កាលពីថ្ងៃពុធ ទី ៧ មេសា បាតុកម្មប្រឆាំងនឹងរបបគ្រប់គ្រងប្រទេសមីយ៉ាន់ម៉ា បានផ្ទុះឡើងនៅទីក្រុងឡុងដ៍បន្ទាប់ពីឯកអគ្គរដ្ឋទូតមីយ៉ាន់ម៉ាប្រចាំនៅចក្រភពអង់គ្លេស ត្រូវបានបណ្តេញចេញពីស្ថានទូតនៅក្នុងទីក្រុងឡុងដ៍។ ឯកអគ្គរដ្ឋទូតមីយ៉ាន់ម៉ាប្រចាំចក្រភពអង់គ្លេស លោក Kyaw Zwar Minn បាននិយាយថា ស្ថានទូតត្រូវបានឃាំងដោយឥស្សរជនយោធាមីយ៉ាន់ម៉ា។
កន្លងមកលោកZwar Minn បាននិយាយប្រឆាំងនឹងយោធានៅក្នុងប្រទេសមីយ៉ាន់ម៉ា ដោយអំពាវនាវឱ្យមានការដោះលែងលោកស្រី Aung San SuuKyi។ លោកក៏ធ្លាប់បានជួបជាមួយរដ្ឋមន្រ្តីក្រសួងការបរទេសអង់គ្លេស Dominic Raab កាលពីខែមីនាដើម្បីពិភាក្សាអំពីវិបត្តិដែលកំពុងកើតមានឡើងនៅក្នុងប្រទេសមីយ៉ាន់ម៉ា។
លោក Kyaw Zwar Minn បានប្រាប់ការសែត DailyTelegraph “នៅពេលដែលខ្ញុំបានចាកចេញពីស្ថានទូតពួកគេបានសម្រុកចូលបរិវេណខាងក្នុងហើយកាន់កាប់ទីតាំងនេះ។ ពួកគេមកពីក្រុមយោធាមីយ៉ាន់ម៉ា” ហើយលោកបន្តថា “ពួកគេប្រាប់ខ្ញុំថា ពួកគេបានទទួលការណែនាំពីរដ្ឋធានីដូច្នេះពួកគេនឹងមិនអនុញ្ញាតឱ្យខ្ញុំចូលក្នុងវិញបានទេ”៕