ក្រុងដាក្កា៖ ក្រុមអ្នកជួយសង្គ្រោះដែលបានរកឃើញបុរសម្នាក់នៅមានជីវិតនៅក្នុង «អព្ភូតហេតុ» មួយក្នុងរយៈពេលប៉ុន្មានម៉ោងក្រោយមកនោះ បាននិយាយថា មនុស្សយ៉ាងតិច ៣២ នាក់បានស្លាប់ ក្រោយពីនាវាចម្លង ១ គ្រឿងបានក្រឡាប់ និងលិចកាលពីថ្ងៃចន្ទនៅក្នុងរដ្ឋធានីដាក្កានៃប្រទេសបង់ក្លាដែស បន្ទាប់ពីនាវានោះ បានបុកគ្នាជាមួយនាវា ១ គ្រឿងទៀត។
មនុស្ស ១២ នាក់ ត្រូវបានគេចុះបញ្ជីដំបូងថា កំពុងបាត់ខ្លួននៅក្នុងឧប្បត្តិហេតុនោះ។
នាវាចម្លង The Morning Bird ត្រូវបានបុកពីក្រោយ ដោយនាវាចម្លង ១ គ្រឿងផ្សេងទៀត នៅប្រហែលម៉ោង ៩ និង ៣០ នាទីព្រឹក នៅអំឡុងពេលចរាចរណ៍ដ៏មមាញឹក នៅពេលកំពង់ផែទន្លេធំជាងគេបំផុតរបស់ប្រទេស ដែលសម្បូរទៅដោយនាវាចម្លងរាប់សិបគ្រឿងនៅទីនោះ។
លោក អាហ្សាហ៊ីឌុល អ៊ីស្លាម ជាអ្នកមុជទឹកម្នាក់នៅក្នុងក្រុមពន្លត់អគ្គិភ័យ បានថ្លែងប្រាប់កាសែត AFP ថា៖ «យើងបានស្រង់សាកសពចំនួន ៣២ នាក់ យើងបានរកឃើញនាវាចម្លងនៅក្នុងទឹកមានជម្រៅជាង ១៥ ម៉ែត្រ នៅក្នុងទន្លេនោះ»។
«ខ្ញុំគិតថា យើងបានស្រង់សាកសពយ៉ាងច្រើននៅក្នុងចំណោមសាកសពទាំងនោះ ហើយសាកសពដែលនៅសល់ផ្សេងទៀត អាចត្រូវបានស្រង់ចេញ ប្រសិនបើនាវាចម្លងនោះ អាចត្រូវបានគេសណ្តោង និងលើកចេញពីទឹក នាវានោះទំនងជាបានកប់នៅក្នុងភក់បាតទន្លេនោះ»។
នៅក្នុងរយៈពេលជាង ១២ ម៉ោង ក្រោយពីនាវាចម្លងដែលបានដឹកអ្នកដំណើរនោះ បានលិចចូលក្នុងបាតទន្លេ ហើយអ្នកដំណើរម្នាក់ នៅមានជីវិតនៅឡើយ៕ AFP/SK