.jpg)
លោកប្រាយុធ ជួប និងថតរូបជាមួយប្រជាជនក្នុងតំបន់ និងក្មេងៗ។ BKP
ក្រុងបាងកកៈ លោកនាយករដ្ឋមន្ត្រីថៃប្រាយុធ ចានអូចា នៅតែមិនទាន់បញ្ជាក់ពីជំហរនៃអនាគតនយោបាយ របស់លោកកាលពីថ្ងៃអង្គារ ថ្វីបើមានការសន្យាថា នឹងបញ្ជាក់ឲ្យច្បាស់នៅខែនេះក្តី។
មុននេះ លោកនាយករដ្ឋមន្ត្រី បានថ្លែងថា លោកនឹងបញ្ជាក់ពីអនាគតរបស់លោកបានច្បាស់ ក្រោយពីច្បាប់ ២ ចុងក្រោយស្តីពីការបោះឆ្នោតជ្រើសរើសសមាជិកសភា និងព្រឹទ្ធសភា ត្រូវបានបោះពុម្ពផ្សាយនៅក្នុងទស្សនាវដ្តីភូមិន្ទនិងបម្រាមទៅលើក្រុមគណបក្សនយោបាយនានា ត្រូវបន្ធូរបន្ថយ។
ច្បាប់ ២ នេះ ត្រូវបានអនុម័តកាលពីថ្ងៃពុធ។ ច្បាប់ស្តីពីព្រឹទ្ធសភា មានប្រសិទ្ធភាពចាប់ពីថ្ងៃព្រហស្បតិ៍នេះតទៅ ខណៈដែលច្បាប់ស្តីពីការបោះឆ្នោតជ្រើសរើសសមាជិកសភានឹងចូលជាធរមានរយៈពេល ៩០ ថ្ងៃក្រោយពីបោះពុម្ពផ្សាយ។
ទន្ទឹមគ្នានេះដែរ កាលពីថ្ងៃសុក្រ លោកឧត្តមសេនីយ៍ ប្រាយុធ បានប្រើអំណាចពិសេសរបស់លោកនៅក្រោមមាត្រា ៤៤ ដើម្បីអនុញ្ញាតឲ្យបណ្តាបក្សនយោបាយ ធ្វើសកម្មភាពមុនពេលបោះឆ្នោត ថ្វីបើយុទ្ធនាការឃោសនាត្រូវបានហាមនៅឡើយ។
ថ្វីបើលក្ខខណ្ឌជាច្រើនរបស់លោក ត្រូវបានបំពេញហើយក្តីក៏លោកឧត្តមសេនីយ៍ប្រាយុធមិនលើកយកបញ្ហានេះមកជជែកកាលពីថ្ងៃអង្គារ។
លោកឧត្តមសេនីយ៍ បានថ្លែងប្រាប់ក្រុមអ្នកកាសែត ដែលសួរអំពីគោលបំណងនយោយបាយរបស់លោកថា៖ «ហេតុអ្វីបានជាអ្នកមានចំណាប់អារម្មណ៍លើខ្ញុំ? ខ្ញុំបាននិយាយថា ខ្ញុំនឹងប្រកាសពីបំណងរបស់ខ្ញុំក្រោយពីច្បាប់ ២ នេះ ត្រូវបានបោះពុម្ពផ្សាយ ពិតជាត្រឹមត្រូវ ក្រោយពីច្បាប់នេះ ត្រូវបានបោះពុម្ពផ្សាយ»៕
