.jpg)
មនុស្សជាច្រើនចូលរួមប្រារព្ធខួបលើកទី ១៧ នៃការវាយប្រហារនៅកោះបាលី។ AFP
ក្រុងដែនប៉ាសារ៖ អ្នកកាន់ទុក្ខ និងអ្នករួចផុតជីវិតពីគ្រោះថ្នាក់កាលពីថ្ងៃសៅរ៍ បានប្រារព្ធខួបលើកទី ១៧ នៃការវាយប្រហារគ្រាប់បែកនៅកោះបាលី ដែលបានបណ្តាលឲ្យមនុស្សជាង ២០០ នាក់ស្លាប់ នៅលើកោះរមណីយដ្ឋានរបស់ឥណ្ឌូនេស៊ី ខណៈការវាយប្រហាររបស់ក្រុមជីវពលអ៊ិស្លាម កំពុងបន្តញាំញីប្រទេសនេះ។
ក្រុមគ្រួសារដែលសោកសង្រេងអ្នករួចផុតជីវិតពីការវាយប្រហារ និងក្រុមអ្នកតំណាងមកពីស្ថានទូតជាច្រើន បានដាក់បាច់ផ្កា និងដុតធូបនៅកន្លែងប្រារព្ធពិធីនៅក្នុងមជ្ឈមណ្ឌលទេសចរណ៍ Kuta ដ៏ពេញនិយម ជាទីដែលក្រុមជនអ៊ិស្លាមបដិវត្តន៍ បានវាយប្រហារគ្រាប់បែកនៅក្នុងឆ្នាំ ២០០២ នោះ។
ក្រុមសមាជិកគ្រួសាររបស់ជនរងគ្រោះខ្លះ បានយំ និងអ្នកដទៃទៀតបានសន្លប់ នៅក្នុងអំឡុងពិធីដុតទៀន ដែលត្រូវបានធ្វើឡើង ដើម្បីប្រារព្ធខួបនៃការវាយប្រហារភេរវកម្ម និងគោរពវិញ្ញាណក្ខន្ធជនរងគ្រោះ ២០២ នាក់។ ភាគច្រើន គឺជាទេសចរបរទេសមកពីប្រទេសជាង ២០ ប៉ុន្តែមានតែប្រទេស អូស្ត្រាលី ទេ បានខាតបង់ច្រើនជាងគេបំផុត ដោយមនុស្ស ៨៨ នាក់បានស្លាប់ នៅក្នុងព្រឹតិ្តការណ៍វាយប្រហារគ្រាប់បែកនោះ។
អ្នកស្រី Endang Isnaini មានវ័យ ៤៨ ឆ្នាំ ដែលបានបាត់បង់ប្តីរបស់គាត់នៅក្នុងការវាយប្រហារនោះ បានប្រាប់ AFP ទាំងយំខ្សឹកខ្សួលថា៖ «ការវាយប្រហារនោះមានរយៈពេល ១៧ ឆ្នាំ ប៉ុន្តែស្នាមរបួសនៅថ្មីៗសម្រាប់ខ្ញុំ។ វាពិបាកក្នុងការព្យាបាលរបួសឲ្យជាសះស្បើយណាស់ ប៉ុន្តែខ្ញុំព្យាយាមបំភ្លេចរឿងអតីតកាល»៕ AFP/SK
