.jpg)
វ៉ាក់សាំង Pfizer-BioNTechមួយដបនៅក្នុងមន្ទីរពេទ្យSt James's Hospital។ AFP
កាលពីថ្ងៃអង្គារ ទី ២៩ រដ្ឋមន្ត្រីក្រសួងសុខាភិបាលឥណ្ឌូនេស៊ីបានប្រកាសថា ប្រទេសរបស់លោក គឺកំពុងធ្វើកិច្ចព្រមព្រៀងទិញយកវ៉ាក់សាំងជំងឺកូវីដ ១៩ របស់ Pfizer/BioNTech (អាមេរិក/អាល្លឺម៉ង់) និង របស់ AstraZeneca/Oxford (អង់គ្លេស/ស៊ុយអែត) ដើម្បីធានាស្តុកវ៉ាក់សាំងគ្រប់គ្រាន់សម្រាប់កម្មវិធីចាក់វ៉ាក់សាំង ដែលបានរង់ចាំជាយូរមកហើយនៅឆ្នាំក្រោយ។
លោករដ្ឋមន្ត្រី Budi Gunadi Sadikin និយាយនៅក្នុងសន្និសីទកាសែតមួយថា កិច្ចព្រមព្រៀងទិញយកវ៉ាក់សាំងចំនួន ៥០ លានដូសរបស់ AstraZeneca/Oxford ដោយមានជម្រើសទិញបន្ថែម ៥០ លានដូសទៀត នឹងត្រូវបានបង្ហើយនៅត្រឹមដំណាច់ឆ្នាំនេះ។ រីឯកិច្ចព្រមព្រៀងទិញវ៉ាក់សាំងរបស់ Pfizer/BioNTech ក្នុងលក្ខខណ្ឌដដែលនឹងត្រូវបានបង្ហើយនៅសប្ដាហ៍ដំបូងនៃខែមករា ឆ្នាំ ២០២១ ប៉ុន្តែលោកបានបញ្ជាក់ថា នៅសល់ពេលរាប់ខែទៀតទើបដូសដំបូងនៃវ៉ាក់សាំងទាំង ២ នេះមកដល់ឥណ្ឌូនេស៊ី។
ការប្រកាសនេះ បានធ្វើឡើង ខណៈពេលដែលប្រទេសឥណ្ឌូនេស៊ី គឺកំពុងរៀបចំចាប់ផ្ដើមការចាក់វ៉ាក់សាំងរបស់ក្រុមហ៊ុនចិន Sinovac Biotech នៅពេលដែលវ៉ាក់សាំងនេះទទួលបានការអនុញ្ញាតឱ្យប្រើប្រាស់ក្នុងគ្រាអាសន្ន។ លោក Budi បាននិយាយថា បុគ្គលិកសុខាភិបាលជួរមុខចំនួន ១,៣ លាននាក់របស់ប្រទេសនេះ នឹងទទួលបានអាទិភាពក្នុងការចាក់វ៉ាក់សាំងដំបូង នៅចន្លោះខែមករា និងមេសា។
កាលពីខែសីហា ឥណ្ឌូនេស៊ីបានធ្វើកិច្ចព្រមព្រៀងទិញយកវ៉ាក់សាំង Sinovac ចំនួន ៤០ លានដូសដោយកាលពីដើមខែធ្នូ បានទទួលការដឹកជញ្ជូនដំបូងវ៉ាក់សាំងចំនួន ១,២ លានដូស ហើយគេរំពឹងថា នឹងទទួលការដឹកជញ្ជូនវ៉ាក់សាំង ១,៨ លានដូសថែមទៀតនៅខែមករា។ Sinovac ក៏មានកិច្ចព្រមព្រៀងជាមួយក្រុមហ៊ុនរដ្ឋឥណ្ឌូនេស៊ី Bio Farma ដើម្បីផ្គត់ផ្គង់វត្ថុធាតុដើមសម្រាប់ការផលិតវ៉ាក់សាំងប្រមាណ ៤០ លានដូសក្នុងស្រុក។
