អាជ្ញាធរឥណ្ឌូនេស៊ីបាននិយាយថា ខ្លួនបានរឹបអូសយកនាវាដឹកប្រេងអ៊ីរ៉ង់ ១ គ្រឿង និងនាវាដឹកប្រេងប៉ាណាម៉ា ១ គ្រឿង សង្ស័យថានាវាទាំងនេះធ្វើអាជីវកម្មផ្ទេរប្រេងខុសច្បាប់នៅក្នុងដែនទឹកពីប្រទេសខ្លួនកាលពីថ្ងៃទី ២៤។ នេះបើយោងតាមសារព័ត៌មាន CNA។
អ្នកនាំពាក្យទីភ្នាក់ងារសន្តិសុខដែនសមុទ្រឥណ្ឌូនេស៊ីបានឱ្យដឹងថា នាវាដឹកប្រេងមានឈ្មោះថា MT Horse មានទង់ជាតិអ៊ីរ៉ង់ និងនាវាឈ្មោះ MT Freya មានទង់ជាតិប៉ាណាម៉ាត្រូវបានរដ្ឋាភិបាលរឹបអូសពីដែនទឹកនៅឯខេត្ត Kalimantan ភាគខាងលិចប្រទេសឥណ្ឌូនេស៊ី។
អ្នកនាំពាក្យបានបន្តថា រដ្ឋាភិបាលសង្ស័យអ្នកដឹកប្រេងបានប្រព្រឹត្តអំពើខុសច្បាប់ច្រើនករណី ក្នុងនោះរួមមានការមិនបង្ហាញពីទង់ជាតិប្រទេសខ្លួន ការបិទប្រព័ន្ធកំណត់អត្តសញ្ញាណបោះយុថ្កាខុសច្បាប់ក៏ដូចជាការផ្ទេរឥន្ធនៈខុសច្បាប់ជាមួយនឹងនាវាដទៃ និងការធ្វើឱ្យកំពប់ប្រេងចូលសមុទ្រជាដើម។
យ៉ាងណាមិញនាវាដឹកប្រេងទាំង ២ នេះ នឹងត្រូវគេដឹកទៅកាន់កោះ Batam ក្នុងខេត្ត Riau Islands ដើម្បីធ្វើការស៊ើបអង្កេតបន្ថែមទៀត៕