ក្រុងរីយ៉ាដ៖ មន្ត្រីបានថ្លែងថា ក្រុមឧទ្ទាមហ៊ូធីនៅយេម៉ែន បានវាយប្រហារមីស៊ីលទៅលើរោងចក្រផលិតប្រេងសាអ៊ូឌីតអារ៉ាមកូ ១ កន្លែង នៅក្នុងទីក្រុងសមុទ្រក្រហមជីដដាហ៍ កាលពីថ្ងៃចន្ទ ដោយបានធ្វើឱ្យផ្ទុះ និងភ្លើងឆេះយ៉ាងសន្ធោសន្ធៅនៅក្នុងអាងស្តុកប្រេងមួយនៅទីនោះ។
ការវាយប្រហារនោះ បានកើតឡើងនៅពេលថ្ងៃ ក្រោយពីព្រះរាជាណាចក្រនេះ បានធ្វើជាម្ចាស់ផ្ទះកិច្ចប្រជុំកំពូលក្រុមប្រទេស G20 ហើយមានរយៈពេលជាង ១ ឆ្នាំក្រោយពីមានការវាយប្រហារទៅលើទីកន្លែងរោងចក្រផលិតប្រេងអារ៉ាមកូដ៏សំខាន់ ដែលបានបង្កឱ្យមានចលាចលនៅលើទីផ្សារលក់ប្រេងសកល។
ក្រុមឧទ្ទាមហ៊ូធី ដែលគាំទ្រដោយអ៊ីរ៉ង់បានថ្លែងថា ពួកគេបានបើកការវាយប្រហារមីស៊ីល Quds-2 ១ គ្រាប់ ទៅលើរោងចក្រចែកចាយប្រេងនោះ ជាការសងសឹកទៅនឹងការដើរតួនាទីយ៉ាងសំខាន់របស់ប្រទេសអារ៉ាប៊ី សាអ៊ូឌីត ចំពោះការដឹកនាំក្រុមចម្រុះយោធា ១ ដែលបានគាំទ្ររដ្ឋាភិបាលនៅក្នុងជម្លោះយ៉ាងយូរនៅប្រទេសយេម៉ែន។
ក្រុមឧទ្ទាមហ៊ូធីចាប់តាំងពីពេលនោះមក កាលពីឆ្នាំ ២០១៩ បានចាប់ផ្តើមបង្កើនការវាយប្រហារជាច្រើនលើក ទៅលើប្រទេសក្បែរខាងអារ៉ាប៊ី សាអ៊ូឌីត ជាពិសេសបានកំណត់គោលដៅទៅលើខេត្តមួយចំនួននៅភាគខាងត្បូង នៅតាមខ្សែបន្ទាត់ព្រំដែនបែងចែកជួរមុខរបស់ពួកគេ។ ទោះបីជាយ៉ាងណាក៏ដោយ ទីក្រុងជីដដាហ៍មានចម្ងាយប្រហែល ៦០០ គីឡូម៉ែត្រ ពីខ្សែបន្ទាត់ព្រំដែនសមរភូមិជួរមុខ។
ក្រសួងថាមពលអារ៉ាប៊ី សាអ៊ូឌីត បានថ្លែងនៅក្នុងសេចក្តីថ្លែងការណ៍ថា៖ «ការផ្ទុះ ១ បានកើតឡើង ដោយសារការវាយប្រហារភេរវកម្ម»៕ AFP/SK