ក្រុមហ៊ុន Sinovac ត្រូវបានគេរំពឹងថា នឹងបញ្ជូនទិន្នន័យបឋមនៃការសាកល្បងរបស់វ៉ាក់សាំងពួកគេទៅកាន់រដ្ឋបាលម្ហូបអាហារ និងឱសថរបស់ឥណ្ឌូនេស៊ីនៅខែមករា ខាងមុខនេះ។
គេមិនទាន់ដឹងច្បាស់អំពីប្រសិទ្ធភាពនៃវ៉ាក់សាំងនេះនៅឡើយ ដោយសារប្រទេសដែលចូលរួមការសាកល្បងភាគច្រើនមិនមានការចេញទិន្នន័យជាសាធារណៈនៅឡើយ ហើយប្រទេសដែលបញ្ចេញទិន្នន័យទាំងនេះបានរកឃើញថា មានប្រសិទ្ធភាពខុសគ្នាខ្លាំង។
កាលពីថ្ងៃទី ២៤ ប្រទេសតួកគី អ្នកវិទ្យាសាស្ត្របានសន្និដ្ឋានថា វ៉ាក់សាំងនេះគឺ មានប្រសិទ្ធភាព ៩១,២៤% រីឯប្រទេសប្រេស៊ីល វិញ ក្រោយពីការពន្យារ ៣ ដង បានធ្វើការប្រកាសនៅថ្ងៃដដែលថា វ៉ាក់សាំង Sinovac គឺមានប្រសិទ្ធភាពខ្ពស់ជាង ៥០% តែទាបជាង ៩០%។ កាលពីដើមខែធ្នូ Bio Farma បានប្រកាសថា ប្រសិទ្ធភាពរបស់វ៉ាក់សាំងគឺ ៩៧% ប៉ុន្តែក្រោយមកដកសម្តីវិញ ហើយបានធ្វើការបញ្ជាក់ថា ប្រសិទ្ធភាពមិនទាន់អាចកំណត់បាននៅឡើយទេ។
វ៉ាក់សាំងចិនមួយផ្សេងទៀត ក៏មានការរាយការណ៍ប្រសិទ្ធភាពខុសគ្នាផងដែរ។ កាលពីថ្ងៃ ៩ ខែធ្នូ ប្រទេសអារ៉ាប់រួម បានអនុញ្ញាតឱ្យប្រើប្រាស់វ៉ាក់សាំងរបស់ក្រុមហ៊ុន Sinopharm/Beijing Institute of Biological Product ដោយអះអាងថា មានប្រសិទ្ធភាព ៨៦% តែនៅថ្ងៃទី ៣០ ធ្នូ Sinopharm បានប្រកាសថា វ៉ាក់សាំងពួកគេមានប្រសិទ្ធភាព ៧៩%។ បើទោះបីជាទាបជាងប្រសិទ្ធភាពជាង ៩០% របស់វ៉ាក់សាំងលោកខាងលិចក៏ដោយវ៉ាក់សាំង Sinopharm គឺមានប្រសិទ្ធភាពខ្ពស់ជាង ៥០% ដែលគ្រប់គ្រាន់សម្រាប់ការអនុញ្ញាតឱ្យប្រើប្រាស់។
យ៉ាងណាមិញ សន្និសីទកាសែតរបស់លោក Bundi បានបង្ហាញថា ឥណ្ឌូនេស៊ីធានាថា ប្រទេសខ្លួននឹងទទួលបានវ៉ាក់សាំងកូវីដ ១៩ ជាង ៣០០ លានដូស ដែលក្រៅពី Pfizer/BioNTech និង AstraZeneca/Oxford គឺរួមមាន ៥០ លានដូសពីក្រុមហ៊ុនអាមេរិក Novavax ការទិញបន្ថែមពីSinovac ចំនួន ១២៥ លានដូស និងការទិញវ៉ាក់សាំង ៥៤ លានដូស តាមរយៈកម្មវិធី COVAX របស់ WHO។ លោក Bundi បានអះអាងថា ចំនួនវ៉ាក់សាំងនេះ គឺនឹងធ្វើឱ្យឥណ្ឌូនេស៊ីមានភាពស៊ាំ ដែលអាចនឹងបញ្ឈប់ការឆ្លងកូវីដ ១៩ ក្នុងប្រទេស៕
