកន្លងទៅ បានជ្រើសរើសបេក្ខជនរបស់ពួកគេផ្ទាល់ ប៉ុន្តែមិនអាចជ្រើសរើសប្រទេសតែមួយបានទេ នៅពេលនេះ។ ប្រទេសកេនយ៉ា បានទទួលសំឡេងឆ្នោតគាំទ្រ ១១៣ សំឡេងទល់ប្រទេសជីប៊ូទី ដែលទទួលបានសំឡេងឆ្នោតគាំទ្រ ៧៨ សំឡេង។
ប្រទេសកេនយ៉ា បានសម្តែងការគាំទ្រដល់សហភាពអាហ្វ្រិក (AU) ប៉ុន្តែប្រទេសជីប៊ូទី បាននិយាយថា ខ្លួនគួរតែមានអាសនៈនេះ ដោយសារក្រុងណៃរ៉ូប៊ី បានចូលរួមក្រុមប្រឹក្សានេះ កាលពីពេលកន្លងទៅ និងមានគោលការណ៍ប្តូរវេន៕ AFP/PSA