ការស៊ើបអង្កេតរបស់ប្រព័ន្ធផ្សព្វផ្សាយអឺរ៉ុបចេញផ្សាយកាលពីថ្ងៃអាទិត្យ បានឱ្យដឹងថា ភ្នាក់ងារសម្ងាត់របស់ដាណឺម៉ាកបានជួយទីភ្នាក់ងារសន្តិសុខជាតិអាមេរិក (NSA) ដើម្បីស៊ើបការណ៍លើមេដឹកនាំអឺរ៉ុប ដែលរួមមានអធិការបតីអាល្លឺម៉ង់លោកស្រី Angela Merkel និងប្រធានាធិបតី Frank-Walter Steinmeier ផងដែរ។
ការលាតត្រដាងដែលថា សហរដ្ឋអាមេរិកបានធ្វើចារកម្មលើសម្ព័ន្ធមិត្តរបស់ខ្លួនបានចាប់ផ្តើមដំបូងនៅក្នុងឆ្នាំ ២០១៣ ប៉ុន្តែឥឡូវនេះមានតែអ្នកសារព័ត៌មានប៉ុណ្ណោះ ដែលទទួលបានរបាយការណ៍លម្អិតដែលទីភ្នាក់ងារស៊ើបការណ៍សម្ងាត់ការពារជាតិដាណឺម៉ាក (FE) ផ្ញើឱ្យភ្នាក់ងារអាមេរិក NSA។
របាយការណ៍បានបង្ហាញថា សម្ព័ន្ធមិត្ត និងអ្នកជិតខាងជិតស្និទ្ធរបស់អាល្លឺម៉ង់បានសហការជាមួយប្រតិបត្តិការចារកម្មរបស់អាមេរិក ដើម្បីកំណត់គោលដៅស៊ើបការណ៍លើអធិការបតី និងប្រធានាធិបតីអាល្លឺម៉ង់។ ជាមួយគ្នានេះដែរ របាយការណ៍ថ្មីមួយទៀត ក៏បានបង្ហាញថា បេក្ខជនអធិការបតីសម្រាប់គណបក្សសង្គមនិយមឆ្វេងនិយមកណ្តាលអាល្លឺម៉ង់ (SPD) គឺលោក Peer Steinbruck ក៏ត្រូវបានគេដៅជាគោលដៅដែរ។
សារព័ត៌មាន NDR បានរាយការណ៍ថា ពួកគេបានចាប់ផ្តើមប្រមូលព័ត៌មានស្តីពីកិច្ចសហប្រតិបត្តិការរវាងភ្នាក់ងារដេណឺម៉ាក FE ជាមួយភ្នាក់ងារអាមេរិក NSA ក្នុងចន្លោះឆ្នាំ ២០១២ និង ២០១៤ នៅក្នុងរបាយការណ៍សម្ងាត់មួយឈ្មោះថា Dunhammer ក្រោយមានការបង្ហាញព័ត៌មានពីសំណាក់អតីតបុគ្គលិក NSA និងអ្នកសរសេរព័ត៌មានម្នាក់ឈ្មោះ Edward Snowden។
ព័ត៌មានដែលពួកគេបានប្រមូលមក បានបញ្ជាក់ច្បាស់ថា ភ្នាក់ងារ FE បានជួយដល់ភ្នាក់ងារ NSA ដើម្បីស៊ើបការណ៍អ្នកនយោបាយនាំមុខនៅស៊ុយអែត ន័រវែស ហូឡង់ និងបារាំង ក៏ដូចជាអាល្លឺម៉ង់ផងដែរ។
ការស៊ើបការណ៍របស់ដាណឺម៉ាកក៏បានជួយទីភ្នាក់ងារអាមេរិកឱ្យស៊ើបការណ៍ក្រសួងការបរទេស និងហិរញ្ញវត្ថុរបស់ដាណឺម៉ាកក៏ដូចជាក្រុមហ៊ុនផលិតអាវុធដាណឺម៉ាកផងដែរ។ ភ្នាក់ងារ FE ក៏បានសហការជាមួយភ្នាក់ងារ NSA ដើម្បីធ្វើប្រតិបត្តិការចារកម្មប្រឆាំងនឹងរដ្ឋាភិបាលអាមេរិកខ្លួនឯងទៀតផង។
នៅពេលរកឃើញច្បាស់ថា តើកិច្ចសហប្រតិបត្តិការរវាងសេវាស៊ើបការណ៍សម្ងាត់របស់ប្រទេសទាំង ២ ឈានដល់កម្រិតណា ហើយរដ្ឋាភិបាលដាណឺម៉ាក បានបង្ខំឱ្យថ្នាក់ដឹកនាំនៃភ្នាក់ងារ FE ទាំងមូលចុះចេញពីតំណែងនៅឆ្នាំ ២០២០។
អ្នកជំនាញដាណឺម៉ាកផ្នែកប្រតិបត្តិការសេវាកម្មសម្ងាត់ លោក Thomas Wegener Friis ជឿជាក់ថា ភ្នាក់ងារ FE ត្រូវប្រឈមនឹងបញ្ហាក្នុងការជ្រើសរើសដៃគូជិតស្និទ្ធ និងគួរទុកចិត្ត ដើម្បីធ្វើការជាមួយ។ លោកបាននិយាយថា៖ «ចុងក្រោយពួកគេបានធ្វើការសម្រេចចិត្តច្បាស់លាស់ ដើម្បីធ្វើការជាមួយអាមេរិក ដើម្បីប្រឆាំងនឹងដៃគូអឺរ៉ុបរបស់ពួកគេ»។
យ៉ាងណាមិញ លោក Steinbruck បាននិយាយទៅកាន់សមាជិកក្រុមស្រាវជ្រាវអាល្លឺម៉ង់នៅពេលដឹងអំពីប្រតិបត្តិការចារកម្មប្រឆាំងនឹងគាត់ថា៖ «បើគិតតាមរបៀបនយោបាយ ខ្ញុំចាត់ទុករឿងនេះថា ជារឿងអាស្រូវ»។
ទន្ទឹមនឹងនេះដែរ លោកក៏បានទទួលស្គាល់ថា ប្រទេសនៅលោកខាងលិចតម្រូវឱ្យមានមុខងារស៊ើបការណ៍សម្ងាត់ ដោយឡែករឿងដែលថា អាជ្ញាធរដាណឺម៉ាកបានធ្វើចារកម្មលើដៃគូប្រទេស ដែលជាដៃគូរបស់ពួកគេ បានបង្ហាញថា «ប្រទេសនៅលោកខាងលិចមួយនេះ ចេះធ្វើអ្វីដោយខ្លួនឯង»។
លោក Patrick Sensburg អ្នកដឹកនាំគណៈកម្មាធិការសភាអាល្លឺម៉ង់ ដើម្បីស៊ើបអង្កេតរឿងអាស្រូវចារកម្មរបស់ភ្នាក់ងារ NSA មិនបានសម្ដែងភាពភ្ញាក់ផ្អើលចំពោះព័ត៌មាននេះទេ។ សម្រាប់សមាជិកសភាមកពីសហភាពប្រជាធិបតេយ្យប្រជាធិបតេយ្យ (CDU) របស់លោកស្រី Merkel ចាំបាច់ត្រូវយល់ពីអ្វី ដែលជំរុញឱ្យមានការស៊ើបអង្កេតសម្ងាត់នេះ។
យ៉ាងណាមិញក្រសួងការពារជាតិដាណឺម៉ាកភ្នាក់ងារ FE និងភ្នាក់ងារ NSA មិនបានឆ្លើយតបនឹងសំណើសុំការអត្ថាធិប្បាយលើករណីនេះទេ ប៉ុន្តែសេចក្តីថ្លែងការណ៍ទូទៅមួយពីក្រសួងការពារជាតិដាណឺម៉ាកបាននិយាយថា៖ «ការបង្កបញ្ហាជាប្រព័ន្ធនៃសម្ព័ន្ធមិត្តជិតស្និទ្ធ គឺជាអំពើមួយមិនអាចទទួលយកបានទេ»៕